Gai gee tih ooi
13
1 Hauf zeekf gang lai lengv-hunf gee gookf zuangv go, gangf hian seeh gee gookf zuangv go, danf tih meenf lai ooi, hauf meenf gua tih zing look lunf sav gee loof hemv zomf zev teenf hee. 2 Hauf zeekf lai sian zi gang doouf gee neengv likf, ya took gookf zuangv gee oouf mitf, gookf zuangv gee zi zikf, hauf zeekf lai huanv suanv gee sinf sim, biang hauf yif lai tiah gee booiv, danf tih meenf lai ooi, hauf ziuh meenf tuif gai gee. 3 Ziuh tuif hauf oouv gav teeh gee inf-inv booiv boongv neef ngah gee, ya tia lai sev huf toof-too mee zee vanh ngupf booiv, danf tih meenf lai ooi, doi hauf ya meenf lai gai gee maif lengv.4 Ooi tih hheem gungf tuh doongv tooi, ya hheem dookf hungh hemv; ooi tih meenf timv seeu; ooi tih meenf toof-too bov toof-too heen, meenf hiau ziang, 5 meenf huk ngaif nyo gee teeh, meenf hhuf toof-too gee lif ikf, meenf suif finh hheei hhif, meenf gif giauf vanh gee sook ngoh, 6 meenf ooi ook seeu, zih ooi zinv li. 7 Ooi tih gai teeh duf hheem boou yungv, gai teeh duf hheem siang sinf, gai teeh duf hheem fanf voongf, gai teeh duf hheem gungf tuh.
8 Ooi tih yungh yuanh meenf inv gee. Sian zi gang doouf gee neengv likf dif gua booiv, gang gookf zuangv go gee neengv likf ya dif hengf on, zi zikf ya dif gua booiv. 9 Eenv veeih doouf-loh huh gee tih feenh hee toof-too, sian zi gang gee ya tih feenh hee toof-too. 10 Danf tih foou huanv suanv gee neeh huf hee miaf doongv, neef meenf huanv suanv gee zung dif gua booiv vooi. 11 Hauf huk leekf nook gee tif hoouh, gang go zing leekf nook, timv teeh zing leekf nook, tiang fap zing leekf nook; en teeif nyoo vooi, ziuh suif teeh leekf nook gee booiv vooi. 12 Doouf-loh en teeif tih dekf ging, meenf dekf lai zinv, doongv neeh tif hoouh ziuh dif doi na goonf vooi. En teeif hauf huh gee tih feenh hee toof-too, doongv neeh tif hoouh ziuh huh inf-inv vooi, zing goh Zu huanv suanv huh hauf teenf hee.
13 En teeif siangf-siangf lai gee tih sinf sim, fanf voongf, ooi neeh tamv zuangv, hhiv zung zuif nyoo gee tih ooi.