Dinf danv uk namh
17
1 Suanf Yih-seef-liatf gee bek ting zung ziuf Ye-hheev-huav zuk Mov-si gee booiv huk, lokf Sunf gee da loouh di mooqf tam di mooqf tam teenf hee yif. Geef-loh doongv Lif-feei-dingf vooi ziuh zap zih yoou ninh, danf tih bek ting gee meenf lai namh goonv. 2 Bek ding gee ziuh hemv Mov-si zengv goonf, bov, "Sev namh zee hauf-loh goonv."Mov-si hemv geef-loh gang bov, "Meef-loh veeih gai hemv hauf zengv goonf nif? Veeih gai tee Ye-hheev-huav nif?"
3 Bek ding gee yoou ninh hhuat namh dif goonv namh, ziuh in Mov-si bov, "Meef veeih gai dif yin hauf-loh lokf Ai-gipf uk miaf, biang hauf-loh hemv suk tengv hauf-loh gee zung hhuat namh daiv nif?"
4 Mov-si hhuf Ye-hheev-huav bov, "Hauf dif di leeuf doi bek ding neeh gee nif? Geef-loh dif hhooiv oouv dinf zakf hauf daiv vooi."
5 Ye-hheev-huav hemv Mov-si gang bov, "Meef nganv heengh zuq gua na git namh to Niv-lov-hheev neeh hiuf hee, yin Yih-seef-liatf gee gi huf ziangh lauh booiv yoou na bek ting gee. 6 Noh, hauf dif yoou Hheev-liatf san gee dinf danv neeh hhootf hee, nyunv yoou dau na meef. Meef dif git dinf danv mee, namh ziuh dif leeiv lokf dinf danv mee uk miaf, sev bek ting gee goonv." Mov-si ziuh yoou dau na ziangh lauh Yih-seef-liatf gee teenf huk vooi. 7 Geef hhooiv lengv neeh hhootf hee yam Mah-sa hee, ya yam Miv-lif-ba hee, eenv veeih lengv-hunf Yih-seef-liatf gee yoou ninh zengv goonf, ya tee Ye-hheev-huav, bov, "Ye-hheev-huav tih meenf tih yoou da doouf-loh nif?"
Hemv lengv-hunf Yaf-mah-lif gee git sinh
8 Neeh tif hoouh, lengv-hunf Yaf-mah-lif gee miaf vooi, yoou Lif-feei-dingf hemv lengv-hunf Yih-seef-liatf gee git sinh. 9 Mov-si hemv Ye-su-yaf gang bov, "Meef hheem hooi doouf-loh liakf lengv-hunf uk miaf, uk booiv hemv lengv-hunf Yaf-mah-lif gee git sinh. Bak zeekf hauf dif nyunv yoou baiv deng tiah, nganv heengh zuq Siangf-dif hiuf hee yoou da moof."
10 Ye-su-yaf ziuh ziuf Mov-si gang gee booiv huk, booiv hemv lengv-hunf Yaf-mah-lif gee git sinh. Mov-si hemv Yav-lunv gangf Huf-eev zung geen baiv deng tiah vooi. 11 Mov-si gi tif doongf moof uif, lengv-hunf Yih-seef-liatf gee ziuh gi tif yingf; Mov-si gi tif biang moof deei longf, lengv-hunf Yaf-mah-lif gee ziuh yingf. 12 Danf tih moof Mov-si deei hee nuai teh vooi, geef-loh ziuh feh dinf mooqf hee miaf, biang yoou dauf Mov-si, Mov-si ziuh ngov geen baiv vooi. Yav-lunv hemv Huf-eev, di na nyunv di fiangf, tooh moof Mov-si voon fiangf loouh, zi doongv da veenf dok. 13 Ye-su-yaf oouv mitf git lengv-hunf Yaf-mah-lif gee hemv bek ting geef gee tuv vooi.
14 Ye-hheev-huav hemv Mov-si gang bov, "Meef hheem oouv teeh neeh gee gif lukf yoou baiv fuh huk gif niamf, ya hheem seengv zee Ye-su-yaf bov hauf dif lokf suanf bak matf seef nooiv Yaf-mah-lif mee booiv." 15 Mov-si huk gif hanv mee, hhooiv nooiv mee yam "Ye-hheev-huav niv sia" hee. 16 Geef bov, "Hauf nyi henh Ye-hheev-huav mee fat tooih, Ye-hheev-huav itf dingf tooi-tooi siuf-siuf hemv lengv-hunf Yaf-mah-lif gee git sinh."