3 Fav-lauh tooi engv tok geef gee bov,

"Meef loh tih huk gai gee gee?"

Geef loh tanv Fav-lauh bov,

"Leekf nof meef gee tiangh nguf tiangh tuangf div goonv,

hauf loh hemv gungv bef hauf loh gee zung tih huk ngipf neeh mee gee."

4 Geef loh yuh bov Fav-lauh bov,

"Lengv Gia-noomv gee daiv yiak haif ngiamv zungf vooi,

tuangf leekf nof meef gee meenf lai boot hau goonv vooi,

hauf loh nah ziamf siv yif miaf nooih.

En teeif hhuf meef sev leekf nof meef gee zih yoou lengv Gee-san gee."

5 Fav-lauh bov Ye-seef bov,

"Bef lai meef huf hee hemv engv tok meef gee miaf doongv ningf meef vooi,

6 meef dekf!

Lengv Ai-gipf gee inf inv zung yoou nooih,

meef nah guf an faiv bef lai meef hemv engv tok meef gee zih yoou lengv zuif maif neeh hhootf hee,

geef loh hhoo yi zih yoou lengv Gee-san gee.

Meef zeekf huh yoou da geef loh lai neengv likf gee,

meef ziuh faif geef loh guanh lih nguf hemv tuangf hauf gee."

7 Ye-seef yin bef lai geef huf hee Yav-gookf booiv div Fav-lauh,

Yav-gookf ziuh zukf fukf Fav-lauh.

8 Fav-lauh tooi Yav-gookf bov,

"Meef lai giauh tui vooi?"

9 Yav-gookf tanv Fav-lauh bov,

"Hauf ziamf siv zih yoou tooi ganv neeh mee it bek tamv teepf veeif vooi.

Hauf neeh tooi hee yuh hhutf yuh hho,

meenf dim gungv bef hauf gee goonv lauh."

10 Dif leengv booiv gee tif hoouh,

Yav-gookf yuh zukf fukf Fav-lauh fooif hemv,

ziuh uk miaf vooi.

11 Ye-seef ziuh ziuf Fav-lauh gang gee,

an faiv bef lai geef huf hee hemv engv tok geef gee zih yoou lengv Lanv-saif gee^a.

Lengv neeh hhootf tih suanf Ai-gipf zuif maif gee,

sev lengv neeh hhootf hee zee geef loh huk goonv.

12 Ye-seef ya sev liangv sikf zee bef lai geef hemv engv tok geef gee hemv bef lai geef suanf gav gee lengv hunf,

gangf leekf nook gee hemv,

zung tih anf yinv hheeuh feenv liangv sikf zee geef loh.

13 Neeh tif hoouh,

daiv yiak meenf huh giauh ngiamv zungf,

leeuf ziqf duf meenf lai liangv sikf goonv vooi,

lengv hunf lengv Ai-gipf gee hemv lengv hunf lengv Gia-noomv gee zung yiak hhiauv lev vooi.

14 Ye-seef suv ngoonf fiakf lengv hunf lengv Ai-gipf hemv lengv hunf lengv Gia-noomv hemv geef vianv liangv sikf neeh gee inf inv uif,

biang ngoonf fiakf neeh gee loouh da voongv gung Fav-lauh mee vooi.

15 Ngoonf fiakf lengv hunf lengv Ai-gipf gee hemv lengv hunf lengv Gia-noomv gee zung yungh inv vooi,

lengv hunf Ai-gipf gee zung miaf div Ye-seef,

bov,

"Ngoonf fiakf hauf loh gee zung yungh inv vooi,

hhuf meef sev liangv sikf zee hauf loh,

ha zinf hauf loh yiak daiv yoou dau na meef."

16 Ye-seef bov,

"Ngoonf fiakf meef loh gee zeekf yungh inv vooi,

ziuh voouf nguf meef loh gee tuangf meef loh gee miaf toonv,

hauf ziuh oouv liangv sikf zee meef loh."

17 Geef loh ziuh voouf nguf,

tuangf,

luh,

maqf neeh gee inf inv miaf ningf Ye-seef vooi,

Ye-seef ziuh oouv liangv sikf zee geef loh.

Neeh veeif hee,

Ye-seef oouv liangv sikf toonv nguf geef loh gee tuangf geef loh gee inf inv booiv vooi,

geef loh ziuh hhoouf liangv sikf neeh gee goonv gua neeh veeif hee vooi.

