6 Oouv gif hanv hianf fan gif neeh mee biang yoou na bak deenh huif mukf gee ziangf mukf. 7 Biang funf tuk moof mee yoou huif mukf hemv gif hanv mee gee zing da neeh hhootf hee, deengf namh loouh da funf vooi. 8 Ya hheem yoou ziangf mukf gee ti minh lipf hoopf vif da bang neeh gee uif, ling hoopf lumf bak deenh da bang neeh hhootf hee loouh.

9 Meef hheem oouv goou yeeuv miaf sitf ziangf mukf hemv itf siatf goouh yoou da ziangf mukf neeh gee, biang ziangf mukf mee hemv itf siatf gee goouh zung bin tingf seengf giatf, ziuh suanv buf bin tingf seengf giatf vooi. 10 Ya hheem sitf gif hanv hianf fan gif mee hemv itf siatf goouh yoou baiv gif hanv neeh gee, biang gif hanv mee bin tingf seengf giatf, gif hanv mee ziuh bin tingf meenf huh giauh seengf giatf vooi. 11 Hheem sitf funf tuk moof mee hemv goouh zav funf mee, biang funf mee bin tingf seengf giatf.

12 Hheem yin Yav-lunv hemv leekf da hhiangh geef gee doongv bak deenh huif mukf vooi, oouv namh hooi geef-loh tuk huf. 13 Hheem hooi Yav-lunv dingv seengf i loouh, ya oouv goou yeeuv miaf sitf geef, biang geef bin tingf seengf giatf, huk fokf teeh hauf gee gif see. 14 Ya hheem yin leekf da hhiangh geef gee miaf, hooi geef-loh dingv foouf dooi loouh. 15 Meef di leeuf oouv goou yeeuv sitf bef lai geef-loh huf hee, ya hheem di leeuf oouv goou yeeuv sitf geef-loh, biang geef-loh huk gif see fokf teeh hauf. Teenf hee goou geef-loh hoouh looif, geef-loh ziuh tooi-tooi siuf-siuf yungh yuanh huk gif see." 16 Mov-si ziuh teenf hee huk vooi, too lai Ye-hheev-huav zuk geef gee, geef zung ziuf booiv huk vooi.

17 Haih ngeeih veeif ziv ngitf soov it neeh veenf hee, ziangf mukf mee ziuh lipf uif vooi. 18 Mov-si lipf ziangf mukf mee uif, zoongv gok hoouv gee loouh vooi, zoongv ben loouh, zoongv simv loouh, doongf hoouv uif. 19 dap ziangf feengv mee yoou baiv ziangf mukf, ya biang deng ziangf feengv mee geen baiv deng. Zung tih ziuf Ye-hheev-huav zuk Mov-si gee booiv huk.

20 Mov-si oouv fapf banh biang loouh da hhui, oouv goong sunv loouh ningf hhui voon fiangf, oouv bak hhui mee zoongv geen baiv ye guif vooi. 21 Hamv ye guif mee loouh da ziangf mukf, ling hoopf zaf hhui hhootf hee uif, zaf ye guif mee loouh. Zung tih ziuf Ye-hheev-huav zuk Mov-si gee booiv huk.

22 Oouv hooif ziangv hee biang yoou da huif mukf, biang yoou ziangf mukf gee beek fiangf hee, yoou hoopf hhootf hee gee uk ninh. 23 Faif bing faif hooif gee yoou baiv hooif, yoou dau na Ye-hheev-huav, zung tih ziuf Ye-hheev-huav zuk Mov-si gee booiv huk.

24 Biang deeng haiv mee yoou da huif mukf, yoou ziangf mukf mee gee noomf fiangf hee, hemv hooif ziangv hee doi goonf. 25 Yoou dau na Ye-hheev-huav ziu deei, zung tih ziuf Ye-hheev-huav zuk Mov-si gee booiv huk.

26 Biang gif hanv gimv mee yoou da huif mukf, yoou na hoopf hhootf hee, 27 yoou baiv gif hanv lut hiangv hiangf-hiangv gee, zung tih ziuf Ye-hheev-huav zuk Mov-si gee booiv huk. 28 Ya ling hoopf lumf bak deenh ziangf mukf hhootf hee uif.

29 Biang gif hanv hianf fan gif mee yoou huif mukf gee ziangf mukf gee bak deenh, hianf fan gif hemv suf gif yoou baiv ninh, zung tih ziuf Ye-hheev-huav zuk Mov-si gee booiv huk.

30 Biang funf tuk moof mee yoou huif mukf hemv gif hanv mee gee zung gan neeh hhootf hee, deengf namh yoou da funf, hau oouv miaf tuk moof. 31 Mov-si hemv Yav-lunv gangf leekf da hhiangh Yav-lunv gee zung yoou da funf neeh mee tuk moof tuk gok. 32 Geef-loh loouh huif mukf ha tih booiv ningf gif hanv mee gee tif hoouh, zung hheem sian tuk moof tuk gok, zung tih ziuf Ye-hheev-huav zuk Mov-si gee booiv huk.

33 Mov-si yoou huif mukf hemv gif hanv mee gee ti minh doongf hoopf vif da bang gee uif, ya ling hoopf lumf bak deenh da bang hhootf hee uif vooi. Teenf hee, Mov-si ziuh huk gongv gee inv vooi.

34 Dang siv, lai bah zaqf huif mukf mee, Ye-hheev-huav gee yungv guang dik ziangf mukf mee vooi. 35 Mov-si meenf loouh lai da huif mukf, eenv veeih bah gee hengf yoou baiv huif mukf, Ye-hheev-huav gee yungv guang dik ziangf mukf mee vooi.

36 Leeuf fooif bah gee lokf ziangf mukf mee suv geen booiv gee tif hoouh, lengv-hunf Yih-seef-liatf gee ziuh uif miaf hhai sih booiv; 37 bah gee zeekf meenf suv geen booiv, geef-loh ziuh meenf booiv, foou zi doongv bah gee suv geen booiv. 38 Yoou sunv geef-loh booiv booiv neeh gee, veenf bangv lai bah Ye-hheev-huav gee yoou baiv ziangf mukf, veenf yoop, lai veeif yoou da bah, biang Yih-seef-liatf suanf lanf dekf huh.