7 Yav-lunv mui veenf zauf-zau suv tipf deei gee gee tif hoouh, hheem yoou baiv gif hanv mee lut hiangv oouv hiang liauf miaf huk neeh gee. 8 Veenf zoouf goomh Yav-lunv ziu deei gee tif hoouh, ya hheem lut hiangv neeh gee, hoouh looif meef-loh tooi-tooi siuf-siuf yoou dau na Ye-hheev-huav zung tih teenf huk. 9 Yoou baiv gif hanv neeh mee meenf zun lut hiangv gakf gee, meenf zun hianf fan gif, suf gif, ya meenf zun yoou baiv ninh hianf giuv yan gif. 10 Yav-lunv di veeif di fooif hheem yoou baiv gif hanv gee ti mooqf gook huk leei tukf soih mee, oouv baq goouh tukf soih neeh gee miaf betf geen baiv gook gif hanv hiauf-hiauh ti mooqf vooi. Meef-loh tooi-tooi siuf-siuf duf hheem teenf huk. Gif hanv neeh mee yoou dau na Ye-hheev-huav tih zuif seenv seengf gee."

11 Ye-hheev-huav zuk Mov-si bov, 12 "Meef tuan lengv-hunf Yih-seef-liatf gee gee tif hoouh, mui na bif tuan gee lengv-hunf duf hheem oouv tukf geef yinf mingh gee ga sinf hianf sev Ye-hheev-huav, ha zinf meef tuan gee tif hoouh, yoou da meef-loh lai daiv zooiv. 13 Mui na bif tuan gee lengv-hunf duf hheem ziuf seengf sooh gee biau zunh, gauv ngoonf fiakf sinf hee; ngoonf fiakf neeh sinf hee tih hianf sev Ye-hheev-huav gee lih veetf. 14 Mui na bif tuan gee lengv-hunf, ziuh tih lokf ngih teepf tui zi geen gee da hhiangh, duf hheem hianf lih veetf neeh feenh hee sev Ye-hheev-huav. 15 Neef lai gee meenf yungh gauv liauh, neef ngah gee ya meenf zun tiu geq, leeuf na duf hheem hianf ngoonf fiakf sinf hee sev Ye-hheev-huav, oouv miaf huk tukf meef-loh yinf mingh gee ga sinf. 16 Meef hheem lokf lengv-hunf Yih-seef-liatf gee suv ngoonf fiakf tukf mingh neeh gee, oouv miaf yungh yoou huif mukf, hhoo yi yoou dau na Ye-hheev-huav hooi lengv-hunf Yih-seef-liatf gee huk gif niamf, ya tukf yinf mingh meef-loh leengv."

17 Ye-hheev-huav zuk Mov-si bov, 18 "Meef hheem oouv hongf miaf huk funf tuk moof mee hemv huk goouh zav funf mee, oouv miaf tuk moof. Meef hheem oouv miaf biang yoou huif mukf hemv gif hanv gee zing da, ya hheem deengf namh loouh da funf mee vooi. 19 Yav-lunv hemv leekf da hhiangh geef gee hheem yoou da funf neeh mee tuk moof tuk gok. 20 Geef-loh loouh huif mukf gee tif hoouh, ha tih booiv ningf gif hanv gingf baif, hianf veeif gif sev Ye-hheev-huav gee tif hoouh, itf dingf hheem oouv namh miaf tuk moof tuk gok, ha zinf geef-loh daiv. 21 Geef-loh hheem tuk moof tuk gok, ha zinf geef-loh daiv, neeh tih Yav-lunv hemv leekf-leekf lanf-lanv geef gee tooi-tooi siuf-siuf yungh yuanh zun siuh gee gui dingf."

22 Ye-hheev-huav zuk Mov-si bov, 23 "Meef hheem oouv hiang liauf maif-maif gee, ziuh tih namh yiav mof yookf gee teepf ngeeih geenv, hiang yeeuf guif gee sok geenv, sang fuv gee sok geenv, 24 guif fiv gee teepf ngeeih geenv, duf hheem anf seengf sooh gee biau zunh, ya hheem oouv yuf gamh lamv gee bet geenv. 25 Meef hheem oouv goouh neeh gee miaf huk tingf seengf goou yeeuv, ziuh tih ziuf see fuf huk hiang goou gee foong fapf miaf huk tingf gee hiang goou, tih oouv miaf huk seengf goou yeeuv gee. 26 Meef hheem oouv goou yeeuv neeh gee miaf sitf huif mukf mee, sitf fapf guif mee, 27 sitf hooif ziangv hee hemv too lai goouh baiv hooif gee, sitf deeng haiv hemv goouh deeng haiv gee, sitf gif hanv lut hiangv mee, 28 sitf gif hanv hianf fan gif mee hemv too lai goouh baiv gif hanv gee, sitf funf tuk moof mee gangf sitf goouh zav funf mee. 29 Meef hheem biang goouh neeh gee bin tingf seengf giatf, bin tingf zuif seengf giatf; too lai gamf heekf goouh neeh gee gee duf bin tingf seengf giatf.

30 Meef ya hheem oouv yuf neeh gee miaf sitf Yav-lunv hemv leekf da hhiangh geef gee, oouv geef-loh feenv uk miaf, biang geef-loh bin tingf seengf giatf, huk gif see hauf gee. 31 Meef hheem seengv lengv-hunf Yih-seef-liatf gee, bov, 'Meef-loh hheem tooi-tooi siuf-siuf oouv yuf neeh gee guiv zee hauf, huk seengf goou yeeuv.' 32 Meenf zun oouv yuf neeh gee diakf geen baiv huf vanh vooi, ya meenf zun ziuf huk yuf neeh gee gee foong fapf huk hemv yuf neeh gee dif-di goonf gee. Goouh yeeuv neeh gee tih seengf giatf gee, meef-loh ya hheem dekf geef tih seengf giatf gee. 33 Meenf guan naf nee huk yuf hemv yuf neeh gee dif-di goonf gee, ha tih oouv yuf neeh gee diakf geen baiv huf vanh vooi gee, lengv-hunf neeh huf hee itf dingf hheem lokf da bak ting gee seef geef uk booiv.

34 Ye-hheev-huav zuk Mov-si bov, "Meef hheem oouv hiang liauf hiangf-hiangv gee miaf, ziuh tih oouv nav ta fov, si siv liatf, siv lif bih nav, hiang liauf neeh gee hemv yuv hiang zinf-zinv gee, leeuf zuangv duf hheem hhoonv hongf goonf." 35 Meef hheem gav nyau hemv loouh, ziuf huk hiang liauf gee foong fapf miaf huk, huk tingf yuh bang yuh seengf giatf gee hiangv. 36 Meef hheem oouv hiangv neeh gee ziqf hee miaf, namf boongf-boongh vooi, biang yoou da huif mukf gee na fapf guif neeh hhootf hee, ziuh tih lengv hauf hemv meef am goonf neeh hhootf hee. Meef-loh hheem dekf hiangv neeh gee tih zuif seengf giatf gee. 37 Meef-loh meenf zun ziuf huk hiangv neeh gee gee foong fapf miaf hooi toof-too huk hiangv; meef hheem dekf hiangv neeh gee tih seengf giatf gee, tih guiv sev Ye-hheev-huav gee. 38 Meenf guan naf nee veeih liauh dif hoomv heekf hheei hiangv ziuh huk hiangv hemv hiangv neeh gee dif-di goonf gee, lengv-hunf neeh huf hee ziuh itf dingf hheem lokf da bak ting gee seef geef booiv.