18 Gua neeh veeif hee vooi,

haih ngeeih veeif geef loh yuh miaf div Ye-seef,

bov,

"Zu hauf loh haf!

Hauf loh seengv titf titf meef,

ngoonf fiakf hauf loh gee yungh inv vooi,

nguf hauf loh gee tuangf hauf loh gee ya toonv sev meef inv vooi,

meef dekf hauf loh en teeif nah teengh huf mee hemv veen niaf gee toof too,

gai gee duf meenf lai vooi.

19 Hhuf meef meenf ngah biang hauf loh yiak daiv yoou dau na meef,

biang veen niaf hauf loh gee leemf yoou dau na meef.

Hhuf meef oouv liangv sikf miaf toonv hauf loh hemv veen niaf hauf loh gee,

hauf loh sinf nginh hemv Fav-lauh huk nof,

hooi geef huk veen niaf neeh gee.

Hhuf meef sev voonf zee hauf loh,

teenf heen hauf loh ziuh lai mingh yoou,

meenf daiv lai yiak vooi,

veen niaf neeh gee ya meenf leemf lai vooi."

20 Ye-seef ziuh hooi Fav-lauh vianv veen niaf Ai-gipf gee inf inv vooi,

eenv veeih lengv Ai-gipf gee daiv yiak meenf huh giauh ngiamv zungf vooi,

suanf Ai-gipf gee lengv hunf ziuh ing veen niaf toof too gee inf inv booiv vooi.

Teenf heen,

veen niaf neeh gee zung bin tingf Fav-lauh gee vooi.

21 Ye-seef biang suanf Ai-gipf gee bek ting bin tingf nof Fav-lauh gee vooi.

22 Nah teengh veen niaf gif see gee Ye-seef meenf vianv,

eenv veeih Fav-lauh fat ngoonf fiakf zee geef loh,

geef loh lai ngoonf fiakf neeh gee goonv,

ziuh meenf ing veen niaf geef loh gee.

23 Ye-seef hemv bek ting gee gang bov,

"Meef loh dekf!

Veenf nooih hauf hooi Fav-lauh vianv meef loh hemv vianv veen niaf meef loh gee vooi.

En teeif hauf sev voonf zee meef loh,

meef loh leengv booiv sav lo.

24 Doongv suv gee tif hoouh,

meef loh hheem gauv nga feenv zee it zee Fav-lauh,

teengh longf gee sev meef loh huk voonf hemv sev meef loh hemv gav lanf meef loh gee gangf leekf nook meef loh gee goonv."

25 Bek ting gee bov,

"Zu hauf loh haf!

Meef go mingh hauf loh vooi,

meef doi hauf loh teenf maif,

hauf loh sinf nginh hemv Fav-lauh huk nof."

26 Ye-seef ziuh hooi veen niaf Ai-gipf gee lipf gui dingf hiuf hee,

gui dingf neeh hiuf hee zi doongv veenf nooih enf lai hiauf yoou,

ziuh tih suanf Ai-gipf veen niaf gee siu yipf,

duf hheem gauv nga feenv zee it zee Fav-lauh,

nah teengh veen niaf gif see gee meenf guiv Fav-lauh.

27 Lengv hunf Yih-seef-liatf gee zih yoou Ai-gipf gee lengv Gee-san neeh hhootf hee.

Geef loh yoou ninh lai saiv sanh dunf hee,

ya siv leekf siv lanv siv meenf huh giauh liauh vooi.

28 Yav-gookf zih yoou lengv Ai-gipf gee teepf sit veeif,

geef neeh tooi hee goonv it bek tee teepf sit tui.

29 Yih-seef-liatf dif hhooiv daiv vooi,

geef ziuh yam leekf da hhiangh geef huf hee Ye-seef miaf,

zuk geef bov,

"Meef zeekf vook hhoonv hauf,

ziuh biang moof longf dauf vaf hauf vooi hemv hauf fat tooih,

meef itf dingf dookf hauf meenf tuat hauf,

itf dingf meenf bok hauf yoou Ai-gipf.

30 Hauf daiv hoouh looif,

meef hheem hav hauf uk Ai-gipf vooi,

bok hauf yoou lengv bok gungv bef hauf neeh hhootf hee."

Ye-seef bov,

"Hauf itf dingf ziuf go meef gee booiv huk."

31 Yav-gookf bov,

"Meef hheem hemv hauf fat tooih."

Ye-seef ziuh hemv geef fat tooih vooi,

Yih-seef-liatf ziuh yoou baiv hau tangf gingf baif Siangf-dif.