3 Hauf gua na ziapf siuf vooi ya suanf sev meef-loh gee, hhiv zung zuif zungf iauf gee tih: Gi-dukf ziuf ging veenv gang gee, veeih soih doouf-loh gee daiv vooi, 4 ya bok vooi, ya ziuf ging veenv gang gee, haih tamv veenf tingf leengv vooi, 5 ya sev Zi-fapf dekf huh vooi, zip longf ya sev teepf ngeeih huf seeh huv dekf huh. 6 Seeif looif lai fooif hee sev ngoh bek lengf huf engv tok dekf huh, geef-loh lai feenh liauh hee doongv en teeif enf yoou yoou, ya lai feenh hee duf ga gua vooi. 7 Hoouh looif geef ya sev Yav-gookf dekf huh, ya sev too lai gee seeh huv dekf huh, 8 zuif heeuf ya sev hauf dekf huh, hauf zing lengv-hunf meenf zuk geuf ziuh lai uk miaf gee huf hee teenf hee.

9 Yuanv miaf hauf yoou da seeh huv gee tih zuif nook gee, meenf fui lai huk seeh huv, eenv veeih gua na hauf bik haih Siangf-dif gee giauf huif gua. 10 Danf tih hhoouf Siangf-dif gee een dianh, hauf nah tingf veenf nooih gee hauf vooi, geef sev hauf gee een dianh meenf dok namh. Hauf bih seeh huv gee leeuf huf duf hho so, hhiv sitf meenf tih hauf toof-too huk gee, tih Siangf-dif gee een dianh hemv hauf hongf goonf huk gee. 11 Meenf guan tih hauf ha tih hhiv ha gee seeh huv, hauf-loh teenf hee suanf, meef-loh ya teenf hee siang sinf vooi.

12 Gif yianv doouf-loh suanf Gi-dukf lokf da lengv-hunf daiv tingf leengv vooi, di leeuf yoou da meef-loh ya lai lengv-hunf bov meenf lai lengv-hunf daiv tingf leengv gee teeh nif? 13 Zeekf meenf lai lengv-hunf daiv tingf leengv gee teeh, Gi-dukf ya meenf lai tingf leengv gua lo. 14 Zeekf Gi-dukf meenf tingf leengv gua, hauf-loh suanf gee ziuh dok namh vooi, meef-loh siang sinf gee ya dok namh vooi. 15 Hauf-loh ya dif bif vanh nginf vuiv tih hooi Siangf-dif huk gev gianf zingf gee lengv-hunf vooi, eenv veeih hauf-loh hooi Siangf-dif huk gianf zingf bov, geef biang Gi-dukf tingf leengv vooi. Zeekf meenf lai lengv-hunf daiv tingf leengv, Siangf-dif ya meenf lai biang Gi-dukf tingf leengv gua. 16 Eenv veeih lengv-hunf daiv zeekf meenf tingf leengv, Gi-dukf ya meenf lai tingf leengv gua. 17 Gi-dukf zeekf meenf lai tingf leengv gua, meef-loh siang sinf gee ziuh dok namh vooi, meef-loh enf ziuf-ziuf yoou da soih yoou. 18 Teenf hee, neef yoou da Gi-dukf gua vooi neeh gee ya miatf voongv vooi. 19 Hauf-loh zeekf hhoouf Gi-dukf danf-danv yoou neeh tooi hee lai fanf voongf, ziuh bih too lai gee lengv-hunf enf lamf lee.

