3 Mov-si geen tiah vooi, doongv ningf Siangf-dif neeh hhootf hee, Ye-hheev-huav lokf baiv tiah yam geef bov, "Meef hheem seengv leekf lanv Yav-gookf gee, ziuh tih lengv-hunf Yih-seef-liatf gee, bov, 4 'Hauf doi lengv-hunf Yih-seef-liatf huk gee teeh, meef-loh zung dekf huh vooi, hauf zing maih yiuh huf hee teenf hee iaq meef-loh geen baiv bik vooi, dai doongv ningf hauf neeh hhootf hee. 5 En teeif meef-loh zeekf titf-titf hingf go hauf, zun siuh ye hauf gee, ziuh itf dingf yoou da tooi ganv gee lengv-hunf huk bek ting hauf gee, eenv veeih suanf lengv zung tih hauf gee. 6 Meef-loh hheem guiv zee hauf huk voongf dooi gee gif see hemv seengf giatf gee gukf duf.' Go neeh gee meef hheem seengv zee lengv-hunf Yih-seef-liatf gee."

7 Mov-si booiv yam bek ting gee ziangh lauh miaf, oouv go Ye-hheev-huav zuk geef neeh gee doi na hemv goonf seengv zee geef-loh. 8 Bek ting gee zung hemv goonf tanv bov, "Too lai Ye-hheev-huav zuk gee, hauf-loh itf dingf zun siuh." Mov-si ziuh booiv seengv go bek ting gee zee Ye-hheev-huav.

9 Ye-hheev-huav hemv Mov-si gang bov, "Hauf dif yoou da bah naf-nav gee miaf doongv ningf meef, biang bek ting gee yoou hauf hemv meef gang go gee tif hoouh hhoo yi hingf huh, geef-loh ziuh yungh yuanh siang sinf meef vooi." Mov-si ziuh booiv seengv go bek ting gee zee Ye-hheev-huav.

10 Ye-hheev-huav hemv Mov-si gang bov, "Meef doongv ningf bek ting gee, yam geef-loh veenf nooih bak zeekf hianf toof-too sev Siangf-dif, ya hheem dakf hho yua gee." 11 Haih tamv veenf hheem yif bif maif, eenv veeih Ye-hheev-huav haih tamv veenf dif yoou dau na bek ting gee miaf doongv baiv tiah Si-naiv-san mee. 12 Meef hheem yoou ningf tiah huah gai gee maif-maif loouh, seengv bek ting gee bov, 'Meef-loh hheem nook timv, meenf zun geen baiv tiah, ya meenf zun gamf gok tiah mee. Neef gamf tiah neeh mee gee, itf dingf bif huk daiv. 13 Meenf zun oouv moof gamf geef, hheem oouv dinf zakf geef daiv, ha tih oouv loomh nyoof geef daiv; meenf guan tih lengv-hunf ha tih suk tengv zung meenf zun teengh yoou vooi.' Doongv sauv hooh mee hav looiv gee tif hoouh, geef-loh nah hhoo yi geen tiah.

14 Mov-si longf tiah booiv ningf bek ting neeh hhootf hee, yam geef-loh hianf toof-too sev Siangf-dif, geef-loh ziuh dakf hho yua toof-too gee bang vooi. 15 Mov-si seengv bek ting gee bov, "Haih tamv veenf, meef-loh hheem yif bif maif; meenf zun hemv maih leekf gee lap suanv."

16 Doongv haih tamv veenf zauf-zau, baiv tiah lai gungv loif hoon, dianf liap hemv bah gee naf-nav, yuh lai sauv hooh mee meenf huh giauh look, tee yoou da iah gee bek ting mangf nyan vooi. 17 Mov-si yin bek ting gee uk iah doong Siangf-dif, geef-loh zung nyunv yoou gok tiah. 18 Suanf tiah Si-naiv-san mee zung guanf duaih, eenv veeih Ye-hheev-huav yoou da veeif miaf doongv baiv tiah. Duaih baiv tiah gee guanf geen booiv, zing goh duaih ngupf yiuf gee teenf hee, tiah mee inf-inv zung ngoouf yoongh vooi. 19 Neeh tif hoouh, sauv hooh mee mef miaf mef look, Mov-si gang go, Siangf-dif tanv geef, sauv mee zing gungv loif hoon teenf hee.

20 Ye-hheev-huav miaf doongv baiv tiah Si-naiv-san mee, Ye-hheev-huav ziau Mov-si geen baiv deng tiah, geef ziuh geen booiv vooi. 21 Ye-hheev-huav hemv Mov-si gang bov, "Meef longf booiv gingh goouf bek ting gee, meenf zun ong gua miaf, doongv ningf hauf neeh hhootf hee dekf, ha zinf yoou da geef-loh lai haih liauh lengv-hunf daiv. 22 Ya yam doongv dau na hauf gee gif see hheem hianf toof-too sev Siangf-dif, mangf Ye-hheev-huav it ziu uk miaf ga geef-loh daiv."

23 Mov-si hemv Ye-hheev-huav gang bov, "Bek ting gee meenf geen lai tiah Si-naiv-san mee, eenv veeih meef gingh goouf gua, bov, 'Hheem yoou ningf tiah gee huah gai loouh, oouv tiah mee hianf sev Ye-hheev-huav.'"

24 Ye-hheev-huav hemv geef gang bov, "Longf booiv lo, meef hheem hemv Yav-lunv hongf goonf geen miaf, danf tih gif see hemv bek ting gee meenf zun ong geen miaf doongv ningf Ye-hheev-huav neeh hhootf hee, ha zinf Ye-hheev-huav it ziu uk miaf ga geef-loh daiv."

25 Mov-si ziuh longf booiv doongv ningf bek ting gee seengv geef-loh.