"Hauf-loh dif siang goov ngenv Ye-hheev-huav,

eenv veeih geef bif doongf hangf-hangv uif,

oouv maqf gee hemv neef hheeih maqf gee

fengf longf dauf hai vooi.

2 Ye-hheev-huav tih hauf gee likf liangh, tih goov hauf hiuf hee,

geef ya tingf go hauf gee neeh huf vooi.

Geef tih hauf gee Siangf-dif, hauf dif ngenv geef,

geef tih hauf bef lai gee Siangf-dif, hauf dif zun zungf geef gingf baif geef.

3 Ye-hheev-huav tih zanf seef;

Ye-hheev-huav tih nooiv geef mee.

4 Siav Ai-gipf voongf dooi gee, bingv Ai-gipf voongf dooi gee,

Ye-hheev-huav duf ga gengf longf dauf hai vooi,

Ai-gipf voongf dooi hokf i liakf gee gun ziangh

zung lak longf hongv haih vooi.

5 Namh lakf-lakf mutf gua hau geef-loh vooi,

geef-loh zing dinf teenf hee lak longf dauf dooi hai vooi.

6 Ye-hheev-huav haf, moof maif meef fiangf hee

meenf huh giauh lai neengv likf hemv yungv yauf;

Ye-hheev-huav haf, moof maif meef fiangf hee

fau dikf yinv zupf vooi.

7 Meef yungh meenf huh giauh nyoo gee ui yungv,

sen lengv-hunf uif miaf gung gikf meef neeh gee booiv vooi;

meef yianf hhif meenf huh giauh nyoo,

miatf geef-loh zing veeif lut zaf mumh teenf hee.

8 Soongh loongv meef mee voouh hheei,

namh gee ziuh leengv ningf goonf tingf zopf vooi,

namh gee ziuh hepf doongf-doongf zing hhoom baf gee teenf hee.

Namh yoou da hai lakf-lakf neeh gee giat lootf-lootf yoou daf-da hai.

9 Dikf yinv gee bov,

'Hauf dif hum geef-loh, hauf dif hum di moh geef-loh,

hauf dif geep goouh geef-loh gee miaf feenv,

hauf dif yoou baiv huf geef-loh biang timv hauf mee deekf doongv moonh zukf;

hauf dif yitf mitf uk miaf,

sin zeef miatf geef-loh booiv.'

10 Meef yam van it siau,

namh hai ziuh mutf geef-loh booiv vooi,

geef-loh ziuh zing tik mooh teenf hee lak yoou da namh nyoo.

11 Ye-hheev-huav haf,

yoou da tinf gee, lai naf nee zing meef teenf hee nif?

Lai naf nee zing meef teenf hee yungv yauf seengf giatf,

gaiv lai ngenv gaiv lai mangf,

huk hhiv guaif gee teeh nif?

12 Meef nyof moof maif uk miaf,

matf ziuh lop geef-loh booiv vooi.

13 Meef yungh dookf hungh

yin bek ting meef tukf neeh gee;

yungh neengv likf meef gee

yin geef-loh doongv meef gee seengf sooh vooi.

14 Too lai gee lengv-hunf hingf huh ziuh nyan vooi;

lengv-hunf Feei-lif-sif gee mangf goouv vooi.

15 Neeh tif hoouh,

Yih-dung gee zukf ziangh mangf heu,

Mov-yaf gee ing hungv mangf nyan vooi,

too lai zih yoou Gia-noomv gee lengv-hunf zung mangf looiv deet vooi.

16 Mangf nyan miaf doongv baiv huf geef-loh,

Ye-hheev-huav haf, eenv veeih meef daf neengv gee hhan moof,

geef-loh zing dinf teenf hee onf-on meenf noov,

foou zi doongv bek ting meef gee gua booiv,

foou zi doongv bek ting meef tukf neeh gee gua booiv.

17 Meef dif yin bek ting meef gee loouh booiv,

sav yoou baiv tiah meef mee,

Ye-hheev-huav haf,

ziuh tih yoou lengv meef yif bif zee toof-too zih neeh hhootf hee,

Zu haf,

ziuh tih yoou moof meef deei hee huk gee seengf sooh.

18 Ye-hheev-huav itf dingf huk voongf,

zi doongv yungh-yungh yuanh-yuanh."

19 Maqf Ai-gipf voongf dooi gee, hemv siav geef gee gangf hhiv bing geef gee longf doongv da hai gee tif hoouh, Ye-hheev-huav biang namh hai gee leeiv dau leen leengv miaf mutf gua hau geef-loh vooi; danf tih lengv-hunf Yih-seef-liatf gee yoou da hai booiv lengv liang. 20 Booi Yav-lunv huf hee Miv-lif-anf tih nih sian zi huf hee, geef nganv leekf longv mee, too lai gee maih leekf zung di moh geef uk booiv, hhauv longv hiauf moou. 21 Miv-lif-anf tanv geef-loh bov,

"Meef-loh hheem siang goov ngenv Ye-hheev-huav,

eenv veeih geef bif doongf hangf-hangv uif,

oouv maqf gee hemv neef hheeih maqf gee

fengf longf dauf hai vooi. "

22 Mov-si yin lengv-hunf Yih-seef-liatf gee lokf hongv haih booiv, booiv doongv da loouh Su-eev gee, geef-loh yoou da loouh booiv tamv veenf vooi, meenf div lai heekf namh. 23 Seeif looif, geef-loh doongv Mav-la vooi, namh Mav-la gee gamf meenf goonv lai, eenv veeih namh yoou ninh gee gamf, guf seeh lengv neeh hhootf hee yam Mav-la hee. 24 Bek ting gee ziuh in Mov-si bov, "Hauf-loh goonv gai gee nooh?"

25 Mov-si ziuh hhuf Ye-hheev-huav, Ye-hheev-huav ziuh nyi dun dun hee zee geef; geef gengf dun dun hee loouh da namh vooi, namh gee ziuh en vooi. Ye-hheev-huav yoou ninh hooi geef-loh lipf mingf lingf hemv gui dingf, ya yoou ninh au geef-loh. 26 Ye-hheev-huav bov, "Zeekf meef yungh timv hingf sa Ye-hheev-huav---meef gee Siangf-dif, hengf hauf dekf tih gung zingf gee teeh, zuf if hingf sav hauf gee mingf lingf, zun siuh hauf itf siatf gee gui dingf; hauf ziuh meenf oouv fingh gav yoou baiv huf lengv-hunf Ai-gipf neeh gee gav yoou baiv huf meef, eenv veeih hauf tih yiav meef gee Ye-hheev-huav."

27 Seeif looif, geef-loh doongv Yih-linv vooi, yoou ninh lai teepf ngeeih mooqf namh maf dof, sit teepf dun zung suf, geef-loh ziuh zap zih yoou ningf namh.