Siangf-dif meenf gengf lengv-hunf Yih-seef-liatf gee
11
1 Teenf hee, hauf dif tooi, sangf tih Siangf-dif gengf bek ting geef gee vooi haf? Zuatf deeif meenf tih! Eenv veeih hauf toof-too ya tih lengv-hunf Yih-seef-liatf gee, tih leekf lanv Yav-bov-la-hanf gee, tih Bianf-yav-mianv neeh mooqf zi faif gee. 2 Siangf-dif meenf gengf bek ting geef zoouh duf ga took neeh gee. Sangf tih meef-loh meenf huh yoou baiv ging veenv tia Yih-sif-yav tih di leeuf gang gee haf? Geef di leeuf yoou dau na Siangf-dif goou lengv-hunf Yih-seef-liatf gee bov, 3 "Zu haf, geef-loh ga sian zi meef gee vooi, sek gif hanv meef gee booiv vooi, zih teengh hauf toof-toof, geef-loh ya dif oouv mingh hauf yoou." 4 Danf tih Siangf-dif di leeuf tanv geef nif? Siangf-dif bov, "Hauf hooi toof-too luf sit senv na lengv-hunf, geef-loh tih lokf hau meenf hhuih gauh bai gungv Ba-lif gua gee." 5 Hongf yiangh, en teeif ya tih teenf hee, Siangf-dif ziuf een dianh liakf gee lengv-hunf, ya enf luf tiu to yoou. 6 Gif yianv tih ziuf een dianh, ziuh meenf tih lokf hengf hongh vooi, zeekf meenf tih eenv, een dianh ziuh meenf zaif tih een dianh vooi.7 Teenf hee yuh di leeuf gang nif? Lengv-hunf Yih-seef-liatf gukf lingf div gee, geef-loh daf meenf div lai heekf, zih lai lengv-hunf bif Siangf-dif liakf neeh gee deekf doongv vooi. Hhiv ha gee lengv-hunf zung bin daiv doonv tengf-tengf teenf hee vooi,
8 zing goh ging veenv tia gee teenf hee, ging veenv bov,
"Siangf-dif biang timv geef-loh gee luaq,
dav gee meenf dekf lai huh,
sav gee meenf hingf lai huh,
zi doongv veenf nooih."
9 Daf-vuif ya bov,
"Hhuf geef-loh faif hooif goonv moov gee tif hoouh bin tingf sai vooi,
bin tingf tuang vooi,
bin tingf dinf hhiauv gok mee vooi,
bin tingf geef-loh gee boouf ingf vooi.
10 Hhuf dav geef-loh gee laf vooi, meenf dekf lai huh,
hhuf meef biang loou geef-loh gee omf, meenf teenf lai vooi."
Hhiv ha minv zukf gee lengv-hunf deekf giuf
11 Teenf hee hauf dif bov, lengv-hunf Yih-seef-liatf gee seqf ziu hee vooi, ziuh dif det meenf uif lai vooi haf? Zuatf deeif meenf tih! Ngamf-ngamf siang fanh, eenv veeih geef-loh famh sook ngoh vooi, Siangf-dif ziuh oouv giuf een sev zee hhiv ha minv zukf gee lengv-hunf, biang geef-loh timv seeu hau booiv feenf deeuf. 12 Zeekf geef-loh gee sook ngoh, biang tooi ganv bin tingf vatf lai, geef-loh gee sitf baif, biang hhiv ha minv zukf gee lengv-hunf vatf lai, zeekf geef-loh suanv buf zung deekf giuf, dif yungh gang yoou haf?
13 Hauf hemv meef-loh lengv-hunf hhiv ha minv zukf gee gang, eenv veeih hauf tih lengv-hunf hhiv ha minv zukf gee seeh huv, guf seeh hauf vook hhoonv hauf fokf teeh gee seen feenf, 14 teenf hee, i sook hhoo yi biang engv tok hauf gee timv seeu hau booiv feenf deeuf, biang geef-loh lai feenh hee deekf giuf. 15 Zeekf geef-loh bif gengf, biang tooi ganv gee lengv-hunf hhoo yi hemv Siangf-dif maif goonf; teenf hee, zeekf geef-loh bif ziapf siuf, meenf tih deengh i daiv vooi yuh tingf leengv haf?
