Meenf ngah feenv dangh feenv faif
3
1 Engv tok haf, hauf gua na hemv meef-loh gang go, enf meenf oouv lai meef-loh huk lengv-hunf suv lingv gee, nah oouv meef-loh huk sukf i tooi ganv gee lengv-hunf, dekf meef-loh tih yoou da Gi-dukf gee nungh nook. 2 Hauf oouv noq miaf hoo meef-loh, meenf tih oouv goouh luaq gee miaf emf meef-loh, eenv veeih neeh tif hoouh meef-loh meenf goonv lai goouh luaq gee yoou, ziuh tih en teeif meef-loh ya tih meenf goonv lai yoou, 3 eenv veeih meef-loh enf tih sukf i tooi ganv gee lengv-hunf yoou. Yoou da meef-loh lai timv seeu hemv zengv goonf, teenf hee meenf tih zingf mingv meef-loh tih sukf i tooi ganv gee, hengf teeh huk lengv-hunf hemv tooi ganv gee lengv-hunf hongf goonf haf? 4 Lai gee bov, "Hauf tih Boouh-lov neeh fiangf hee gee"; lai gee bov, "Hauf tih Yaf-bo-lov neeh fiangf hee gee"; teenf hee meef-loh meenf tih hemv tooi ganv gee lengv-hunf hongf goonf haf?5 Yaf-bo-lov tuif gai gee? Boouh-lov tuif gai gee? Hauf-loh meenf gua tih leekf nof Siangf-dif gee, meef-loh hongv gua hauf-loh sinf Zu; neeh gee meenf gua tih hauf-loh ziuf Zu gee an faiv booiv huk gee. 6 Hauf longf voonf vooi, Yav-bo-lov giuv namh, nah lai Siangf-dif biang geef nyoo uif. 7 Guf seeh longf voonf gee meenf tuif gai gee, giuv namh gee ya meenf tuif gai gee, nah lai Siangf-dif biang lai geef nyoo uif. 8 Longf voonf gee hemv giuv namh gee zung tih hongf goonf, danf tih doongv nooih gookf na dif ziuf toof-too hho so huk gee deekf doongv toof-too gee ziangf lif. 9 Eenv veeih hauf-loh tih hemf moh Siangf-dif huk gung gee, meef-loh tih veen niaf Siangf-dif huk huk neeh mee, tih lanf Siangf-dif huk huk neeh mee.
10 Hauf ziuf Siangf-dif sev hauf gee een dianh, zing hau gongv nyaif huf hee teenf hee, longf giak maif vooi, vanh yoou baiv huk lanf. Danf tih gookf na hheem zuf if di leeuf yoou baiv ninh huk. 11 Eenv veeih giak lanf duf ga longf maif neeh mee ziuh tih Yev-so Gi-dukf, seef giak lanf neeh mee vooi, meenf lai lengv-hunf longf lai gakf gee giak lanf. 12 Zeekf lai lengv-hunf oouv gimv, oouv ngoonf, oouv boouh sikf, oouv boot, oouv mookf, oouv mungh huk yoou baiv giak lanf neeh mee, 13 gookf na gee gung singv doongv nooih itf dingf doh uk miaf, eenv veeih doongv neeh veenf hee dif biang geef doh uk miaf, lai veeif biang geef doh uk miaf, veeif neeh gee dif hhuah ngamf gookf na gee gung singv di leeuf hee. 14 Lengv-hunf yoou giak lanf neeh mee huk gee gung singv zeekf boouh lai on, geef ziuh dif deekf doongv ziangf lif. 15 Lengv-hunf gee gung singv zeekf bif ngupf vooi, geef ziuh dif titf, tuif yianf geef toof-too dif deekf giuf, danf tih zing lokf da veeif gua teenf hee.
16 Sangf tih meef-loh meenf huh meef-loh tih Seengf-dianf Siangf-dif mee haf? Meenf huh Lingv Siangf-dif mee zih yoou da meef-loh haf? 17 Zeekf lai lengv-hunf fah Seengf-dianf Siangf-dif mee, Siangf-dif itf dingf dif miatf lengv-hunf neeh huf hee booiv; eenv veeih Seengf-dianf Siangf-dif mee tih seenv seengf gee, Seengf-dianf neeh mee ziuh tih meef-loh.
18 Naf nee duf meenf ngah toof-too tuat toof-too. Yoou da meef-loh zeekf lai lengv-hunf toof-too yih vuiv toof-too yoou tooi ganv neeh mee lai zif huif, geef ziuh hheem bin tingf ngeenf gee, hau biang geef bin tingf lai zif huif gee. 19 Eenv veeih tooi ganv neeh mee gee zif huif, yoou dau na Siangf-dif tih ngeenf gee. Zing goh ging veenv tia bov, "Geef biang lengv-hunf lai zif huif gee dok loouh gooi toof-too gee vooi." 20 Yuh bov, "Zu huh lengv-hunf zif huif neeh huf hee tiang gee tih meenf lai yungh gee." 21 Too yi meenf guan naf nee, duf meenf hau oouv lengv-hunf miaf fof bak, eenv veeih itf siatf zung tih meef-loh gee. 22 Meenf guan tih Boouh-lov, ha tih Yaf-bo-lov, ha tih Zi-fapf, ha tih sif gaif, tih yoou, tih daiv, ha tih en teeif gee teeh, ha tih doongv nooih gee teeh, suanv buf zung tih meef-loh gee; 23 danf tih meef-loh tih Gi-dukf gee, Gi-dukf tih Siangf-dif gee.