20 Hhiv sitf Gi-dukf duf ga lokf da lengv-hunf daiv tingf leengv vooi, tingf lengv-hunf gua vooi neeh gee gee makf ngau haih it neeh mee. 21 Gif yianv daiv tih lokf lengv-hunf huf hee miaf, lengv-hunf daiv tingf leengv ya tih lokf lengv-hunf huf hee miaf. 22 Zing goh yoou da Yav-dang too lai gee lengv-hunf zung daiv vooi teenf hee, hongf yiang, yoou da Gi-dukf too lai gee lengv-hunf ya zung dif tingf leengv. 23 Danf tih gookf na tih anf toof-too gee sunf sif tingf leengv: Makf ngau haih it neeh mee tih Gi-dukf, seeif looif yoou geef miaf gee tif hoouh, tih lengv-hunf siang sinf geef neeh gee tingf leengv. 24 Zip longf tuqf-tuq gee tif ganv doongv vooi, neeh tif hoouh, Gi-dukf dif miatf itf siatf huk voongf gee, ziangh hhinf gee, lai neengv likf gee inf-inv booiv, oouv hhinf voongf toof-too mee gauv leengv Bef-lai Siangf-dif. 25 Eenv veeih Gi-dukf itf dingf huk voongf, zi doongv Siangf-dif biang itf siatf gee dikf yinf zung fokf yoou dauf gok geef. 26 Zuif heeuf dif miatf gee dikf yinf ziuh tih daiv. 27 Eenv veeih ging veenv bov, "Siangf-dif biang too lai itf siatf gee goouh zung fokf yoou dauf gok geef." Gif yianv bov too lai itf siatf gee goouh zung fokf geef vooi, huh zinf-zinv neef biang too lai itf siatf gee goouh zung fokf geef gee Siangf-dif meenf boou guatf yoou da vooi. 28 Doongv too lai itf siatf gee goouh zung fokf geef vooi, neeh tif hoouh Leekf-da-hhiangh toof-too ya dif fokf Siangf-dif, ziuh tih fokf biang too lai itf siatf gee goouh zung fokf geef gee neeh huf hee, biang Siangf-dif siau guaf itf siatf, huk too lai itf siatf goouh gee Zu.

29 Zeekf meenf tih teenf hee, neef hooi lengv-hunf daiv tuk leei neeh gee, tih veeih gai gee nif? Zeekf lengv-hunf daiv zuatf deeif meenf tingf lai leengv, veeih gai dif hooi geef-loh tuk leei nif? 30 Hauf-loh yuh veeih gai gi tif duf moouf hhiamh nif? 31 Engv tok haf, hauf veenf-veenf sav zipf hemv daiv mingh. Neeh gee tih hauf hongv gua hauf yoou da doouf-loh gee Zuh Yev-so Gi-dukf, eenv veeih meef-loh fof bak gang gee. 32 Ziuf lengv-hunf gee dekf fap, gua na hauf yoou Yih-foh-soh hemv goouh sangv gee git goonf, doi hauf lai gai gee maif lengv nif? Zeekf lengv-hunf daiv meenf tingf leengv,

"Doouf-loh ziuh gaiv lai goonv ziuh goonv, gaiv lai maq ziuh maq lo! Eenv veeih bak zeekf ziuh dif daiv vooi."

33 Meef-loh meenf ngah biang lengv-hunf ziuv teef meef-loh; "Goop feengf yu seeu gee tih huk lengv-hunf faih." 34 Meef-loh hheem huh sook gua miaf, hheem hengf maif, meenf ngah famh soih fooif hemv vooi, eenv veeih yoou da meef-loh lai lengv-hunf meenf took Siangf-dif. Hauf gang go neeh gee hee tih biang meef-loh hau zookf.

35 Danf tih, lai lengv-hunf dif tooi bov, "Lengv-hunf daiv di leeuf tingf leengv nif? Geef-loh dai huf gai mee miaf nif?" 36 Lengv-hunf ngeenf gee haf, voonf meef sav-sav neeh mee zeekf meenf daiv booiv, ziuh meenf ngukf lai ngoouh tengv nyoo. 37 Bingf siah voonf meef-loh sav neeh mee, meenf tih doongv nooih dif nyoo uif gee yiangh mee. Meenf gua tih voonf mooqf hee luangf-luangv, i sook tih voonf mekf mooqf hee, ha tih voonf gai gee mooqf hee. 38 Danf tih Siangf-dif ziuf toof-too gee if see sev yiangh mee zee geef, ya sev voonf leeuf zuangv leeuf mooqf duf lai toof-too gee yiangh mee. 39 Too lai gee bun tinv ya meenf tih zung hongf goonf, lengv-hunf lai lengv-hunf gee yiangh mee, suk tengv lai suk tengv gee yiangh mee, nokf lai nokf gee yiangh mee, bav lai bav gee yiangh mee. 40 Lai baiv fa gee yiangh hemv dauf matf gee yiangh; danf tih baiv fa gee yiangh gee luang tih zuangv hee, dauf matf gee yiangh gee luang yuh tih gakf zuangv hee. 41 Da veenf lai da veenf gee bangv, maih saiv lai maih saiv gee bangv, leekf saiv lai leekf saiv gee bangv, leekf saiv hemv leekf saiv ya bangv meenf hongf goonf.

