Siangf-dif sev Mov-si dekf huh
3
1 Neeh tif hoouh, Mov-si hooi daf dah geef huf hee Yef-teef-lov tiangh tuangf. Lai fooif hee, geef voouf tuangf gee booiv da loouh, doongv ningf tiah Siangf-dif mee vooi, ziuh tih Heev-liatf-san. 2 Ye-hheev-huav gee sih zeh yoou da veeif ngupf unv gee sev Mov-si dekf huh. Mov-si dekf huh unv gee bif veeif ngupf, danf tih meenf ngupf faih. 3 Mov-si bov, "Hauf dif booiv fiangf ninh dekf ziu, unv gee veeih gai ngupf meenf faih."4 Ye-hheev-huav huh geef dif gua booiv dekf, ziuh lokf da unv yam geef bov, "Mov-si, Mov-si."
Mov-si tanv bov, "Hauf yoou nooih."
5 Ye-hheev-huav bov, "Meenf ngah gua miaf. Geq haif meef deei hee longf miaf, eenv veeih lengv meef nyunv-nyunv neeh hhootf hee tih lengv seenv seengf hhootf hee." 6 Yuh bov, "Hauf tih meef bef lai gee Siangf-dif, Yav-bov-la-hanf gee Siangf-dif, Yih-sav gee Siangf-dif, Yav-gookf gee Siangf-dif." Mov-si mangf huh Siangf-dif, ziuh lumf na mee loouh vooi.
7 Ye-hheev-huav bov, "Hauf titf-titf dekf huh, bek tingf hauf gee yoou Ai-gipf tuh gee hho vooi; hauf ya hingf huh geef-loh zangf vooi, geef-loh eenv veeih guanh gongv gee ap geef-loh yam geef-loh huk hho, geef-loh ziuh zangf; hauf huh geef-loh gee hho so nanf vif vooi. 8 Too yi hauf longf miaf, dif go geef-loh luat moof lengv-hunf Ai-gipf gee, yin geef-loh luat lengv neeh hhootf hee, doongv lengv luangf-luang hhuatf-hhuat gee vooi, doongv lengv hhianf-hhianh luangf-luang gee, ziuh tih doongv lengv lengv-hunf Gia-noomv gee, lengv-hunf Hheef gee, lengv-hunf Yaf-mov-lif gee, lengv-hunf Bih-lif-sih gee, lengv-hunf Si-vuif gee, lengv-hunf Ye-buf-si gee. 9 En teeif, dekf lo, hauf hing huh lengv-hunf Yih-seef-liatf gee zangf, hauf ya dekf huh lengv-hunf Ai-gipf gee ap geef-loh huk hho vooi. 10 Too yi en teeif meef miaf, hauf dif faif meef booiv ningf Ai-gipf voongf dooi neeh hhootf hee, lokf Ai-gipf yin bek ting hauf gee uk miaf."
11 Mov-si hemv Siangf-dif gang bov, "Hauf tih naf nee, di leeuf booiv lai doongv ningf voongf dooi, lokf Ai-gipf yin lengv-hunf Yih-seef-liatf gee uk miaf nif?"
12 Siangf-dif bov, "Hauf itf dingf hemv meef yoou ningf goonf, meef yin bek ting gee lokf Ai-gipf uk miaf hoouh looif, meef-loh dif yoou baiv tiah neeh mee fokf teeh hauf, neeh gee ziuh tih hauf faif meef booiv gee zingf gif."
13 Mov-si hemv Siangf-dif gang bov, "Hauf doongv ningf lengv-hunf Yih-seef-liatf neeh hhootf hee, hemv geef-loh gang bov, 'Zuh zung meef-loh gee Siangf-dif faif hauf doongv ningf meef-loh, ' geef-loh itf dingf tooi hauf bov, 'Geef yam gai nooiv hee?' Hauf dif leeuf tanv geef-loh nif?"
14 Siangf-dif tanv Mov-si bov, "Hauf tih 'Toof-too lai yungh yuanh lai gee.'" Yuh bov, "Meef hheem teenf hee hemv lengv-hunf Yih-seef-liatf gee gang bov, 'Neef toof-too lai gee neeh huf hee faif hauf doongv ningf meef-loh neeh hhootf hee.'"
15 Siangf-dif yuh hemv Mov-si gang bov, "Meef hheem teenf hee hemv lengv-hunf Yih-seef-liatf gee gang bov, 'Ye-hheev-huav tih zuh zung meef-loh gee Siangf-dif, ziuh tih Yav-bov-la-hanf, Yih-sav, Yav-gookf gee Siangf-dif, geef faif hauf doongv ningf meef-loh neeh hhootf hee.' Ye-hheev-huav tih nooiv hauf mee, zi doongv yungh-yungh yuanh-yuanh, tooi-tooi siuf-siuf gee lengv-hunf zung dif teenf hee yam hauf.
16 Meef booiv yam Yih-seef-liatf gee ziangh lauh zipf zung yoou ningf goonf vooi, hemv geef-loh gang bov, 'Ye-hheev-huav zuh zung meef-loh gee Siangf-dif, ziuh tih Yav-bov-la-hanf, Yih-sav, Yav-gookf gee Siangf-dif, sev hauf dekf huh geef, geef hemv hauf gang bov, hauf titf-titf gov meef-loh, huh lengv-hunf Ai-gipf gee tih di leeuf doi meef-loh gee. 17 Hauf bov gua, meef-loh yoou Ai-gipf tuh nanf vif, hauf dif yin meef-loh lokf ninh uk miaf, doongv lengv lengv-hunf Gia-noomv gee, lengv-hunf Hheef gee, lengv-hunf Yaf-mov-lif gee, lengv-hunf Bih-lif-sih gee, lengv-hunf Si-vuif gee, lengv-hunf Ye-buf-si gee. Ziuh tih doongv lengv hhianf-hhianh luangf-luang gee.'
18 Geef-loh itf dingf hingf go meef. Meef hemv Yih-seef-liatf gee ziangh lauh hheem booiv ningf Ai-gipf voongf dooi neeh hhootf hee, hemv geef gang bov, 'Ye-hheev-huav --- Si-bov-laiv lengv-hunf gee Siangf-dif, sev hauf-loh dekf huh geef, en teeif hhuf meef sev hauf-loh booiv tamv veenf, doongv da loouh, hianf goouh sev hauf-loh gee Siangf-dif.' 19 Hauf huh, zeekf hauf meenf yungh moof daf neengv gee bik geef, Ai-gipf voongf dooi tih meenf hhoo neengf sev meef-loh booiv gee. 20 Eenv veeih teenf hee, hauf dif nyof moof hauf gee uk miaf, yoou Ai-gipf huk hauf dif huk gee itf siatf hhiv miauf gee teeh, gung gikf lengv neeh hhootf hee, seeif looif geef nah sev meef-loh booiv.
21 Hauf itf dingf biang lengv-hunf Ai-gipf gee vook lai uif meef-loh, teenf hee meef-loh booiv gee tif hoouh ziuh meenf hooi moof leeif-leeiv booiv vooi. 22 Mui na maih leekf itf dingf yam ningf lanf gee, gangf yam maih leekf ziamf siv zih yoou lanf geef neeh gee oouv goouh, oouv goouh oouv gimv oouv ngoonf miaf huk neeh gee hemv oouv hho yua, sev leekf ngif toof-too gee dingv. Teenf hee, meef-loh ziuh geep lengv-hunf Ai-gipf gee saiv sanh booiv vooi."