Doi soih daiv, doi Gi-dukf yoou
6
1 Teenf hee, doouf-loh di leeuf gang nif? Doouf-loh hhoo yi gif zukf famh soih, hau biang een dianh gav liauh haf? 2 Zuatf deeif meenf noov lai. Doouf-loh doi soih duf ga daiv vooi gee lengv-hunf, di leeuf hhoo yi gif zukf seeng huatf yoou da soih yoou nif? 3 Sangf tih meef-loh meenf huh, doouf-loh neef tuk leei guiv loouh Gi-dukf Yev-so neeh gee, ziuh tih tuk leei guiv loouh geef gee daiv vooi haf? 4 Guf seeh, doouf-loh hongv gua tuk leei guiv loouh daiv, hemv geef hongf goonf bok vooi, tih veeih liauh biang doouf-loh hengf teeh huk lengv-hunf zung lai nauh gee seeng hautf, zing Gi-dukf hongv gua bef lai gee yungv yauf lokf da lengv-hunf daiv tingf leengv teenf hee.5 Doouf-loh zeekf hemv geef goop loouh goonf, hemv geef hongf goonf daiv, ya dif hemv geef goop loouh goonf, hemv geef hongf goonf tingf leengv. 6 Doouf-loh huh, doouf-loh lengv-hunf gau huf hee duf ga hemv geef hongf goonf dingf sipf zeef giaf vooi, biang hhungf zif doouf-loh bun tinv booiv famh soih gee neengv likf vau vooi, biang doouf-loh meenf zaif hooi soih huk nof vooi. 7 Eenv veeih lengv-hunf duf ga daiv vooi neeh gee tih duf ga luat soih vooi.
8 Guf seeh, doouf-loh zeekf hemv Gi-dukf hongf goonf daiv, ziuh siang sinf ya itf dingf hemv geef hongf goonf yoou. 9 Eenv veeih doouf-loh huh, Gi-dukf gif yianv lokf da lengv-hunf daiv tingf leengv vooi, ziuh meenf zaif daiv vooi, daiv ya meenf hhungf lai zif geef fooif hemv vooi. 10 Eenv veeih geef daiv tih doi soih daiv, zih lai fooif hee toof-too; geef yoou tih doi Siangf-dif yoou.
11 Teenf hee, meef-loh doi soih hheem dekf toof-too tih daiv gee, doi Siangf-dif, meef-loh hheem yoou da Gi-dukf Yev-so dekf toof-too tih yoou gee. 12 Guf seeh, meenf ngah biang soih yoou baiv meef-loh itf dingf dif daiv gee bun tinv huk voongf, biang meef-loh hingf sav bun tinv mee seeu gee see siangh. 13 Ya meenf ngah oouv zi hih meef-loh gee sev soih huk goouh seeu gee yungh, danf tih hheem zing lengv-hunf daiv tingf leengv neeh gee teenf hee, hianf toof-too sev Siangf-dif, ya hheem hianf zi hih meef-loh gee sev Siangf-dif huk goouh gung ngif gee yungh. 14 Soih itf dingf meenf hhungf lai zif meef-loh, eenv veeih meef-loh duf ga meenf yoou da lutf fapf vooi, tih yoou da een dianh vooi.
Hemv gung ngif huk nof
15 Teenf hee yuh di leeuf hee nif? Doouf-loh yoou da een dianh, meenf yoou da lutf fapf, ziuh hhoo yi famh soih haf? Zuatf deeif meenf noov lai! 16 Sangf tih meef-loh meenf huh, meef-loh hianf toof-too sev naf nee, fukf sungv naf nee, ziuh tih nof naf nee huf hee vooi haf? Hemv soih huk nof gee, giatf guah ziuh tih daiv, hemv Siangf-dif huk nof gee, ziuh bif yam tih ngif yinv vooi. 17 Gamh siaf Siangf-dif! Tuif yianf meef-loh gua na hemv soih huk nof gua, danf tih en teeif lokf da timv fukf sungv too suanf sev meef-loh gee giauf doouh vooi. 18 Gif yianv meef-loh bif tek lokf da soih uk miaf vooi, ziuh hemv gung ngif huk nof vooi.
19 Hauf eenv veeih meef-loh bun tinv gee mooh teh, ziuh ziuf lengv-hunf gee guan dianh miaf gang. Gua na meef-loh di leeuf hianf zi hih meef-loh gee sev teeh zeq hemv teeh ook seeu gee huk nof, biang toof-too mef miaf mef seeu; en teeif hheem hianf zi hih meef-loh gee sev gung ngif huk nof, biang toof-too mef miaf mef seengf giatf. 20 Eenv veeih meef-loh hemv soih huk nof gee tif hoouh, meef-loh ziuh meenf bif gung ngif guanh. 21 Teenf hee teeh en teeif meef-loh dekf tih hau zookf neeh gee, dang siv meef-loh huk gee tif hoouh lai gai gee maif lengv nif? Teeh neeh gee gee giatf guah ziuh tih daiv. 22 Danf tih en teeif, meef-loh gif yianv bif tek lokf da soih uk miaf vooi, hemv Siangf-dif huk nof vooi, ziuh giat makf seengf giatf mee uk miaf, giatf guah neeh mee ziuh tih yungh seeng. 23 Eenv veeih soih gee sinf gongv ziuh tih daiv; danf tih Siangf-dif gee een dianh, yoou da doouf-loh gee Zuh Gi-dukf Yev-so tih yungh seeng.