4 Ngai Yav-gookf gee neeh duanf tif ganv gua vooi,

Ye-seef ziuh hemv lengv hunf yoou da voongv gung Fav-lauh neeh gee gang bov,

"Meef loh zeekf vook hhoonv hauf,

ziuh hooi hauf seengv Fav-lauh bov,

5 'Bef lai hauf yam hauf fat tooih,

geef bov,

"Meef dekf!

Hauf dif hhooiv daiv vooi,

meef hheem oouv hauf leengv lengv Gia-noomv gee,

bok yoou da feenf hauf hooi toof too zunh bif neeh mee."

En teeif hhuf meef sev hauf geen booiv bok bef lai hauf huf hee,

bok maif hauf ziuh leengv.'"

6 Fav-lauh bov,

"Meef geen booiv lo,

ziuf bef lai meef yam meef fat tooih gee booiv bok geef lo!"

7 Ye-seef ziuh geen booiv bok bef lai geef huf hee.

Suanv buf hak nyoo Fav-lauh gee hemv suanv buf hak yoou da voongv gung neeh gee gangf hak suanf Ai-gipf gee zung di moh geef booiv.

8 Ya lai Ye-seef suanf lanf hemv engv tok geef gee gangf gav lanf bef lai geef gee lengv hunf zung hemf moh geef booiv.

Nah teengh leekf nook geef loh gee hemv nguf geef loh gee tuangf geef loh gee luf yoou lengv Gee-san gee.

9 Ya lai siav maqf gee hemv leekf bingv hheeih maqf gee hemf moh Ye-seef geen booiv,

lengv hunf di moh Ye-seef booiv neeh gee meenf huh giauh liauh.

10 Geef loh miaf doongv ningf Ye-danf-hoov,

yoou siangv mookf Yav-tav neeh hhootf hee,

ziuh yoou ninh ngai oo oo teenf heen.

Ye-seef foou hiauf bef lai geef sit veenf.

11 Dang dif gee Gia-noomv lengv hunf dekf huh teenf liauh lengv hunf yoou siangv mookf Yav-tav neeh hhootf hee hong zang,

ziuh bov,

"Lengv hunf Ai-gipf gee hong zang neeh mee meenf huh giauh nyoo."

Guf seeh lengv neeh hhootf hee yam Yav-bov-maif-si^a hee,

lengv neeh hhootf hee yoou Ye-danf-hoov gee dongv neeh fiangf hee.

12 Leekf da hhiangh Yav-gookf hoouf hee ziuh ziuf bef lai gang gee booiv huk vooi,

13 geef loh hav tiv bef lai mee leengv lengv Gia-noomv gee vooi,

bok yoou da soongh veen Maif-bih-la neeh mee.

Soongh neeh mee hemv veen neeh hhootf hee yoou ningf Manf-lif,

tih Yav-bov-la-hanf hemv lengv hunf Hheef gee Yih-fov-lonv vianv miaf huk makf feenf gee.

14 Ye-seef bok bef lai geef hoouh looif,

ziuh hemv engv tok geef hoouf hee gangf too lai di moh geef geen miaf bok bef lai geef neeh gee zung leengv Ai-gipf vooi.

15 Gof Ye-seef hoouf hee huh bef lai daiv vooi,

ziuh bov,

"I sook Ye-seef enf zookf doouf loh yoou,

mangf geef dif boouf fukf doouf loh,

zing gua na doouf loh huk too lai gee seeu teeh doi geef teenf heen."

16 Geef loh ziuh faif lengv hunf booiv div Ye-seef bov,

"Bef lai meef dif daiv gee tif hoouh,

zuk bov,

17 'Meef loh hheem hemv Ye-seef teenf gang:

Gua na gof meef gee doi meef teenf ook,

hhuf meef yuanv liangf geef loh huk gee seeu teeh hemv soih geef loh gee.

' Hauf loh tih meef bef lai gingf baif gee Siangf-dif gee leekf nof,

en teeif hhuf meef yuanv liangf soih hauf loh gee."

Ye-seef hingf heekf go neeh gee ziuh ngai vooi.

18 Gof geef hoouf hee ya sin zeef miaf hhuih hhupf yoou dau na geef,

bov,

"Meef dekf,

hauf loh tih leekf nof meef gee."

19 Ye-seef bov geef loh bov,

"Meef loh meenf ngah mangf,

hauf dif ding lai Siangf-dif haf?

20 "Gua na meef loh gee if see tih dif tiang haih hauf,

"danf tih Siangf-dif gee if see tih maif gee,

tih dif go mingh haih liauh lengv hunf,

zing goh meef loh veenf nooih dekf huh gee teenf heen.

21 Too yi meef loh meenf ngah mangf,

hauf itf dingf tiangh meef loh hemv leekf meef loh gee."

Ye-seef ziuh laif laih gang go an uif geef loh,

yam geef loh biang timv.

22 Ye-seef hemv lengv hunf gav lanf bef lai geef gee zung zih yoou Ai-gipf.

Ye-seef goonv doongv it bek it teepf tui.

23 Geef huh dav leekf lanv Yih-fav-lianv haih tamv tooi gee.

Geef ya oouv leekf lanv Mav-nav-si gee,

ziuh tih leekf da hhiangh Mav-ziv gee guiv leengv nooiv geef mee huk leekf da hhiangh geef gee vooi.

24 Lai veenf hee,

Ye-seef hemv engv tok geef hoouf hee gang bov,

"Hauf dif daiv vooi,

danf tih Siangf-dif itf dingf boongv tooh meef loh,

yin meef loh uk lengv neeh hhootf hee,

geen doongv lengv geef fat tooih eef sev Yav-bov-la-hanf,

Yih-sav,

Yav-gookf neeh hhootf hee."

25 Ye-seef yuh yam leekf lanv Yih-seef-liatf gee fat tooih,

geef bov,

"Siangf-dif itf dingf boongv tooh meef loh,

geef yin meef loh uk lengv neeh hhootf gee tif hoouh,

meef loh hheem yif uaqf hauf gee lokf nooih di moh geen booiv."

26 Ye-seef daiv vooi,

geef goonv doongv it bek it teepf tui.

Lengv hunf oouv hiang liauf miaf sungv tiv geef mee,

biang tiv geef mee loouh da guanv saif vooi,

ziamf siv biang yoou Ai-gipf.