Luf-teev gif
Yih-lif-miv-leeqf suanf lanf yif booiv Mov-yaf
1
1-2 Gua na sif sia guan lih Yih-seef-liatf gee tif hoouh, lengv Yiuh-daf gee am heekf daiv yiak. Yoou Yiuh-daf gee Bokf-lif-hheengv heeuv, lai lengv-hunf Yih-fav-ta zukf gee huf hee, yin maih geef huf hee hemv leekf da hhiangh geef voon huf, lokf Bokf-lif-hheengv ziamf siv yif booiv lengv Mov-yaf gee zih. Lengv-hunf neeh huf hee yam Yih-lif-miv-leeqf, maih geef huf hee yam Nav-eev-miv, leekf da hhiangh geef voon huf, huf hee yam Mav-lonv, huf hee yam Gi-lianv. Geef-loh doongv lengv Mov-yaf gee vooi, ziuh zih yoou ninh.3 Seeif looif bef Nav-eev-miv huf hee Yih-lif-miv-leeqf daiv vooi, teengh geef hemv leekf da hhiangh geef voon huf. 4 Leekf geef voon huf zung oouv niangf lokf Mov-yaf, huf hee yam Eev-eev-ba, huf hee yam Luf-teev. Geef-loh zih yoou ninh daf hhaif lai teepf veeif. 5 Hoouh looif, Mav-lonv hemv Gi-lianv ya daiv vooi, nah teengh Nav-eev-miv toof-too, meenf lai bef ya meenf lai leekf da hhiangh vooi.
Nav-eev-miv hemv Luf-teev leengv Bokf-lif-hheengv
6 Nav-eev-miv enf yoou Mov-yaf gee tif hoouh, hingf vanh gang Ye-hheev-huav gov bek ting geef gee, biang geef-loh lai loopf mookf goonv, Nav-eev-miv ziuh yin tinf fuh geef voon huf lokf Mov-yaf leengv lauh gia. 7 Geef-loh ziuh lif hhooiv Mov-yaf leengv Yiuh-daf, danf tih yoou da sunv,
8 Nav-eev-miv hemv tinf fuh geef voon huf gang, "Meef-loh leengv lanf niah meef-loh gee lo! Meef-loh teenf hee dookf hauf hemv neef gua neeh gee, hi voongf Ye-hheev-huav ya teenf hee dookf meef-loh. 9 Hi voongf Ye-hheev-huav biang meef-loh div heekf sunv maif-maif booiv, sungf lai gav lai lanf."
Gang inv, Nav-eev-miv ziuh hoomv tinf fuh geef voon huf, yam geef-loh leengv booiv. Geef-loh ziuh ngai oo oo teenf hee, 10 bov, "Meenf! Hauf-loh dif di moh meef leengv ningf gav lanf meef gee."
11 Nav-eev-miv bov, "Leemf leekf hauf gee haf! Meef-loh leengv booiv zaix! Meenf ngah di moh hauf vooi, hauf dif lai lai leekf miaf oouv meef-loh yoou haf? 12 Leengv booiv lo! Leemf leekf hauf gee haf! Booiv lo! Hauf duf ga teenf lauh vooi, meenf ha lai vooi. Ziuh tuif hauf goomh nooih giatf lai hun, guaf leekf lai leekf da hhiangh, 13 meef-loh dif foou lai geef-loh nyoo yoou haf? Dif foou lai teenf foong meenf ha vanh haf? Meenf! Meenf hhoo neengf gee, leemf leekf hauf gee haf! Teenf hee meef-loh nanf vif, hauf bih meef-loh geengf nanf vif, eenv veeih Ye-hheev-huav fatf hauf."
14 Geef-loh hingf heekf go neeh gee vooi, yuh ngai oo-oo teenf hee. Eev-eev-ba hoomv maih faf geef huf hee hoouh looif, ziuh leengv booiv vooi; danf tih Luf-teev meenf tia lai hemv Nav-eev-miv feenv goonf, meenf hheeng leengv booiv.
15 Nav-eev-miv bov, "Meef dekf, tau meef huf hee duf ga leengv ningf gav lanf geef gee vooi, leengv ningf gungv geef bai bai neeh gee vooi, meef ya di moh geef leengv booiv lo!"
16 Danf tih Luf-teev bov, "Meenf ngah yam hauf leengv booiv, yiauf meef toof-too. Meef booiv leeuf hauf ya booiv leeuf; meef zih yoou leeuf, hauf ya zih yoou leeuf; gav lanf meef gee ziuh tih gav lanf hauf gee; Siangf-dif meef huf hee ziuh tih Siangf-dif hauf huf hee. 17 Meef daiv yoou leeuf, hauf ya daiv yoou leeuf, ya bok yoou ninh. Seef daiv vooi, meenf lai gai gee biang lai hauf hemv meef feenv goonf; zeekf hauf hemv meef feenv goonf, hi voongf Ye-hheev-huav fatf hauf hhoonf-hhoonv!" 18 Nav-eev-miv huh Luf-teev dingf-dingf dif di moh geef booiv, ziuh meenf bov geef fooif hemv vooi.
19 Geef-loh voon na ziuh gif zukf booiv, miaf doongv Bokf-lif-hheengv vooi. Geef-loh loouh heeuv gee tif hoouh, suanf heeuv gee lengv-hunf huh vooi zung suanf vinv vooi. Maih gee bov, "Neeh huf meenf tih Nav-eev-miv nenh haf?"
20 Nav-eev-miv ziuh bov geef-loh, "Meenf ngah yam hauf Nav-eev-mivb vooi, yam hauf Mav-lac hee, eenv veeih suanv neengv gee Neeh-huf-hee, biang hauf nanf vif daiv vooi. 21 Gua na hauf uk booiv gee tif hoouh gai gee duf lai, en teeif Ye-hheev-huav biang hauf moof leeif-leeiv leengv miaf, Ye-hheev-huav fatf hauf, suanv neengv gee Neeh-huf-hee biang hauf nanf vif, teenf hee, meef-loh hangh yam hauf Nav-eev-miv huk gai yoou?"
22 Nav-eev-miv ziuh tih teenf hee hemv tinf fuh geef huf hee Luf-teev, lokf lengv Mov-yaf gee leengv doongv lauh gia vooi, Luf-teev tih leemf leekf Mov-yaf gee. Geef-loh leengv doongv Bokf-lif-hheengv gee tif hoouh, doongv tif hhai sih buiv mekf nyoo.