42 Lengv-hunf daiv tingf leengv ya tih teenf hee. Sav gee tih dif deeif gee, tingf leengv gee tih meenf deeif gee; 43 sav gee tih hau zookf gee, tingf leengv gee tih yungv yauf gee; sav gee tih mooh teh gee, tingf leengv gee tih lai lingf gee; 44 sav gee tih lai baq lai nanh gee bun tinv, tingf leengv gee tih sukf i Lingv gee bun tinv.

Gif yianv lai lai baq lai nanh gee bun tinv, ya dif lai sukf i Lingv gee bun tinv. 45 Yoou baiv ging veenv ya tih teenf hee tia gee, ging veenv bov, "Haih it huf lengv-hunf 'Yav-dang' tingf lai yingf mingh gee lengv-hunf huf hee", danf tih zuif heeuf gee 'Yav-dang' tingf sev yinf mingh zee lengv-hunf gee Lingv mee. 46 Danf tih meenf tih sukf i Lingv gee yoou na, tih lai baq lai nanh gee yoou na, seeif looif nah lai sukf i Lingv gee. 47 Haih it huf lengv-hunf tih lokf matf gee uk miaf, tih sukf i boongf gee; haih ngeeih huf tih lokf baiv fa miaf gee. 48 Neef sukf i boongf gee di leeuf, too lai sukf i boongf gee ya di leeuf; neef sukf i baiv fa gee di leeuf, too lai sukf i baiv fa gee ya di leeuf. 49 Doouf-loh di leeuf lai sukf i boongf gee tiang feenh, doongv nooih ya dif di leeuf lai sukf i baiv fa gee tiang feenh.

50 Engv tok haf, hauf seengv meef-loh, lai baq lai nanh gee bun tinv meenf teengf lai tuh Siangf-dif gee gok gav, dif deeif gee meenf teengf lai tuh meenf deeif gee. 51 Meef-loh hingf loouh, en teeif hauf seengv oouf mitf mee zee meef-loh: Doouf-loh meenf tih zung dif daiv, tih zung dif gaih bianf, 52 hooh mee look zuif heeuf neeh fooif gee tif hoouh, ngiap makf dav ziu hee, doouf-loh zung dif gaih bianf. Eenv veeih hooh it look, lengv-hunf daiv gee zung dif tingf leengv, tingf meenf deeif gee vooi. Doouf-loh ya dif gaih bianf, 53 eenv veeih bun tinv dif deeif neeh mee itf dingf hheem lak bun tinv meenf deeif neeh mee loouh; bun tinv dif daiv neeh mee itf dingf hheem lak bun tinv meenf daiv neeh mee loouh. 54 Gi tif bun tinv dif deeif neeh mee lak bun tinv meenf deeif neeh mee loouh vooi; bun tinv dif daiv neeh mee lak bun tinv meenf daiv neeh mee loouh vooi. Neeh tif hoouh go yoou baiv ging veenv neeh gee hee ziuh bin tingf titf vooi, ging veenv bov "Yingf vooi, daiv bif yingf lop booiv vooi".

55 Daiv haf, meef yingf yoou leeuf nif?

Daiv haf, unv dukf meef ziv hee yoou leeuf nif?

56 Daiv gee unv dukf ziuh tih soih, soih gee hhinf ti ziuh tih lutf fapf. 57 Danf tih gamh siaf Siangf-dif, geef hongv gua doouf-loh gee Zuh Yev-so Gi-dukf sev doouf-loh yingf.

58 Guf seeh, hauf dookf gee engv tok haf, meef-loh hheem gian dingf, meenf ngah noonv booiv noonv leengv, siangf-siangf gukf lingf huk gongv Zu gee, eenv veeih meef-loh huh, meef-loh veeih Zu huk hho meenf tih huk leeif-leeiv gee.