Hooi vanh tuk leei gee Ye-hanf hooi Zu zunh bif sunv
3
1 Neeh tif hoouh, hooi vanh tuk leei gee Ye-hanf miaf vooi, yoou da loouh Yiuh-haif gee gang Go Siangf-dif gee, bov, 2 "Eenv veeih hian gukf dif miaf doongv vooi, meef-loh hheem huiv gaih!" 3 Ye-hanf ziuh tih sian zi Yih-saif-yav gang gang gee neeh huf hee, Yih-saif-yav bov,"Yoou da loouh lai lengv-hunf yanh bov,
'Hooi Zu zunh bif sunv,
ya hheem huk leekf sunv geef gee teenf-teenf booiv.'"
4 Hho yua Ye-hanf dingv-dingv neeh gee tih oouv vunf lookf hoov miaf huk gee, loou mee gatf heeif nangv hiuf hee, ziauh hemv liangv sangv tih fiah geef gee. 5 Neeh tif hoouh, lengv-hunf Ye-luf-sa-leengh gee hemv suanf bak lengv Yiuh-haif gee gangf suanf bak lengv Ye-danf-hoov gee zung booiv ningf Ye-hanf neeh hhootf vooi, 6 singv nginf toof-too lai soih, Ye-hanf ziuh yoou Ye-danf-hoov hooi geef-loh tuk leei vooi.
7 Ye-hanf dekf huh lengv-hunf Fatf-lif-saif dangha dunf hee hemv lengv-hunf Sa-du-gai danghb dunf hee ya miaf yam geef hooi tuk leei, geef ziuh bov geef-loh, "Voonf ngiaf lamv meef-loh neeh hoouf hee, naf nee seengv meef-loh deuf met dif miaf doongv gee simh fuanf nif? 8 Meef-loh hheem giat makf hengf hongh maif gee uk miaf, hemv timv huiv gaih gee liang goonf. 9 Meenf ngah toof-too timv tiang bov, 'Yav-bov-la-hanf tih zuh zung hauf-loh huf hee, Siangf-dif ziuh meenf sim fuanf hauf-loh.' Hauf seengv meef-loh, Siangf-dif hhoo yi yam dinf neeh gee tingf leekf lanv Yav-bov-la-hanf gee. 10 Fu mee en teeif duf ga biang yoou baiv hau dun vooi, too lai dun meenf giat makf maif neeh gee, ziuh dif damh longf gengf loouh da veeif vooi.
11 Hauf tih oouv namh miaf hooi meef-loh tuk leei, biauh sif meef-loh huiv gaih; danf tih miaf bih hauf seeif gee neeh huf hee, neengv likf bih hauf geengf nyoo, hauf ziuh tih hooi geef diuh haif duf meenf fui. Geef dif oouv Seengf-lingv hemv veeif miaf hooi meef-loh tuk leei. 12 Geef moof nganv fun geeiv miaf dif voof siauh maif geef gee bang, oouv siauh maif gee suv loouh da sang hhuf, danf tih dif gengf bau gee loouh da veeif meenf gua neeh gee vooi ngupf inf-inv booiv."
Yev-so tuk leei
13 Neeh tif hoouh, Yev-so lokf Gia-lif-lif miaf doongv Ye-danf-hoov, booiv ningf Ye-hanf neeh hhootf hee, yam Ye-hanf hooi geef tuk leei. 14 Danf tih Ye-hanf tiang lanf geef, ziuh bov, "Hauf gaiv lai yam meef hooi hauf tuk leei, meef di leeuf deuf miaf ningf hauf miaf nif?"
15 Yev-so tanv bov, "Meef en teeif ziamf siv teenf huk lo, eenv veeih doouf-loh gaiv lai teenf hee ziuf Siangf-dif gee iau hhiuv booiv huk." Ye-hanf ziuh hheeng vooi.
16 Yev-so tuk leei vooi, mah siangf lokf da namh uif miaf, neeh tif hoouh fa mee ziuh hheeif vooi, geef dekf huh Lingv Siangf-dif mee zing goop huf hee teenf hee giangf longf miaf yoou baiv huf geef. 17 Neeh tif hoouh yuh lai sauv mee lokf baiv fa miaf bov, "Neeh huf tih hauf dookf gee leekf da hhiangh, geef huk gee zung hoopf i hauf."