3 Lai lengv-hunf Fatf-lif-saif dangh gee miaf au Yev-so bov, "Lutf fapf doouf-loh gee zun bef huf hee meenf guan gai gee lih yeeuv huatf liv maih geef huf hee meenf?"

4 Yev-so tanv bov, "Neef soof-soov soouh lengv-hunf gee neeh huf hee, tih soouh da hhiangh hemv soouh maih leekf, 5 ya bov, 'Eenv veeih teenf hee, da hhiangh dif lif hhooiv bef maih, hemv maih geef huf hee goop goonf, voon na tingf na hee vooi.' Ging veenv neeh gee meef-loh meenf hookf gua haf? 6 Teenf hee, voon na bef maih meenf tih voon na lengv-hunf, tih na hee vooi. Guf seeh, Siangf-dif anv maif gee, lengv-hunf meenf zun sek."

7 Lengv-hunf fatf-lif-saif dang gee ziuh tooi geef bov, "Teenf hee, veeih gai Mov-si zuk lengv-hunf gee bov, 'Bef huf hee nah guf tia teev sev maih geef huf hee, bov meenf oouv geef vooi, ziuh hhoo yi huatf liv maih geef huf hee' nif?"

8 Yev-so tanv bov, "Eenv veeih timv meef-loh gee luaq, Mov-si nah zun meef-loh hhuatf liv maih, danf tih soof-soov meenf tih teenf hee. 9 Hauf seengv meef-loh, meenf guan tih naf nee hhuatf liv maih sungf oouv gee, zeekf meenf tih eenv veeih maih geef huf hee beeng bef, geef ziuh tih famh soih beeng maih mee vooi; neef oouv maih vanh hhuatf liv gua neeh gee, ya tih famh soih beeng maih mee vooi^a."

10 Meenv huv gee hemv Yev-so gang bov, "Gif yianv voon na bef maih gee guan hif tih teenf hee, meenf giatf hun enf maif."

11 Yev-so bov geef-loh, "Go neeh gee meenf tih naf nee duf ziapf lai siuf gee, tih Siangf-dif sev zee naf nee, naf nee nah ziapf lai siuf gee. 12 Eenv veeih lai lengv-hunf feenh hee lokf haiv miaf ziuh tih meenf giatf lai hun gee; lai lengv-hunf feenh hee bif vanh donv vooi meenf giatf lai hun; ya lai lengv-hunf feenh hee tih veeih liauh hian gukf, toof-too meenf giatf hun gee. Go neeh gee naf nee ziapf lai siuf ziuh ziapf siuf lo."

13 Seeif looif, lai lengv-hunf yin leekf nook gee miaf div Yev-so, dif yam Yev-so zav moof geen geef-loh vooi hooi geef-loh doouh goouf, meenv huv gee ziuh an lengv-hunf neeh gee.

14 Danf tih Yev-so bov, "Meenf ngah lanf leekf nook neeh gee, biang geef-loh miaf ningf hauf miaf, eenv veeih hian gukf tih sukf i lengv-hunf zing leekf nook gee teenf hee." 15 Yev-so zav moof geen baiv huf geef-loh hooi geef-loh doouh goouf vooi, ziuh lokf ninh booiv vooi.

16 Lai fooif hee, lai lengv-hunf huf hee miaf div Yev-so, tooi geef bov, "Lauh see, hauf hheem huk gai gee maif teeh, nah deekf lai doongv yungh seeng nif?"

17 Yev-so tanv geef bov, "Meef veeih gai tooi hauf gaiv lai huk gai gee maif teeh nif? Maif gee zih lai huf hee toof-too, ziuh tih Siangf-dif. Meef zeekf tiang lai yungh seeng, meef ziuh hheem zun siuh gaif mingh."

18 Geef bov, "Gaif mingh leeuf hiuf?"

Yev-so bov, "Ziuh tih 'Meenf zun ga lengv-hunf; meenf zun lai bef booiv beeng bef vanh, lai maih booiv beeng maih vanh; meenf zun lookf goouh; meenf zun huk gev zingf mingv; 19 hheem dookf bef maih, tiangh bef maih; ya hheem dookf ningf lanf gee zing dookf toof-too teenf hee.'"

20 Leekf hauh tengv neeh huf hee bov, "Gaif mingh neeh gee inf-inv hauf zung huk vooi, enf hhiat gai gee hemv yoou?"

21 Yev-so bov, "Meef zeekf tiang huk maif doongv vanh meenf lai go hau gang vooi, ziuh booiv ing gav teeh meef mee inf-inv booiv, oouv sinf feenv zee neef ngah gee, meef ziuh itf dingf lai saiv sanh sunf yoou baiv fa vooi. Meef ya hheem miaf hemf moh hauf."

22 Leekf hauh tengv neeh huf hee giangf hingf heekf go neeh gee, ziuh tiang mee nyungf nyung teenf hee booiv vooi, eenv veeih gav teeh geef mee meenf huh giauh nyoo.

23 Yev-so ziuh seengv meenv huv geef gee bov, "Hauf titf-titf seengv meef-loh, fuf ung dif loouh hian gukf tih hheekf see nanf gee! 24 Hauf yuh seengv meef-loh, lookf hoov sunv gua soongh ngaqf, enf yeenh gua fuf ung loouh Siangf-dif gee gok gav vooi!"

25 Meenv huv gee hingf heekf go neeh gee, zung ngee vooi, bov, "Teenf hee dif lai naf nee deekf giuf nooh?"

26 Yev-so vook geef-loh bov, "Ziuf lengv-hunf dekf, teeh neeh hhinh hee tih meenf hhoo neengf gee, danf tih doi Siangf-dif miaf gang, meenf lai gai gee tih meenf hhoo neengf gee."

27 Neeh tif hoouh Bih-deekf hemv Yev-so gang bov, "Meef dekf, hauf-loh gai gee duf gengf inf-inv miaf hemf moh meef vooi, teenf hee, hauf-loh doongv nooih dif deekf doongv gai gee nif?"

28 Yev-so seengv geef-loh bov, "Hauf titf-titf seengv meef-loh, "Yoou sin siv daif Yeenv-zeeh ngov yoou baiv henh yungv yauf geef mee gee tif hoouh, meef-loh lengv-hunf neef hemf moh hauf neeh gee, ya dif ngov yoou baiv henh teepf ngeeih mooqf, simh fuanf Yih-seef-liatf gee teepf ngeeih mooqf zi faif. 29 Neef veeih hauf gengf lanf mee, ha tih gengf engv tok, booi meeih, bef lai, maih lai, leekf ngif, veen niaf gee, dif deekf doongv it bek fuih gee ziangf lif, ya dif lai yungh seeng. 30 Danf tih lai haih liauh yoou na gee, doongv nooih dif leengv looif vooi; yoou looif gee, doongv nooih dif geen na vooi."