5 Doongv haih teepf ti veeif gee tif hoouh,

voongf Gi-daf-lauh-mah hemv hhiv ha hemv geef lianv hoopf gee voongf hongf goonf yoou Yaf-teef-lif-zia-ningv,

git lengv hunf Lif-fav-in gee tuv vooi,

yoou Hha-maif git lengv hunf Su-si gee tuv vooi,

yoou Sa-ui-gi-liatf-tingv git lengv hunf Yih-miv gee tuv vooi,

6 yoou Si-eev san git zih yoou ninh gee Hheev-lif lengv hunf tuv vooi,

hum zi doongv ningf sa mookf gee I-leeqf-ba-lanv.

7 Seeif looif geef loh leengv doongv An-mif-ba,

ziuh tih Zia-tih-si,

yoou ninh git lengv hunf Yaf-mah-lif gee tuv vooi,

ziamf lengv geef loh gee inv vooi,

ya git zih yoou Hha-siv-sunf-ta-mah gee Yaf-mov-lif lengv hunf tuv vooi.

8 Voongf Soh-to-mah,

voongf Eev-mov-la,

voongf Ya-mah,

voongf Siv-bianv hemv voongf Bih-la,

Bih-la ziuh tih Sov-eev,

zung uk miaf yoou Si-dingf guh faif sinh,

dif hemv geef loh git sinh,

9 ziuh tih hemv Yih-lanv gee voongf Gi-daf-lauh-mah,

Gee-inf gee voongf Tiv-tav,

Sif-nav gee voongf Anf-la-feei,

Yih-la-sa gee voongf Yav-liatf git sinh,

ziuh tih ti huf voongf hemv ngah huf voongf git sinh.

10 Si-dingf guh lai soongh likf sing gee dunf hee.

Voongf Soh-to-mah hemv voongf Eev-mov-la git tuv vooi deuf gee tif hoouh,

dok longf soongh vooi,

hhiv ha gee lengv hunf zung deuf geen baiv tiah vooi.

11 Voongf neeh ti huf ziuh geep Soh-to-mah hemv Eev-mov-la too lai gee saiv sanh hemv liangv sikf inf inv booiv vooi;

12 ya geep leekf tok Yav-bov-lanv huf hee Lov-teev hemv saiv sanh Lov-teev gee hemv booiv vooi.

Neeh tif hoouh Lov-teev zih yoou Soh-to-mah.

13 Lai lengv hunf huf hee deuf luat vooi,

deuf miaf seengv lengv hunf Si-bov-laiv gee Yav-bov-lanv.

Neeh tif hoouh,

Yav-bov-lanv zih yoou lengv hunf Yaf-mov-lif,

Manf-lif gee ningf siangf suf neeh hhootf hee.

Manf-lif hemv Yih-siv-geef gangf Yav-naiv zung tih engv tok,

geef loh hemv Yav-bov-lanv duf ga hemv goonf lianv hoopf vooi.

14 Yav-bov-lanv giangf hingf huh leekf tok geef huf hee bif hoof booiv vooi,

geef ziuh yin tamv bek it teepf bet na lai yoou lanf geef,

ya hunf lianf gua took git sinh gee leekf hauh tengv zuiv zi doongv Danf.

15 Yav-bov-lanv hemv leekf nof geef gee yoou da goomh gee tif hoouh,

feenv tingf gi deeif booiv git ti huf voongf tuv vooi,

ya zuiv geef loh zi doongv Hheev-bav,

Hheev-bav yoou Daf-mah-seef-geev gee beek fiangf hee.

16 Geef oouv goouh geep booiv neeh gee inf inv leengv vooi,

leekf tok geef huf hee Lov-teev hemv saiv sanh Lov-teev gee,

gangf maih leekf gee hemv hhiv ha gee lengv hunf zung oouv leengv vooi.

17 Yav-bov-lanv git voongf Gi-daf-lauh-mah hemv voongf hemv geef lianv hoopf neeh gee tuv vooi leengv miaf gee tif hoouh,

voongf Soh-to-mah huf hee uk miaf,

yoou Sa-ui guh zip geef,

Sa-ui guh ziuh tih Voongv guh.

18 Voongf Sa-leengh Maif-gi-siv-teev ya dai bing dai yan uk miaf zip Yav-bov-lanv.

Maif-gi-siv-teev tih zuif nyoo Siangf-dif gee gif see.

19 Geef zukf fukf Yav-bov-lanv,

bov,

Yav-bov-lanv ziuh oouv goouh too lai geef geep leengv miaf neeh gee gee teepf feenv zee it sev zee Maif-gi-siv-teev.

21 Voongf Soh-to-mah hemv Yav-bov-lanv gang bov,

"Meef oouv lengv hunf leengv hauf,

goouh gee teengh zee meef."

22 Yav-bov-lanv bov voongf Soh-to-mah huf hee bov,

"Hauf duf ga hemv Ye-hheev-huav zuif nyoo gee Siangf-dif,

soouh fa matf gee Zu fat tooi vooi,

23 too lai goouh meef gee hauf zung meenf oouv,

ziuh tih mooiv hiuf hee,

ba haif hiuf hee hauf duf meenf oouv,

ha zinf meef bov,

'Hauf biang Yav-bov-lanv fat saif vooi.'

24 Seef leekf nof hemf moh hauf booiv neeh gee goonv gee yungh gee vooi,

hauf gai gee duf meenf oouv,

danf tih hemv hauf lianv hoopf,

ya hemf moh hauf booiv gee Yav-naiv,

Yih-siv-geef,

Manf-lif,

geef loh gaiv lai oouv gee ziuh oouv zee geef loh."