2 Siangf-dif seengv Mov-si bov, "Hauf tih Ye-hheev-huav. 3 Gua na hauf sev Yav-bov-la-hanf, Yih-sav hemv Yav-gookf dekf huh hauf, geef-loh huh hauf tih suanv neengv gee Siangf-dif, danf tih nooiv hauf mee yam Ye-hheev-huav, geef-loh tih meenf took gee. 4 Hauf meenf danv hemv geef-loh lipf ye, dif oouv lengv Gia-noomv gee, ziuh tih dif oouv lengv geef-loh ziamf siv zih neeh hhootf hee sev zee geef-loh. 5 Hauf ya hingf heekf lengv-hunf Yih-seef-liatf gee hooi lengv-hunf Ai-gipf gee huk nof zangf, hauf ziuh oov heekf hauf gee ye.

6 Guf seeh, meef hheem seengv lengv-hunf Yih-seef-liatf gee bov, 'Hauf tih Ye-hheev-huav, hauf dif oouv hauf gee daf neengv miaf hhoonf-hhoonv hingv fapf Ai-gipf, go meef-loh luat lengv-hunf Ai-gipf gav zee meef-loh gee gongv hho, meenf zaif hooi geef-loh huk nof. 7 Hauf dif oouv meef-loh huk bek ting hauf gee, hauf ya dif huk meef-loh gee Siangf-dif. Meef-loh hheem huh hauf tih Ye-hheev-huav meef-loh gee Siangf-dif, tih go meef-loh luat lengv-hunf Ai-gipf gee gongv hho gee neeh huf hee. 8 Lengv hauf doongf moof fat tooih eef dif sev Yav-bov-la-hanf, Yih-sav hemv Yav-gookf gee neeh hhootf hee, hauf itf dingf dif yin meef-loh loouh booiv, oouv lengv neeh hhootf hee sev zee meef-loh huk goonv. Hauf tih Ye-hheev-huav.'"

9 Mov-si ziuh seengv go neeh gee zee lengv-hunf Yih-seef-liatf gee, danf tih geef-loh eenv veeih huk gongv gee hho hemv timv gee nyung nyang, ziuh meenf hheeng hingf go Mov-si gee.

10 Ye-hheev-huav yam Mov-si bov, 11 "Meef booiv seengv Ai-gipf voongf dooi, yam geef sev lengv-hunf Yih-seef-liatf gee luat lengv geef gee."

12 Mov-si yoou dau na Ye-hheev-huav bov, "Noh, lengv-hunf Yih-seef-liatf gee duf meenf hheeng hingf go hauf gee, Ai-gipf voongf dooi di leeuf hheeng hingf go hauf gee nif? Hauf tih lengv-hunf bak ngeenf bak ngoong huf hee."

13 Ye-hheev-huav zuk Mov-si hemv Yav-lunv, mingf lingf geef-loh booiv ningf lengv-hunf Yih-seef-liatf gee hemv booiv ningf Ai-gipf voongf dooi vooi, yin lengv-hunf Yih-seef-liatf gee lokf lengv Ai-gipf gee uk miaf.

14 Yih-seef-liatf gookf mooqf gia zukf gee zukf ziangh gee nooiv gif yoou dau ninh:

Yih-seef-liatf leekf da hhiangh neef nyoo huf hee Liuv-bianf gee leekf da hhiangh tih Hha-noqf, Fav-luf, Si-si-lunv, Zia-miv, neeh tih Liuv-bianf gee gookf mooqf gia zukf.

15 Si-mianf gee leekf da hhianh tih Ye-muh-lif, Yav-mianv, A-siav, Yav-zin, Sov-siav, Soouh-lov, Soouh-lov tih leemf leekf Gia-noomv lai gee, neeh tih Si-mianf gee gookf mooqf gia zukf.

16 Leekf da hhiangh Lif-vuif gee gookf mooqf gia zukf anf geef-loh gee sunf sif gif nooiv yoou dauf ninh: Geev-sunf, Gee-siav, Miv-la-lif. Lif-vuif goonv it bek tamv teepf sit tui.

17 Geev-sunf gee leekf da hhiangh gee gia zukf anf sunf sif tih: Lif-niv, Sif-meeiv.

18 Gee-siav gee leekf da hhiangh tih Anf-lanv, Yih-si-hha, Si-bov-lunv, U-se. Gee-siav goonv it bek tamv teepf tamv tui.

19 Miv-la-lif gee leekf da hhiangh tih Mof-lif hemv Muv-sif. Neeh gee tih Lif-vuif neeh ziv hee gee gia zukf.

20 Anf-lanv oouv maih gov geef huf hee Ye-zi-bev huk maih geef huf hee, Ye-zi-bev hooi geef lai Yav-lunv hemv Mov-si. Anf-lanv goonv it bek tamv teepf sit tui.

21 Yih-si-hha gee leekf da hhiangh tih Hheev-la, Niv-Feeiv, Sif-zi-lif.

22 U-se gee leekf da hhiangh tih Miv-sa-lif, Yih-lif-sa-fanh, Si-tiv-lif.

23 Yav-lunv oouv leemf leekf Yav-miv-nav-tav huf hee, gov Nav-sunf huf hee Yih-lif-sa-ba huk maih geef huf hee, Yih-lif-sa-ba hooi geef lai Nav-tav, Yav-bih-huf, Yih-lif-yav-sa, Yih-ta-mah.

24 Hheev-la gee leekf da hhiangh tih Yav-si, Yih-lif-zia-nav, Yav-biv-yav-sav; neeh gee tih Hheev-la gee gookf mooqf gia zukf.

25 Yav-lunv gee leekf da hhiangh Yih-lif-yav-sa oouv leemf leekf Fuv-tev huf hee huk maih geef huf hee; maih geef huf hee hooi geef lai Feei-niv-hha.

Neeh gee tih Lif-vuif lengv-hunf gookf mooqf gia zukf gee zukf ziangh.

26 Ye-hheev-huav gang bov, "Meef-loh hheem ziuf geef-loh gee gun deeif, yin lengv-hunf Yih-seef-liatf gee lokf Ai-gipf uk miaf." Ziuh tih hemv Yav-lunv hemv Mov-si gang gee, 27 hemv Ai-gipf voongf dooi gang bov dif yin lengv-hunf Yih-seef-liatf gee lokf Ai-gipf uk miaf gee, ya tih Mov-si hemv Yav-lunv.

28 Ye-hheev-huav yoou Ai-gipf hemv Mov-si gang go gee tif hoouh, 29 Ye-hheev-huav seengv Mov-si bov, "Hauf tih Ye-hheev-huav, hauf hemv meef gang gee go, meef hheem seengv inf-inv zee Ai-gipf voongf dooi." 30 Mov-si yoou dau na Ye-hheev-huav tanv bov, "Meef dekf, hauf tih lengv-hunf bak ngeenf bak ngoong huf hee, Ai-gipf voongf dooi di leeuf hheeng hingf go hauf gee nif?"