Meenf hau bai gungv yaih
10
1 Engv tok haf, meef-loh hheem oov loouh, zuh zung doouf-loh gee zung yoou dauf bah, zung lokf da hai gua, 2 zung yoou da bah da hai tuk leei vooi hemf moh Mov-si. 3 Geef-loh zung goonv lingv liangv zuangv hee hongf goonf, 4 zung goonv lingv namh zuangv hee hongf goonf. Geef-loh goonv namh neeh gee tih lokf lingv Dinf-danv hemf moh geef-loh neeh mee uk miaf gee, Dinf-danv neeh mee ziuh tih Gi-dukf. 5 Danf tih yoou da geef-loh lai feenh liauh hee tih Siangf-dif meenf ooi gee, too yi geef-loh zung daiv yoou da loouh vooi.6 Teeh neeh gee zung gingh goouf doouf-loh, yam doouf-loh meenf ngah ham teeh seeu gee, zing geef-loh ham gee teenf hee. 7 Meef-loh ya meenf ngah bai gungv yaih, zing geef-loh lai feenh hee bai gua teenf hee. Zing goh ging veenv tia bov, "Bek ting gee ngov longf goonv, ngov longf maq, uif miaf nyamv hau lakf." 8 Doouf-loh ya meenf ngah famh soih beeng bef beeng maih mee, zing geef-loh lai feenh hee famh gee teenf hee, veenf hee ziuh daiv voon vanh tamv senv na booiv vooi. 9 Doouf-loh ya meenf hau au Zu, zing geef-loh lai feenh hee tee Zu teenf hee, ziuh bif ngiaf gapf daiv vooi. 10 Doouf-loh ya meenf hau ngam, zing geef-loh lai feenh hee ngam teenf hee, ziuh bif oouv mingh gee hian seeh miatf booiv vooi.
11 Teeh neeh gee fatf seeng yoou baiv huf geef-loh, hau gingh goouf doouf-loh. Teeh neeh gee ya tia longf vooi, tih veeih liauh gingh goouf doouf-loh yoou tuqf-tuqf neeh mee tif hoouh gee lengv-hunf. 12 Too yi, too lai toof-too yih vuiv nyunv lai on gee, hheem nook timv, ha zinf det vooi. 13 Meef-loh tuh hhauh ngiamf neeh gee, tih naf nee duf tuh lai gee. Siangf-dif tih hhooh hhoouf gee, geef zuatf deeif meenf hooi biang meef-loh tuh gee siau guaf meef-loh tuh lai gee; yoou meef-loh tuh hhauh ngiamf gee tif hoouh, geef itf dingf hooi meef-loh hhooiv sunv hiuf hee uk, biang meef-loh tuh lai gua.
Deuf hingv teeh bai gungv yaih gee
14 Too yi, engv tok hauf gee haf, meef-loh hheem deuf hingv teeh bai gungv yaih neeh gee. 15 Hauf tiang hauf tih hemv lengv-hunf took hoouh li gee gang go, meef-loh toof-too hhoo yi fuanf duanf hauf gang gee heekf meenf heekf. 16 Goonv seengf san gee tif hoouh, doouf-loh veeih zungv neeh mee gamh siaf, meenf tih hemv baq Gi-dukf gee lai mingf feenh vooi haf? Bing doouf-loh loot-loot neeh mee, meenf tih hemv bun tinv Gi-dukf mee lai mingf feenh vooi haf? 17 Eenv veeih nah lai bing mooqf hee toof-too, doouf-loh tuif yianf liauh, ya tih bun tinv mooqf hee, eenv veeih doouf-loh hongf goonf goonv bing mooqf hee.
18 Meef-loh dekf lengv-hunf Yih-seef-liatf gee, neef goonv goouh bai Siangf-dif neeh gee meenf tih hemv gif hanv lai feenh haf? 19 Hauf bov go neeh gee tih gai gee if see nif? Tih bov goouh bai gungv gee heen haf? Ha tih bov gungv yaih gee heen? 20 Meenf, hauf tih bov meenf sinf Gi-dukf gee lengv-hunf hianf goouh neeh gee tih hianf sev yif hangv, meenf tih hianf sev Siangf-dif. Hauf meenf tiang meef-loh hemv yif hangv gee gua goonf. 21 Meef-loh goonv zungv Zu mee vooi, meenf hau goonv zungv yif hangv mee hemv; goonv ngaif Zu gee vooi, meenf hau goonv ngaif yif hangv gee hemv. 22 Doouf-loh dif tee Zu yianf hhif haf? Sangf tih doouf-loh bih geef enf heen haf?
Huk gai gee duf hheem yungv yauf Siangf-dif
23 Gai gee teeh duf huk lai, danf tih meenf tih leeuf hhinh duf lai ik. Gai teeh duf huk lai, danf tih meenf tih leeuf hhinh duf boongv lai tooh lengv-hunf. 24 Meenf guan tih naf nee, meenf ngah guf toof-too gee lif ikf, danf tih hheem guf vanh gee lif ikf.
25 Too lai goouh da heeuv ing neeh gee, meef-loh nah guf goonv, meenf ngah veeif liangf timv tooi gai gee, 26 eenv veeih ging veenv bov, "Matf hemv matf too lai gee itf siatf zung tih Zu gee."
27 Zeekf lai lengv-hunf meenf sinf Zu gee huf hee sing meef-loh booiv goonv fiah, meef-loh ya hheeng booiv, too lai goouh faif yoou dau na meef-loh neeh gee, meef-loh nah guf goonv, meenf ngah veeif liangf timv tooi gai gee. 28 Danf tih zeekf lai lengv-hunf seengv meef-loh bov, "Goouh neeh gee bai gungv gua vooi", teenf hee meef-loh ziuh veeih lengv-hunf seengv meef-loh neeh huf hee hemv veeih liangf timv, ziuh meenf ngah goonv. 29 Hauf bov gee liangf timv meenf tih meef toof-too mee, tih geef mee. Hauf gee zeef yeeuv veeih gai bif vanh gee liangf timv guanh nif? 30 Hauf zeekf gamh siaf vooi nah goonv, veeih gai eenv veeih goouh hauf gamh siaf neeh gee bif vanh an nif?
31 Too yi meef-loh meenf guan tih goonv ha tih maq, ha tih huk gai gee, duf hheem veeih yungv yauf Siangf-dif booiv huk. 32 Meenf guan tih lengv-hunf Yiuh-haif gee, lengv-hunf Si-laf gee, ha tih Siangf-dif gee giauf huif, meef-loh zung meenf hau biang huk geef det. 33 Danf tih hheem zing hauf teenf hee, too lai gee teeh zung biang hemv goonf eengv, meenf hhuf doi toof-too maif, nah hhuf doi hemv goonf maif, hau biang geef-loh deekf giuf.