Meenf ngah bov engv tok gee
14
1 Meef-loh hheem ziapf siuf sinf sim mooh teh gee lengv-hunf, danf tih meenf ngah eenv veeih if gianf meenf hongf goonf ziuh zengv goonf. 2 Lai lengv-hunf siang sinf too lai gee goouh goonv zung hhoo yi goonv, danf tih sinf sim mooh teh gee lengv-hunf nah goonv sak toof-too. 3 Goonv gee lengv-hunf meenf ngah vook hhoo meenf goonv gee lengv-hunf, meenf goonv gee lengv-hunf ya meenf ngah bov goonv gee lengv-hunf, eenv veeih Siangf-dif duf ga ziapf siuf geef vooi. 4 Meef tih naf nee, daf bov leekf nof vanh huf hee nif? Geef nyunv on ha tih geef det, lai lanf zu geef huf hee guan geef, danf tih geef ya itf dingf nyunv lai on, eenv veeih Zu biang lai geef nyunv on.5 Lai lengv-hunf bov neeh veenf bih gakf veenf maif, ya lai lengv-hunf bov leeuf veenf duf hongf goonf. Zih iauf mui na lengv-hunf gian dingf toof-too gee if gianf ziuh maif vooi. 6 Lai lengv-hunf deekf biatf vook hhoonv veenf hee, geef teenf huk tih eenv veeih zun zungf Zu. Goonv gee lengv-hunf tih zun zungf Zu, eenv veeih geef veeih goouh geef goonv neeh gee gamh siaf Zu. Meenf goonv gee lengv-hunf ya tih zun zungf Zu, eenv veeih geef veeih liauh Zu meenf goonv, geef ya gamh siaf Zu. 7 Doouf-loh meenf lai naf nee tih veeih toof-too yoou gee, ya meenf lai naf nee tih veeih toof-too daiv gee. 8 Eenv veeih doouf-loh zeekf yoou, tih veeih Zu yoou; zeekf daiv, tih veeih Zu daiv. Too yi, doouf-loh meenf guan tih yoou ha tih daiv, zung tih Zu gee lengv-hunf.
9 Veeih liauh mukf dikf neeh mee, Gi-dukf daiv vooi, ya tingf leengv vooi, ziuh tih dif huk lengv-hunf daiv hemv lengv-hunf yoou gee Zu. 10 Teenf hee, meef veeih gai bov engv tok meef huf hee nif? Meef yuh veeih gai vook meenf uif engv tok meef huf hee nif? Doouf-loh zung dif nyunv yoou dau na simh fuanf haiv Siangf-dif mee ziapf siuf simh fuanf. 11 Eenv veeih yoou da ging veenv tia bov,
"Zu bov, hauf nyi hauf gee yungh seeng fat tooih,
leeuf na duf hheem hhuih hauf bai hauf,
leeuf na duf hheem hhooiv bak ngenv Siangf-dif."
12 Ziuf teenf hee dekf, doouf-loh mui na lengv-hunf zung dif yoou dau na Siang-dif giau daif toof-too huk gee teeh.
Meenf ngah huk engv tok det
13 Too yi, doouf-loh meenf ngah hemv goonf bov goonf vooi. Siang fanh hheem giatf dingf, zuatf deeif meenf huk engv tok det ha tih huk biang geef det gee teeh. 14 Hauf huh, hauf ya hhoouf Zuh Yev-so titf-titf siang sinf, goouh goonv gee beenh laiv zung tih bang gee, danf tih zeekf lai lengv-hunf bov tih meenf bang gee, doi geef miaf gang goouh neeh zuangv hee ziuh meenf bang vooi. 15 Meef zeekf eenv veeih goouh goonv biang engv tok meef huf hee nyung nyang, meef ziuh meenf tih ziuf aif sim huk teeh vooi. Gi-dukf duf ga veeih geef daiv vooi, meef meenf hau eenv veeih goouh goonv meef gee biang geef miatf voongv. 16 Too yi, meenf ngah biang meef-loh bov maif gee teeh, bif vanh gang tingf seeu gee vooi. 17 Eenv veeih gok gav Siangf-dif mee meenf tih gang goonv gang lumh, tih gang gung ngif, huav fingv, hemv Seengf-lingv sev gee eengv. 18 Too lai teenf hee booiv fokf teeh Gi-dukf gee, Siangf-dif ziuh ooi geef, hemv goonf ya ngenv geef.
19 Too yi, doouf-loh hheem zui hhiuv maif goonf gee teeh, hemv hemv goonf guh lif goonf gee teeh. 20 Meenf ngah eenv veeih goouh goonv gee teeh huk gongv Siangf-dif gee faih vooi. Itf siatf gee goouh goonv zung tih bang gee, danf tih, zeekf lai lengv-hunf eenv veeih goouh goonv huk vanh hhiauv det vooi, teenf hee geef ziuh huk meenf heekf vooi. 21 Meenf guan tih goonv nanh, goonv yan, ha tih huk teeh hhiv ha gee dif biang engv tok meef huf hee det, teenf hee ziuh sinf nginh meenf huk teeh neeh zuangv hee.
22 Meef lai sinf sim, ziuh hheem yoou dau na Siangf-dif gian sih meef gee sinf sim. Lengv-hunf huf hee zeekf huk teeh geef nginf vuiv heekf gee vooi, timv geef mee ya lai fingf anv, geef ziuh tih lengv-hunf lai fok huf hee. 23 Danf tih, timv geef mee zeekf huaiv ngiv, geef ya ziuf goonv yoou, geef ziuh lai soih vooi, eenv veeih geef meenf tih hhoouf sinf sim goonv gee. Huk gai teeh meenf tih hhoouf sinf simv booiv huk gee, zung tih soih.