3 "Singv nginf toof-too si iauf Siangf-dif gee lengv-hunf lai fok vooi,

eenv veeih hian gukf tih geef-loh gee.

4 Tiangv timv gee lengv-hunf lai fok vooi,

eenv veeih geef-loh itf dingf deekf doongv an uif.

5 Hhiam beei gee lengv-hunf lai fok vooi,

eenv veeih geef-loh itf dingf goonv gif lengv.

6 Meenf huh giau tiang ziuf Siangf-dif gee iau hhiuv booiv huk gee lengv-hunf lai fok vooi,

eenv veeih geef-loh itf dingf deekf doongv mooh zukf.

7 Dookf hungh vanh gee lengv-hunf lai fok vooi,

eenv veeih geef-loh itf dingf deekf doongv dookf hungh.

8 Timv singf-singv bangf-bang gee lengv-hunf lai fok vooi,

eenv veeih geef-loh itf dingf dekf huh Siangf-dif.

9 Biang vanh maif goonf gee lengv-hunf lai fok vooi,

eenv veeih itf dingf yam geef-loh tih Siangf-dif gee leekf ngif.

10 Veeih liauh ziuf Siangf-dif gee iau hhiuv booiv huk tuh vanh bik tuh vanh haih gee lengv-hunf lai fok vooi,

eenv veeih hian gukf tih geef-loh gee.

11 Eenv veeih hauf vanh an meef-loh, haih meef-loh, zooh tiv gookf zuangv go seeu an meef-loh, meef-loh ziuh lai fok vooi. 12 Meef-loh hheem eengf-eengv geef, eenv veeih meef-loh yoou baiv fa gee ziangf lif tih nyoo gee; sian zi yoou meef-loh zee sianv neeh gee, lengv-hunf ya tih teenf hee bik haih geef-loh.

13 "Meef-loh tih bak matf gee nyau. Nyau zeekf meenf lai vih vooi, dif oouv gai gee miaf huk geef lang leengv nif? Geef meenf lai yungh ziqf-ziqf vooi, nah lai gengf uk ninh vooi, suf saih lengv-hunf sah.

14 "Meef-loh tih tooi ganv gee bangv. Heeuv huk yoou baiv tiah mee tih meenf me lai on gee. 15 Lengv-hunf ziu deei, ya meenf hooi oouv zum hhumh miaf zum loouh, tih biang geen baiv hooif vooi, hau zeeng bangv suanf gav gee lengv-hunf. 16 Hongf yiangh, meef-loh ya hheem zing bangv teenf hee zeeng yoou dau na lengv-hunf, biang geef-loh dekf huh meef-loh gee maif hengf hongh vooi, ziuh guiv yungv yauf^a sev meef-loh yoou baiv fa gee bef lai.

17 "Meenf ngah yih vuiv hauf miaf tih dif feeif lutf fapf ha tih sian zi maiv gee booiv. Hauf miaf tih dif biang lutf fapf hemv sian zi maiv gee bin tingf titf, meenf tih dif feeif booiv. 18 Hauf titf-titf seengv meef-loh, ziuh tih doongv fa matf zung vau booiv vooi, lutf fapf tia gee it bit it huaf enf maif-maif yoou, zi doongv itf siatf gee teeh zung fatf seeng vooi. 19 Guf seeh, meenf guan naf nee feeif gaif mingh neeh gee zuif nook gee hiuf hee booiv vooi, ya maiv vanh teenf hee feeif booiv gee, geef yoou hian gukf itf dingf yam geef tih zuif meenf zungf iauf gee; danf tih meenf guan naf nee zun siuh gaif mingh neeh gee, yuh maiv vanh teenf huk gee, lengv-hunf neeh huf hee yoou hian gukf itf dingf yam tih zungf iauf gee. 20 Hauf seengv meef-loh, meef-loh ziuf Siangf-dif gee timv i booiv huk hheem siau guaf Siangf-dif lutf fapf gee lauh see hemv lengv-hunf Fatf-lif-saif dangh gee huk gee, zeekf meenf tih teenf hee, meef-loh ziuh zuatf deeif meenf loouh lai hian gukf.

21 "Meef-loh hingf gua lai go gee teenf hee seengv lengv-hunf gua na gee bov, 'Meenf zun ga lengv-hunf, neef ga lengv-hunf gee itf dingf bif simh fuanf.' 22 Danf tih hauf seengv meef-loh, neef hheei hhif engv tok gee, itf dingf bif simh fuanf; neef an engv tok tih 'Leekf ngeenf' gee, itf dingf bif gung huif simh fuanf; neef an engv tok tih 'Leekf ngoon' gee, itf dingf meenf deuf lai luat veeif dif yukf gee.

23 "Guf seeh, meef yoou baiv gif hanv hianf goouh sev Siangf-dif gee tif hoouh, zeekf tiang heekf engv tok meef gee doi meef meenf moon, 24 ziuh hheem biang goouh gee yoou na gif hanv, sian booiv hemv engv tok meef gee maif goonf leengv, nah leengv miaf hianf goouh meef gee.

