Meenf ngah dingf soih vanh gee
7
1 "Meef-loh meenf ngah dingf soih vanh gee, ha zinf meef-loh bif dingf soih. 2 Eenv veeih meef-loh di leeuf dingf soih vanh gee, meef-loh ya itf dingf di leeuf bif dingf soih; meef-loh di leeuf doi vanh, Siangf-dif ya itf dingf di leeuf doi meef-loh.3 "Neef dingf soih vanh neeh gee, meef veeih gai dekf huh dav engv tok meef gee lai ziamh mookf, danf tih meenf saf teeh yoou da dav meef gee liangf lanf nif? 4 Dav meef toof-too gee lai liangf lanf, di leeuf bov lai engv tok meef gee 'Biang hauf hooi meef oouv ziamh mookf da dav meef gee uk' nif? 5 Gev maif meef neeh huf hee, meef hheem sian oouv liangf lanf da dav meef gee uk, nah dekf lai zinv, booiv hooi engv tok meef gee oouv ziamh mookf da dav geef gee uk.
6 "Meenf ngah oouv goouh Siangf-dif gee sev mav, ya meenf ngah oouv zeen-zu meef-loh gee fengf dau na mov vooi, mangf geef-loh sah zeen-zu gee vooi, yuh len leengv miaf gapf meef-loh.
Hhuf Siangf-dif ziuh deekf doongv
7 "Meef-loh hhuf, ziuh sev zee meef-loh; meef-loh div, ziuh div heekf; meef-loh hhauv deenh, ziuh hooi meef-loh hheeif deenh. 8 Eenv veeih neef hhuf gee, ziuh deekf doongv; div gee, ziuh div heekf; hhauv deenh gee, ziuh hooi geef hheeif deenh.
9 "Yoou da meef-loh lai naf nee leekf da hhiangh nee hemv geef imv bing, geef dif oouv dinf sev leekf haf? 10 Ha tih hemv geef imv bav, geef dif oouv ngiaf sev leekf haf? 11 Tuif yianf meef-loh ook, ya took oouv goouh maif gee sev leekf ngif, meef-loh yoou baiv fa gee bef lai geengf meenf yungh gang vooi, sang tih geef meenf oouv goouh maif gee sev zee lengv-hunf hhuf geef neeh gee haf? 12 Too yi meenf guan teeh gai gee, meef-loh tiang vanh di leeuf doi meef-loh, meef-loh ya hheem di leeuf doi vanh; eenv veeih neeh ziuh tih lutf fapf hemv sian zi gee giauf doouh.
Deenh zek hemv deenh hhuat
13 "Meef-loh hheem lokf deenh zek mee loouh. Eenv veeih deenh yin doongv dif yukf neeh mee tih hhuat gee, sunv neeh hiuf hee tih nyoo gee, lokf ninh loouh booiv gee lengv-hunf ya liauh; 14 danf tih deenh yin doongv yungh seeng neeh mee tih zek gee, sunv neeh hiuf hee tih nook gee, div heekf gee lengv-hunf ya tiu.
Dun maif hemv dun seeu
15 "Meef-loh hheem zuf if sian zi gev neeh gee. Geef-loh lumf nangv tuangf miaf ningf meef-loh, hhih sitf da ninh tih langv ook gee. 16 Meef-loh dekf makf geef-loh gee, ziuh hhoo yi nginh uk geef-loh. Lokf unv gee dif muk lai makf fuh hoouv uk haf? Lokf yauv gee dif muk lai uv-hua-goh uk haf? 17 Hongf yiangh, too lai dun maif gee zung tengv makf maif; zih lai dun seeu gee tengv makf seeu. 18 Dun maif gee meenf tengv lai makf seeu; dun seeu gee meenf tengv lai makf maif. 19 Too lai dun meenf tengv makf maif neeh gee, ziuh dif damh longf gengf loouh da veeif vooi. 20 Too yi, meef-loh dekf makf geef-loh gee ziuh hhoo yi nginh uk geef-loh tih gev sian zi.
21 "Meenf tih too lai yam hauf 'Zu haf, Zu haf' gee lengv-hunf zung loouh lai hian gukf; zih lai lengv-hunf zun hauf fa bef gee zih if booiv huk neeh gee, nah loouh lai. 22 Doongv simh fuanf gee neeh veenf hee, itf ding lai haih liauh lengv-hunf hemv hauf gang bov, 'Zu haf, Zu haf, hauf-loh gua na oouv nooiv meef mee booiv gang doongv nooih dif fatf seeng gee teeh, oouv nooiv meef mee booiv voouf yif hangv hemv huk haih liauh meenf fingf tiangf gee teeh, meenf tih teenf hee haf?' 23 Neeh tif hoouh, hauf dif daqf-daqf hemv geef-loh gang, bov, 'Hauf lokf hau meenf took meef-loh; meef-loh neef huk seeu neeh gee, deuf hingf-hingv geef!'
Voon zuangv giak lanf
24 "Too yi neef hingf go hauf neeh gee vooi ziuh ziuf booiv huk neeh gee, zing goh lengv-hunf nyaif huf hee teenf hee, huk lanf geef mee geen baiv dinf danv vooi. 25 Fungv diqf, namh tung, van tung, tung lanf neeh mee, lanf neeh mee zung meenf dum lai; eenv veeih lanf neeh mee longf giak yoou baiv dinf danv. 26 Neef hingf go hauf neeh gee vooi meenf ziuf booiv huk neeh gee, zing goh lengv-hunf ngeenf huf hee teenf hee, huk lanf geef mee geen baiv tangv vooi. 27 Fungv diqf, namh tung, van tung, tung lanf neeh mee, lanf neeh mee ziuh dum vooi, dum faih inf-inv vooi."