Nav-eev-miv hooi Luf-teev div sunv booiv
3
1 Lai veenf hee,
maih faf Luf-teev huf hee Nav-eev-miv hemv geef gang,
"Leemf leekf haf!
Hauf hheem hooi meef div sunv maif-maif booiv,
biang meef lai gav lai lanf meef hau faif siangf.
2 Meef siangf-siangf hemv maih nof geef gee yoou ningf goonf huk gongv gee neeh huf Bo-a-si,
geef meenf tih gav lanf doouf-loh gee haf?
Hauf seengv meef,
goomh nooih geef dif booiv ningf siangv mekf neeh hhootf hee fung mekf geef gee.
3 Hauf maiv meef,
meef hheem tuk huf bangf-bang vooi,
sitf hiang goou hiangf-hiangv geef,
dingv yua luangf-luang hiuf loouh,
booiv ningf geef biang mekf neeh hhootf vooi.
Danf tih meenf ngah biang geef huh meef yoou ninh,
meef hheem foou geef goonv geemf-geemf,
4 booiv lap suanv vooi,
dekf zinf-zinv geef lap yoou leeuf hhootf.
Foou geef suanv vooi,
meef ziuh booiv leetf gum ziav gok geef neeh gee uif,
lap yoou ninh,
geef dif seengv meef gaiv lai huk gai gee."
5 Luf-teev bov,
"Meef bov di leeuf hauf ziuh huk di leeuf."
6 Luf-teev ziuh longf ningf siangv mekf neeh hhootf vooi,
ziuf maih faf geef huf hee zuk gee booiv huk.
7 Bo-a-si goonv geemf vooi,
timv mee suh saih,
ziuh lap yoou ningf mekf gee suanv vooi.
Luf-teev ziuh laif-laih booiv ningf geef,
leetf gum ziav gok geef neeh gee uif,
lap yoou ningf gok geef.
8 Doongv da hheenf vooi,
Bo-a-si it ziu hit angv vooi,
geef veenh huf,
naf huh lai maih huf hee lap yoou ningf gok geef.
9 Geef ziuh tooi,
"Meef tih naf nee?"
Luf-teev bov,
"Hauf tih leekf nof meef huf hee Luf-teev,
hhuf meef oouv yua meef hiuf hee miaf ziav hauf,
oouv hauf huk maih.
Eenv veeih meef hemv hauf sinf-sinv,
gaiv lai ziauf guf hauf."
10 Bo-a-si bov,
"Leemf leekf haf!
Hi voongf Ye-hheev-huav sev fok zee meef!
En teeif meef doi gav lanf bef meef huf gee bih gua na geengf maif.
Beenh laiv meef hhoo yi div leekf hauh tengv gee,
danf tih meenf guan neef ngah gee,
ha tih neef lai gee,
meef zung meenf ha vanh,
deuf miaf nooih miaf div hauf.
11 Leemf leekf haf,
meenf ngah mangf!
Meenf guan meef hhuf gai gee,
hauf duf hooi meef huk.
Suanf heeuv gee lengv-hunf zung huh meef maif.
12 Hauf titf-titf hemv meef sinf-sinv,
gaiv lai ziauf guf meef,
danf tih lai huf hee bih hauf enf sinv yoou.
13 Goomh nooih meef ziuf yoou nooih zaix,
bak zeekf zau,
dekf geef hheeng meenf hheeng ziauf guf meef oouv meef,
huk sinf sik huf hee gaiv lai huk gee.
Geef zeekf hheeng,
ziuh maif vooi,
biang geef ziauf guf meef.
Geef zeekf meenf hheeng,
hauf yoou dau na gi tif duf yoou gee neeh huf Ye-hheev-huav fat tooih,
hauf itf dingf huk hauf gaiv lai huk gee.
En teenf meef biang timv lap zi doongv veenf bangv lo!"
14 Luf-teev ziuh lap yoou ningf gok Bo-a-si zi doongv veenf dif bangv.
Fa mee fokf-fok fuh meenf nginh lai heekf goonf yoou,
Luf-teev ziuh uif vooi.
Eenv veeih Bo-a-si bov vooi,
meenf ngah sev vanh huh,
lai maih leekf miaf siangv mekf neeh hhootf gua.
15 Luf-teev dif leengv booiv gee tif hoouh,
Bo-a-si yuh yam geef bov,
"Oouv foouf meef hiuf hee miaf,
feev dauf matf vooi."
Luf-teev ziuh feev foouf hiuf hee dauf matf vooi.
Bo-a-si ziuh sap mekf nyoo sok leekf geeiv teenf hee,
diaqf loouh da gooh hiuf vooi,
hooi geef zav geen baiv via vooi,
geef ziuh iaqv leengv heeuv vooi.
16 Luf-teev leengv doongv lanf,
maih faf geef huf hee ziuh tooi geef,
bov,
"Leemf leekf haf!
Di leeuf vooi?"
Luf-teev ziuh seengv Bo-a-si hooi geef huk gee teeh,
inf-inv zee maih faf geef huf hee vooi.
17 Luf-teev yuh bov,
"Geef hemv hauf gang,
'Meef meenf hau moof leeif-leeiv leengv ningf maih faf meef huf hee',
geef ziuh sev mekf neeh dunf hee zee hauf."
18 Nav-eev-miv bov,
"Leemf leekf haf!
Meef nah guf anv timv loouh foou,
dekf teeh neeh hhinh hee dif di leeuf hee,
Bo-a-si veenf nooih meenf huk teeh neeh hhinh hee maif,
geef ziuh meenf hengf lingf."