2 Hooi vanh tuk leei gee Ye-hanf yoou da gamv hingf huh Gi-dukf too huk gee teeh, ziuh faif meenv huv geef gee booiv, 3 tooi Yev-so bov, "Dif miaf gee Neeh-huf-hee tih meef meenf? Ha tih hauf-loh foou gakf na nif?"

4 Yev-so tanv geef-loh bov, "Meef-loh leengv booiv, oouv meef-loh hingf huh gee hemv dekf huh gee zung seengv zee Ye-hanf. 5 Ziuh tih dav lak gee dekf huh, gok hhoih gee booiv sunv, yiav tingf ma fungv gee maif vooi, sak makf gee hingf huh, lengv-hunf daiv gee tingf leengv, neef ngah gee lai fukf im suanf sev geef-loh. 6 Neef meenf gif zuatf hauf siang sinf hauf gee, ziuh lai fok vooi."

7 Geef-loh giangf booiv, Yev-so yoou dau na lengv-hunf dunf hee gang Ye-hanf, bov, "Gua na meef-loh booiv da loouh vooi, dif dekf gai gee nif? Dif dekf van siau ganf ngoouf haf? 8 Meef-loh booiv ninh doongv dooi dif dekf gai gee nif? Dif dekf lengv-hunf dingv yua tef-teh luangf-luang neeh gee haf? Noh, lengv-hunf dingv yua tef-teh luangf-luang neeh gee tih zih yoou da voongv gung. 9 Meef-loh uk booiv giuf gingf dif dekf gai gee nif? Dif dekf sian zi haf? Tih nenh! Hauf seengv meef-loh, geef bih sian zi nyoo liauh vooi lo. 10 Geef ziuh tih ging veenv tia gee neeh huf hee, ging veenv bov,

'Dekf lo, hauf dif faif sih zeh hauf gee booiv gua na meef,

geef dif yoou dau na meef hooi meef fu sunv.'

11 "Hauf titf-titf seengv meef-loh, maih leekf lai gee meenf sut lai huf huf nyoo gua Ye-hanf; danf tih lengv-hunf yoou da hian gukf neeh gee, ziuh tih zuif nook gee huf hee bih geef enf nyoo." 12 Lokf hooi vanh tuk leei gee Ye-hanf gee tif hoouh zi doongv en teeif, hian gukf bif gukf lingf gung gikf meenf hengf ziuf-ziu, lengv-hunf neef ook neef seeu neeh gee tiang geep geef booiv^a. 13 Eenv veeih too lai gee sian zi hemv Mov-si gee lutf fapf, zi doongv Ye-hanf, zung gang doongv nooih dif fatf seeng gee teeh vooi. 14 Meef-loh zeekf hheeng ziapf siuf, ziuh gaiv lai siang sinf Ye-hanf ziuh tih gua na bov doongv nooih dif miaf gee neeh huf Yih-lif-yav. 15 Lai sav hingf gee, ziuh hheem hingf loouh!

16 "Hauf oouv gai gee miaf bih tooi ganv neeh mee maif nif? Geef ziuh zing leekf nook gee ngov yoou da gaiv yam leekf nook gakf gee teenf hee, bov,

17 'Hauf-loh hooi meef-loh voouh tiuv vooi,

meef-loh meenf hiauf moou.

Hauf-loh ngai dem gee vooi,

meef-loh ya meenf umf ook.'

18 Eenv veeih Ye-hanf miaf vooi, meenf goonv ya meenf maq, lengv-hunf ziuh bov yif hangv geen huf geef vooi. 19 Yeenv-zeeh miaf vooi ya goonv ya maq, lengv-hunf yuh bov, meef dekf, lengv-hunf neeh huf hee ham goonv ham maq, hemv lengv-hunf suv suif gee gangf lengv-hunf lai soih gee huk feengf yu. Danf tih, zif huif tih hongv gua geef toof-too gee hengf hongh miaf zingf mingv toof-too tih gung ngif gee."

20 Neeh tif hoouh, Yev-so yoou heeuv gee huk haih liauh meenf fingf tiangf gee teeh. Eenv veeih lengv-hunf yoou ninh gee meenf hheeng huiv gaih, Yev-so ziuh hhai sih an heeuv neeh gee bov, 21 "Heeuv Gee-la-sunf mee haf, meef lai huah vooi! Heeuv Bokf-saif-daf mee haf, meef lai huah vooi! Eenv veeih hauf yoou da meef-loh huk meenf fingf tiangf gee teeh, zeekf huk yoou hhiv ha minv zukf gee heeuv Tui-lov hemv heeuv Si-dunf, geef-loh zoouh duf ga lumf hoopf ganv fung doouh geen huf biauh sif huiv gaih vooi. 22 Danf tih hauf seengv meef-loh, doongv simh fuanf gee neeh veenf hee, meef-loh tuh gee seengv fapf bih heeuv Tui-lov hemv heeuv Si-dunf tuh gee enf nanf vif. 23 Hauf bov meef, Gia-baiv-nungv haf! Meef yih vuiv dif zumv meef geen fa haf? Doongv nooih dif gengf meef longf imv ganv. Eenv veeih hauf yoou ningf meef neeh hhootf hee huk meenf fingf tiangf gee teeh gua vooi, teeh neeh gee zeekf huk yoou heeuv Soh-to-mah, heeuv neeh mee enf luf lai doongv en teeif yoou. 24 Danf tih hauf seengv meef-loh, doongv simh fuanf gee neeh veenf hee, meef-loh tuh gee seengv fapf bih heeuv Soh-to-mah tuh gee enf nanf vif."

25 Ziuh yoou neeh tif hoouh, Yev-so bov, "Bef lai haf, fa matf gee Zu, hauf gamh siaf meef! Eenv veeih meef doi lengv-hunf nyaif gee hemv lengv-hunf lai veenv huaf gee ziuh me teeh neeh gee uif, danf tih biang lengv-hunf zing leekf nok neeh gee mingf fekf. 26 Bef lai haf, tih nenh, meef gee timv i beenh laiv tih teenf hee.

27 "Too lai gee itf siatf zung tih bef lai hauf gauv sev hauf gee. Seef bef lai vooi, meenf lai lengv-hunf took leekf tih naf nee; seef leekf hemv leekf hheeng sev geef huh gee lengv-hunf vooi, meenf lai lengv-hunf took bef lai tih naf nee.

28 "Neef huk hho hap hhoonv gee lengv-hunf haf, zung miaf ningf hauf miaf, hauf dif biang meef-loh hiu sikf hengf lingf. 29 Meef-loh hheem iaq ek hauf mee miaf hemv hauf hookf, eenv veeih hheei hauf mee teemh hemv hhiam beei, teenf hee timv meef-loh gee ziuh itf dingf deekf doongv hiu sikf. 30 Eenv veeih ek hauf mee tih hau iaq gee, vanf hauf hiuf hee tih hhoo gee."