4 Gang doongv goonv goouh bai gungv yaih gua neeh gee, doouf-loh huh gungv yaih foof yaih neeh gee yoou tooi ganv meenf tuif gai gee, ya huh nah lai Siangf-dif huf hee toof-too, meenf lai gakf gee vooi. 5 Tuif yianf yoou baiv fa ha tih yoou dauf matf lai haih liauh yam tih tinf gee, zing goh lai haih liauh tinf haih liauh "zu" teenf hee, 6 danf tih doouf-loh nah lai Siangf-dif huf hee toof-too, ziuh tih Bef-lai, too lai itf siatf gee goouh zung tih lokf geef miaf gee, doouf-loh ya guiv geef vooi. Doouf-loh ya tih nah lai Zu huf hee toof-too, ziuh tih Yev-so Gi-dukf, too lai itf siatf gee goouh zung tih hongv gua geef soouh gee, doouf-loh ya tih hongv gua geef nah yoou gee.

7 Danf tih meenf tih too lai gee lengv-hunf zung took zi zikf neeh zuangv hee. Lai lengv-hunf eenv veeih gua na bai gungv yaih bai gen vooi, goonv goouh gee tif hoouh, ziuh yih vuiv goonv gee tih goouh bai gungv yaih gua gee. Eenv veeih liangf timv geef-loh gee mooh teh, ziuh bif luak zeq vooi. 8 Hhiv sitf goouh goonv meenf gaih lai bianf Siangf-dif doi doouf-loh gee dekf fap, eenv veeih doouf-loh meenf goonv ya meenf titf, goonv vooi ya meenf hooi geengf maif.

9 Danf tih, meef-loh hheem nook timv, ha zinf meef-loh gee neeh zuangv zeef yeeuv bin tingf dinf hhiauv gok lengv-hunf mooh teh mee vooi. 10 Meef tih lengv-hunf lai zi zikf huf hee, zeekf lai naf nee dekf huh meef yoou da miuh gungv gee goonv fiah, lengv-hunf neeh huf gee liangf timv zeekf tih mooh teh, meenf tih deengh i tih guh lif geef booiv goonv goouh bai gungv gua neeh gee vooi haf? 11 Teenf hee, engv tok mooh teh neeh huf hee, ziuh tih Gi-dukf hooi geef daiv gee neeh huf hee, ziuh eenv veeih zi zikf meef gee miatf voongv vooi! 12 Meef-loh teenf hee deekf zuif engv tok gee, liangf timv geef-loh gee mooh teh, meef-loh tiangv haih geef-loh, ziuh tih deekf zuif Gi-dukf vooi. 13 Too yi, goouh goonv gee zeekf biang engv tok hauf gee fau det, hauf ziuh yungh yuanh meenf goonv nanh, ha zinf biang engv tok hauf gee fau det vooi.