Sa-laiv hemv Siaf-ziav
16
1 Maih Yav-bov-lanv huf hee Sa-laiv meenf hooi lai geef lai leekf.
Geef lai leekf nof huf hee yam Siaf-ziav hee,
tih lengv hunf Ai-gipf gee.
2 Sa-laiv hemv Yav-bov-lanv gang bov,
"Noh,
Ye-hheev-huav biang hauf meenf lai lai leekf,
hhuf meef hemv leekf nof hauf huf hee lap,
i sook geef dif hooi hauf lai leekf."
Yav-bov-lanv hingf go Sa-laiv gee vooi.
3 Maih Yav-bov-lanv huf hee Sa-laiv ziuh oouv leekf nof geef huf hee,
ziuh tih Ai-gipf lengv hunf Siaf-ziav,
sev zee bef geef huf hee huk maih nook;
neeh tif hoouh Yav-bov-lanv duf ga yoou Gia-noomv zih teepf veeif vooi.
4 Yav-bov-lanv hemv Siaf-ziav lap suanv,
Siaf-ziav ziuh guaf leekf vooi.
Geef huh toof too guaf leekf vooi,
ziuh vook meenf uif lanf zu geef huf hee Sa-laiv.
5 Sa-laiv hemv Yav-bov-lanv gang bov,
"Geef dif hhiv manf hauf tih lokf meef,
hauf oouv leekf nof hauf huf hee sev meef,
geef huh toof too guaf leekf vooi,
ziuh vook meenf uif hauf.
Hi voongf Ye-hheev-huav hooi duan li dekf meef heekf ha tih hauf heekf."
6 Yav-bov-lanv hemv Sa-laiv gang bov,
"Noh,
geef tih leekf nof meef huf hee,
yoou da moof meef,
meef ooi di leeuf doi geef ziuh di leeuf doi geef."
Sa-laiv ziuh sih Siaf-ziav,
Siaf-ziav ziuh lokf dau na Sa-laiv deuf vooi.
Siaf-ziav lai Yih-siv-mah-lif
7 Ye-hheev-huav gee sih zeh yoou da loouh gee namh maf dof neeh hhootf hee huh Siaf-ziav,
namh maf dof neeh mee yoou ningf sunv booiv Su-eev neeh hiuf hee.
8 Sih zeh huf hee ziuh hemv geef gang bov,
"Sa-laiv gee leekf nof Siaf-ziav haf!
Meef lokf leeuf miaf?
Dif booiv leeuf nooh?"
Siaf-ziav bov,
"Hauf deuf lokf lanf zu hauf huf hee Sa-laiv neeh hhootf hee uk miaf."
9 Ye-hheev-huav gee sih zeh bov geef bov,
"Meef hheem leengv ningf maih lanf zu meef huf hee vooi,
hhoomh hheei loouh heng hoouh geef."
10 Ye-hheev-huav gee sih zeh yuh gang bov,
"Hauf itf dingf biang heeuf daif meef gee fat meenf huh giauh liauh,
tuan ya meenf tuan lai inv."
11 Ya bov,
"Noh,
meef duf ga guaf nungh vooi,
dif lai leekf da hhiangh huf hee.
Meef hheem hemv geef hhooiv nooiv yam Yih-siv-mah-lifa hee,
eenv veeih Ye-hheev-huav hingf huh meef tuh hho vooi.
12 Leekf neeh huf hee dif zing luh sangv huf hee teenf heen.
Geef dif git vanh,
vanh ya dif git geef;
geef itf dingf siangf siangf hemv engv tok geef gee zookf deeif."
13 Siaf-ziav ziuh yam hemv geef gang go gee Ye-hheev-huav tih "Gov lengv hunf gee Siangf-dif."
Eenv veeih geef bov,
"Yoou nooih hauf meenf tih ya dekf huh neef gov lengv hunf gee Neeh-huf-hee vooi haf?"
14 Guf seeh ziuh yam yangv neeh mee Bif-eev-la-haih-laivb hee.
Yangv neeh mee yoou Zia-tih-si hemv Ba-liatf gee zing da.