3 Tooi yoou da Gi-dukf Yev-so hemv hauf hongf goonf huk gongv gee Baiv-gi-la hemv Yaf-zi-la maif; 4 geef-loh veeih liauh go mingh hauf hiuf hee sav ziqf hemv daiv mingh. Meenf danf-danv hauf gamh siaf geef-loh, ziuh tih hhiv ha minv zukf gee gookf mooqf giauf huif ya zung gamh siaf geef-loh.

5 Ya tooi yoou lanf geef-loh gee giauf huif maif. Tooi hauf dookf gee Yih-baif-niv-tuh maif, geef tih Yaf-si-yaf haih it huf siang sinf Gi-dukf gee lengv-hunf.

6 Ya tooi hooi meef-loh hho so huk gongv gee Mah-lif-a maif.

7 Tooi gua na hemv hauf hongf goonf ngov gamv gee sinf sik An-to-niv-guh hemv Yiuh-niv-yaf maif; geef-loh yoou da seeh huv gee tih lai ui voongf gee, ya tih sinf Gi-dukf bih hauf meng gee.

8 Tooi yoou da Zu gee hauf dookf gee Anf-bov-lif maif.

9 Ya tooi yoou da Gi-dukf hemv hauf-loh hongf goonf huk gongv gee Eev-ba-nuv, gangf hauf dookf gee Sif-daf-guh maif.

10 Tooi yoou da Gi-dukf gingv gua hhauh ngiamf gee Yav-bih-lif maif. Tooi Yaf-lif-to-buf gav lanf gee lengv-hunf maif.

11 Tooi sinf sik hauf huf hee Si-lov-tian maif. Tooi yoou lanf Nav-hhiv-suf gee sinf huv maif.

12 Tooi yoou da Zu hho so gee Tuh-feei-nav hemv Tuh-fuf-sa maif. Ya tooi hauf dookf gee Bih-si maif, geef yoou da Zu meenf huh giauh hho so huk gongv.

13 Tooi yoou da Zu bif liakf gee Luv-fuv hemv maih lai geef huf hee maif, maih lai geef huf hee ziuh tih maih lai hauf huf hee.

14 Tooi Yav-sunf-hhiv-tuv, Fov-leeqf-gan, Heei-miv, Ba-lov-ba, Heei-mah, gangf tooi hemv geef-loh yoou ningf goonf gee engv tok maif.

15 Tooi Feei-lov-lov-guh, Yiuh-lif-yaf, Niv-lif-yaf hemv gov Niv-lif-yaf huf hee, gangf tooi A-linv-ba hemv tooi hemv geef-loh yoou ningf goonf gee seengf huv maif.

16 Meef-loh hheem oouv bak seengf giatf mee hemv goonf hoomv goonf tooi goonf maif. Gi-dukf gee gookf mooqf giauf huif zung tooi meef-loh maif!

17 Engv tok haf, hauf hhin meef-loh hheem zuf if biang meef-loh meenf maif goonf, biang meef-loh hhiauv ling, biang meef-loh vuih famh hoouh lih meef-loh too hookf neeh gee gee lengv-hunf, meef-loh hheem deuf hingv geef-loh. 18 Eenv veeih lengv-hunf neeh zuangv hee meenf fokf teeh doouf-loh gee Zuh Gi-dukf, zih fokf teeh boqf toof-too mee, gang go en gee miaf tuat lengv-hunf daf luf gee. 19 Too lai gee sinf huv duf huh meef-loh hingf sav Zu, hauf hooi meef-loh eengv. Danf tih hi voongf meef-loh yoou teeh maif gee huk lengv-hunf nyaif huf hee, yoou teeh seeu gee huk lengv-hunf ngeenf huf hee.

20 Sev fingf anv gee Siangf-dif dif hhooiv oouv Sav-danf sah yoou dauf gok meef-loh vooi. Hhuf doouf-loh Zuh Yev-so gee een huif hemv meef-loh yoou ningf goonf.

21 Hemv hauf hongf goonf huk gongv gee Tiv-mov-haif hemv sinf sik hauf huf hee Luf-hhiuv, Ye-sun, Sov-si-ba-deekf, tooi meef-loh maif.

22 Hauf tih hooi Boouh-lov nganv bit tia tin neeh fungv gee Deekf-tiu, hauf ya yoou da Zu tooi meef-loh maif.

23 Gai-yiuh ziapf daif hauf, ya ziapf daif suanf giauf huif, geef tooi meef-loh maif. Yoou da heeuv huk saiv zingf gee Yih-la-du hemv Guatf-tuh engv tok tooi meef-loh maif.

24 Hhuf doouf-loh Zuh Yev-so Gi-dukf gee een huif, hemv meef-loh yoou ningf goonf. A meenh.

25 Gamh siaf Siangf-dif! Zih lai Siangf-dif biang lai hauf suanf sev meef-loh gee fukf im biang meef-loh gee sinf sim gian hhiangv. Fukf im neeh mee tih gang guan i Yev-so Gi-dukf gee siau sikf gee, tih lokf lauh zi miaf oop me gee oouf mitf. 26 Danf tih en teeif oouf mitf neeh mee, duf ga hongv gua sian zi gee tia gee sek doh uk miaf vooi, ya ziuf yungh seeng Siangf-dif gee mingf lingf sev too lai hhiv ha minv zukf gee lengv-hunf huh, ya biang geef-loh siang sinf fukf sungv Siangf-dif. 27 Hhuf yungv yauf hongv gua Yev-so Gi-dukf, guiv sev vuih itf gee zif huif gee Siangf-dif, zi doongv yungh yuanh. A meenh!