16 Zeekf boonh menh nauh hianf-hianf neeh hhootf hee tih seengf giatf gee, mianh neeh mooqf hee inf-inv ya tih seengf giatf gee; zeekf nyaf dun tih seengf giatf gee, ngev dun ya tih seengf giatf gee. 17 Zeekf eu ngev gi gamh longf, zip ngev dun gamh lamv sangv meef neeh gamh hee geen booiv, hongf goonf goonv nyaf dun gamh lamv neeh dun hee gungf ingf gee yiangh feenf, 18 meef ziuh meenf hau doi ngev dun gau neeh gee fof bak. Meef zeekf dif fof bak, ziuh hheem tiang tiang, meenf tih meef tooh nyaf dun, tih nyaf dun tooh meef. 19 I sook meef dif bov, "Eu gamh neeh gee longf miaf, tih veeih liauh zip hauf geen booiv." 20 Meenf sook, geef-loh eenv veeih meenf siang singf bif eu longf miaf, meef eenv veeih siang sinf, nah nyunv lai on. Meef meenf ngah giau ngoouf, siang fanh hheem mangf. 21 Gif yianv Siangf-dif meenf gov gamh gua na neeh gee, di leeuf gov meef nif?
22 Guf seeh meef hheem huh, Siangf-dif tih timv teeh yuh maif yuh ngiamf gee: Geef doi neef seqf det neeh gee tih ngiamf gee; danf tih zih iauf meef gif zukf luf yoou da geef gee ooi, geef doi meef tih timv teeh maif gee. Zeekf meef meenf tih eenv, meef ya dif bif damh longf miaf. 23 Geef-loh nif? Zeekf geef-loh meenf tih gif zukf meenf siang sinf, geef-loh ya dif bif sungf zip geen booiv, eenv veeih Siangf-dif hhoo yi sungf zip geef-loh geen booiv. 24 Meef tih damh lokf baiv gamh lamv sangv dun hee longf miaf gee, enf hhoo yi zip geen baiv gamh lamv sav-sav neeh dunf hee yoou, teenf huk tih vuih famh zeef yanv gee, gamh yuanv laiv neeh gee, dif sungf zip geen baiv dun yuanv laiv neeh dun hee, meenf tih geengf hau zip haf?
Suanf Yih-seef-liatf gee lengv-hunf zung dif deekf giuf
25 Engv tok haf, hauf meenf tiang meef-loh doi oouf mitf neeh mee meenf huh gai ziqf-ziqf, ha zinf meef-loh toof-too yih vuiv toof-too nyaif. Oouf mitf neeh mee ziuh tih: Lengv-hunf Yih-seef-liatf gee lai feenh hee timv luaq, foou doongv lengv-hunf hhiv ha minv zukf deekf giuf gee to mokf moon hoouh looif, 26 suanf Yih-seef-liatf zung dif deekf giuf. Zing goh ging veenv tia gee teenf hee, ging veenv bov,
"Itf dingf lai Giuf-zuh huf hee lokf Si-an uk miaf,
geef dif lokf lanf Yav-gookf mee seef itf siatf meenf gingf vuif gee timv uk booiv.
27 Hauf seef soih geef-loh gee uk booiv gee tif hoouh,
ziuh hemv geef-loh lipf iakf neeh mee."
28 Anf fukf im miaf gang, eenv veeih meef-loh, geef-loh huk Siangf-dif gee dikf yinv; anf Siangf-dif liakf gee miaf gang, eenv veeih zuh zung gee, geef-loh tih Siangf-dif dookf gee lengv-hunf. 29 Eenv veeih Siangf-dif sev gee een dianh hemv doi geef liakf gee lengv-hunf tih yungh yuanh meenf gaih bianf gee. 30 Zing goh gua na meef-loh meenf hingf sav Siangf-dif, en teeif eenv veeih geef-loh meenf hingf sav Siangf-dif, meef-loh daf bif Siangf-dif dookf hungh; 31 hongf yiangh, en teeif geef-loh ya meenf hingf sav Siangf-dif, eenv veeih meef-loh bif Siangf-dif dookf hungh, geef-loh en teeif ya bif Siangf-dif dookf hungh. 32 Eenv veeih, Siangf-dif oouv too lai gee lengv-hunf zung hoop yoou da lukf meenf hingf sav mee, tih veeih liauh dif dookf hungh too lai gee lengv-hunf.
33 Siangf-dif gee fung fuf, Siangf-dif gee zif huif hemv zi zikf meenf huh giauh lakf hemv giauh lakf!
Fuanf duanf geef gee meenf huh giauh ngaif saiv,
sunv geef gee meenf huh giauh ngaif div!
34 "Naf nee took timv teeh Zu mee,
naf nee huk sam meeuv geef gee gua?"
35 "Naf nee sian sev zee geef gua vooi,
biang geef hoouh looif fooh leengv nif?"
36 Eenv veeih too lai gee itf siatf zung tih lokf geef miaf gee,
i hhoouf geef, guiv leengv geef.
Yungv yauf guiv zee geef, zi doongv yungh yuanh. A meenh!