25 "Meef hemv suf yinf dif goou meef neeh huf hee enf yoou da sunv gee tif hoouh, hheem meng ziqf hemv geef maif goonf leengv; ha zinf geef gauv meef sev fapf guan, fapf guan gauv meef sev guanh gamv gee, hoop meef loouh da gamv vooi. 26 Hauf titf-titf seengv meef, meef zeekf teengh zi teek hee enf meenf fooh inv yoou, meef ziuh zuatf deeif meenf uk lai gamv.

27 "Meef-loh hingf gua lai go gee hee bov, 'Meenf zun beeng maih vanh huf hee.' 28 Danf tih hauf seengv meef-loh, neef dekf huh maih vanh huf hee ziuh tiang gee, timv geef mee duf ga famh soih beeng maih mee vooi. 29 Zeekf dav moof maif meef fiangf hee biang meef famh soih, ziuh uat geef uk miaf fengf booiv. Eenv veeih sinf nginh huf meef mee tiu hhinh hee booiv, enf hhiangf gua huf meef mee maif-maif loouh dif yukf. 30 Zeekf moof maif meef fiangf hee biang meef famh soih, ziuh damh geef longf fengf booiv. Eenv veeih sinf nginh huf meef mee tiu hhinh hee booiv, enf hhiangf gua huf meef mee maif-maif loouh dif yukf.

31 "Yuh lai go gang bov, 'Meenf guan naf nee dif hemv maih geef huf hee huatf liv gee, duf hheem tia teev sev maih geef huf hee, bov meenf oouv geef vooi.' 32 Danf tih hauf seengv meef-loh, neef hemv maih geef huf hee huatf liv gee, suv feei maih geef huf hee booiv beeng bef vooi, zeekf meenf tih teenf hee, ziuh tih biang maih geef huf hee famh soih beeng bef mee vooi; meenf guan naf nee oouv maih bif vanh huatf liv neeh gee, ya tih famh soih beeng maih mee vooi.

33 "Meef-loh ya hingf gua lai go zuk lengv-hunf gua na gee bov, 'Fat tooih itf dingf hheem booiv huk, eef sev Siangf-dif gee hheem ziuf booiv huk.' 34 Danf tih hauf seengv meef-loh, gai gee tooih duf meenf hau fat. Meenf hau nyi fa mee fat tooih, eenv veeih fa tih henh Siangf-dif mee; 35 meenf hau nyi matf fat tooih, eenv veeih matf tih doong Siangf-dif zav gok gee; ya meenf hau nyi Ye-luf-sa-leengh fat tooih, eenv veeih heeuv neeh mee tih voongf zuif nyoo neeh huf hee gee; 36 ya meenf hau nyi hau toof-too mee fat tooih, eenv veeih meef meenf biang lai fuiv hiuf hee bin fiakf ha tih bin lamv. 37 Meef-loh gang gee go, tih ziuh bov, 'Tih', meenf tih ziuh bov, 'Meenf tih'; zeekf gang liauh vooi, ziuh tih lokf neef ook neeh huf hee^b miaf gee.

38 "Meef-loh hingf gua lai go gang bov, 'Oouv dav fooh dav, oouv tinv fooh tinv.' 39 Danf tih hauf seengv meef-loh, meenf ngah hemv neef seeu gee zookf deeif. Lai lengv-hunf fak na moof maif meef fiangf hee, linf gakf fiangf ya len gua miaf saih geef fak; 40 lai lengv-hunf dif goou meef, dif oouv yua dooi meef hiuf hee, linf yua bak ya saih geef oouv booiv. 41 Lai lengv-hunf ap meef booiv sunv li hee, meef ziuh hemv geef booiv voon li. 42 Lai lengv-hunf hhuf meef, ziuh sev geef; lai lengv-hunf hemv meef nai goouh, ziuh nai zee geef.

43 "Meef-loh hingf gua lai go gang bov, 'Hheem dookf ningf lanf meef gee, zookf lengv-hunf zookf meef neeh gee.' 44 Danf tih hauf seengv meef-loh, hheem dookf suf yinv meef-loh gee, hooi neef bik haih meef-loh gee doouh goouf. 45 Teenf hee, meef-loh nah huk lai fa bef gee leekf ngif; eenv veeih fa bef biang da veenf nyoof neef maif gee, ya nyoof neef seeu gee; geef dok funv sev ngif yinv, ya dok funv sev lengv-hunf meenf ngif gee. 46 Meef-loh zeekf danf-danv dookf neef dookf meef-loh neeh gee, lai gai gee ziangf lif nif? Lengv-hunf suv suif ham sinf ham ngoonf neeh gee meenf tih ya teenf huk haf? 47 Meef-loh zeekf danf-danv gingv engv tok meef-loh gee, lai gai gee maif gua vanh nif? Lengv-hunf meenf siang sinf Siangf-dif neeh gee meenf tih ya teenf huk haf? 48 Too yi meef-loh hheem maif inv maif bang, zing goh fa bef meef-loh huf hee maif inv maif bang teenf hee.