Yav-dang lai leekf da hhiangh voon huf
4
1 Seeif looif,
Yav-dang hemv maih geef huf hee Hiaf-ua lap suanv,
Hiaf-ua ziuh guaf nungh lai Gai-inha.
Geef bov,
"Ye-hheev-huav boongv tooh hauf,
biang hauf lai leekf da hhiangh huf hee vooi."
2 Hiaf-ua yuh lai tok Gai-inh huf hee Yav-bov.
Yav-bov tih tiangh tuangf gee,
Gai-inh tih huk veen niaf gee.
3 Gua tif ganv duanf hee vooi,
Gai-inh oouv makf geef sav sav neeh gee miaf huk goouh faif hooif gee hianf sev Ye-hheev-huav.
4 Yav-bov ya lokf tuangf geef gee liakf tuangf hau hoouf zuif maif gee uk miaf,
oouv manf tuangf gee miaf hianf sev Ye-hheev-huav.
Ye-hheev-huav ziapf siuf Yav-bov hemv goouh geef hianf neeh gee,
5 danf tih meenf ziapf siuf Gai-inh hemv goouh geef hianf neeh gee.
Gai-inh ziuh hhif lukf vooi,
tiang mee nyungf nyung teenf heen.
6 Ye-hheev-huav ziuh bov Gai-inh bov,
"Meef veeih gai hheei hhif?
Veeih gai nyung tiang mee teenf heen?
7 Meef zeekf huk heekf,
hauf meenf tih ziapf siuf meef?
Meef zeekf huk meenf heekf,
soih ziuh fokf yoou bak deenh meef vooi.
Soih gee tiang menf meef,
danf tih meef itf dingf hheem zif fokf geef."
Engv ga tok
8 Lai veenf hee,
Gai-inh hemv tok geef huf hee Yav-bov gang bov,
"Doouf loh hemv goonf booiv veen niaf lof."
Geef loh yoou da veen gee tif hoouh,
Gai-inh ziuh longf moof git tok geef huf hee Yav-bov,
ga geef daiv vooi.
9 Ye-hheev-huav tooi Gai-inh bov,
"Tok meef huf hee Yav-bov yoou leeuf nenh?"
Geef tanv bov,
"Hauf meenf huh!
Sangf tih hauf tih dekf tok hauf huf hee gee haf?"
10 Ye-hheev-huav bov,
"Meef huk gai gee vooi?
Baq tok meef huf gee lai sauv lokf dauf matf miaf ngai hhuf hauf.
11 Matf gee hhooiv bak lokf moof meef zip baq geef gee booiv vooi.
En teeif meef dif lokf matf neeh gee tuh zeeuf.
12 Meef sav goouh,
matf gee ya meenf tengv goouh sev meef vooi;
meef itf dingf yoou bak matf doongv lengv liuv langf."
13 Gai-inh hemv Ye-hheev-huav gang bov,
"Meef fatf hauf haif hhoonv vooi,
hauf meenf tuh lai.
14 Meef dekf!
Veenf nooih meef voouf hauf luat lengv neeh hhootf hee,
yam hauf hheem met meef;
hauf dif yoou bak matf doongv lengv liuv langf,
too lai am heekf hauf gee lengv hunf ziuh dif ga hauf."
15 Danf tih Ye-hheev-huav bov geef bov,
"Meenf hhoo neengf gee,
naf nee zeekf ga Gai-inh,
ziuh dif boou geef sit fuih."
Ye-hheev-huav ziuh hooi Gai-inh huk hoouh mee,
ha zinf lengv hunf gee am heekf geef ga geef.
16 Gai-inh ziuh lif hhooiv Ye-hheev-huav vooi,
booiv ningf I-dianf dung buf gee Nov-teevb neeh hhootf hee zih.
Leekf lanv Gai-inh gee
17 Hoouh looif,
Gai-inh hemv maih geef huf hee lap suanv,
maih geef huf hee ziuh guaf nungh lai Yih-noqf.
Gai-inh gianf heeuv mee,
geef ziuh ziuf nooiv leekf da hhiangh geef huf hee yam heeuv neeh mee Yih-noqf hee.
18 Yih-noqf lai Yih-nav,
Yih-nav lai Miv-huf-yav-lif,
Miv-huf-yav-lif lai Mah-tuv-sa-lif,
Mah-tuv-sa-lif lai La-maif.
19 La-maif oouv maih voon huf,
huf hee yam Yav-daf,
huf hee yam Siv-la.
20 Yav-daf lai Yav-ba,
Yav-ba ziuh tih zuh sian lengv hunf zih ziangf feengv tiangh tuangf tiangh nguf gee.
21 Tok Yav-ba huf hee yam Yiuh-ba,
Yiuh-ba tih suanv buf lengv hunf voouh tiuv ngatf hinf gee zuh sian.
22 Siv-la yuh lai Tuv-ba-gai-inh,
Tuv-ba-gai-inh tih oouv het oouv hongf miaf git gookf zuangv gung gif gee.
Gov Tuv-ba-gai-inh huf hee yam Nav-mah hee.
23 La-maif bov maih geef voon huf bov,
"Yav-daf haf!
Siv-la haf!
Hingf hauf gang;
maih La-maif gee,
hheem zutf sav hingf hauf gang,
lengv hunf haih hauf neeh huf hee,
hauf ga geef vooi;
leekf hauh tengv huk hauf tiangv neeh huf hee,
hauf ga geef vooi.
24 Zeekf ga Gai-inh gee,
ziuh boou sit fuih;
zeekf ga La-maif gee,
itf dingf boou sit teepf sit fuih."
25 Yav-dang yuh hemv maih geef huf hee lap suanv,
maih geef huf hee yuh lai leekf da hhiangh huf hee,
hhooiv nooiv yam Saif-teeqfc hee;
eenv veeih Hiaf-ua bov,
"Gai-inh ga Yav-bov vooi,
Siangf-dif sungf sev leekf huf hee zee hauf ding Yav-bov."
26 Saif-teeqf ya lai leekf da hhiangh huf hee,
hhooiv nooiv yam Yih-nov-sif hee.
Neeh tif hoouh,
lengv hunf gee nah hhai sih hhuf nooiv Ye-hheev-huav mee.