2 Zing goh sian zi Yih-saif-yav yoou da sek geef gee tia gee teenf heen,

4 Titf titf tih teenf heen hooi lengv hunf tuk leei gee Ye-hanf miaf vooi,

yoou da loouh suanf gang lengv hunf hheem huiv gaih ziapf siuf tuk leei,

Siangf-dif ziuh min soih geef loh gee.

5 Suanf bak lengv Yiuh-haif gee lengv hunf,

boou guatf suanf Ye-luf-sa-leengh gee lengv hunf,

zung miaf ningf Ye-hanf neeh hhootf hee,

singv nginf toof too lai soih,

Ye-hanf ziuh yoou Ye-danf-hoov hooi geef loh tuk leei vooi.

6 Ye-hanf dingv yua oouv vunf lookf hoov miaf huk gee hiuf hee,

loou mee gatf heeif nangv hiuf hee,

ziauh hemv liangv sangv tih fiah geef gee.

7 Geef suanf gang bov,

"Dif lai huf hee miaf seeif gua hauf,

danf tih neengv likf geef gee bih hauf nyoo,

hauf ziuh tih omf loou longf hooi geef geq ba haif duf meenf fui.

8 Hauf oouv namh hooi meef loh tuk leei,

danf tih geef dif oouv Seengf-lingv hooi meef loh tuk leei."

9 Neeh tif hoouh,

Yev-so lokf Gia-lif-lif seengh gee Nah-saf-leekf zinf miaf,

yoou Ye-danf-hoov Ye-hanf hooi geef tuk leei vooi.

10 Yev-so giangf lokf da namh geen miaf,

ziuh dekf huh fa mee iakf vooi,

Seengf-lingv zing goop huf hee teenf heen longf miaf yoou baiv huf geef.

11 Yuh lai sauv mee lokf baiv fa miaf bov,

"Meef tih hauf dookf gee Leekf-da-hhiangh,

hauf ooi meef."

12 Seengf-lingv ziuh mah siangf soiv Yev-so booiv da loouh vooi.

13 Geef yoou ninh tee teepf veenf,

tuh Sav-danf tee.

Geef hemv goouh sangv gee yoou ningf goonf,

ya lai hian seeh^c miaf heng hoouh geef.

14 Vanh hoof Ye-hanf loouh gamv hoouh looif,

Yev-so booiv Gia-lif-lif suanf Siangf-dif gee fukf im.

15 Geef bov,

"Tif ganv doongv vooi,

Siangf-dif gee gok gav dif miaf doongv vooi,

meef loh hheem huiv gaih,

siang sinf fukf im."

16 Yev-so lokf ningf hoomf Gia-lif-lif booiv,

dekf huh Si-meenv hemv tok geef huf hee An-deekf-liatf yoou da hoomf tan sai hoof bav,

eenv veeih geef loh tih bef hoof bav gee.

17 Yev-so ziuh yam geef loh bov,

"Meef loh miaf hemf moh hauf,

hauf dif biang meef loh yin lengv hunf di hoouf hoouf miaf hemf moh hauf,

zing meef loh hoof bav teenf heen."

18 Geef loh ziuh mah siangf fengf sai gee longf,

di moh geef vooi.

19 Yev-so gif zukf booiv meenf lai giauh looiv,

yuh dekf huh leekf da hhiangh Si-bif-haif voon huf --- Yav-gookf hemv tok geef huf hee Ye-hanf yoou baiv luaf feengv sai.

20 Yev-so mah siangf yam geef loh,

geef loh ziuh teengh bef lai geef loh huf hee Si-bif-haif hemv leekf gongv gee yoou baiv luaf,

di moh Yev-so booiv vooi.

21 Geef loh miaf doongv heeuv Gia-baiv-nungv mee,

giangf doongv An-sikf-veenf^d,

Yev-so ziuh loouh huif hangv vooi maiv lengv hunf.

22 Geef maiv gee hemv goonf zung hhiv guaif,

eenv veeih geef maiv geef loh gee tif hoouh,

zing lengv hunf lai hhinf huf hee teenf heen,

hemv Siangf-dif lutf fapf gee lauh see meenf hongf goonf.

23 Dang siv,

yoou huif hangv lai lingv zeq geen huf gee lengv hunf huf hee,

it ziu yanh uif,

bov,

24 "Meef dif huk gai gee?

Nah-saf-leekf gee Yev-so,

meef miaf miatf hauf loh haf?

Hauf huh meef tih naf nee,

meef tih Siangf-dif gee Seengf-zeh."

25 Yev-so hiak yif hangv neeh huf hee bov,

"Meen geef,

lokf huf geef uk booiv!"

26 Lingv zeq mee ziuh biang lengv hunf neeh huf hee suv van,

yanh ziu hee meenf huh giauh look,

ziuh lokf huf lengv hunf neeh huf hee uk miaf vooi.

27 Hemv goonf zung meenf huh giauh hhiv guaif,

hemv goonf bov,

"Neeh gee tih teeh gai gee nooh?

Neeh mee tih hoouh li nauh mee ho,

geef daf lai hhinf mingf lingf lingv zeq gee,

lingv zeq gee ya hingf go geef."

28 Nooiv Yev-so mee it ziu ziuh suanf look hoou bak lengv Gia-lif-lif gee vooi.

29 Yev-so giangf lokf huif hangv uk miaf,

ziuh hemv Yav-gookf gangf Ye-hanf booiv lanf Si-meenv hemv An-deekf-liatf vooi.

30 Maih niah Si-meenv huf hee bik hang lap yoou baiv tangf nenh,

geef loh ziuh mah siangf seengv Yev-so.

31 Yev-so ziuh booiv ningf geef,

diuf lokf moof geef loouh,

tooh geef uif,

geef ziuh meenf hang vooi,

ziuh uif miaf oouv goouh zee geef loh goonv.

32 Da veenf dok vooi veenf dif yoop gee tif hoouh,

lai lengv hunf yin lengv hunf fingh gee,

hemv bif yif hangv geen huf gee inf inv miaf div Yev-so.

33 Suanf heeuv gee lengv hunf zung miaf vif yoou bak deenh.

34 Yev-so yiav haih liauh lai fingh gookf zuangv gookf yiangh gee lengv hunf maif vooi.

Ya voouf haih liauh yif hangv lokf da huf lengv hunf uk miaf,

geef meenf sev yif hangv gee gang go,

eenv veeih yif hangv gee took geef.

35 Haih ngeeih veenf zauf zau,

veenf duf meenf bangv yoou,

Yev-so ziuh uif miaf,

toof too booiv da loouh vooi doouh goouf.

36 Si-meenv hemv lengv hunf hemv geef yoou ningf goonf neeh gee booiv div Yev-so,

37 div heekf vooi,

geef loh ziuh hemv Yev-so gang bov,

"Hemv goonf zung div meef nenh."

38 Yev-so bov,

"Doouf loh booiv gakf hhootf,

booiv voo loof loo ningf neeh gee vooi,

hauf hau yoou ninh gang doouf,

eenv veeih hauf ziuh tih veeih teeh neeh hhinh hee miaf gee."

39 Yev-so ziuh ngeeu lengv Gia-lif-lif gee hoouf hoou,

loouh huif hangv geef loh gee vooi gang doouf,

ya voouf yif hangv.

40 Lai lengv hunf tingf ma fungv huf hee miaf ningf Yev-so vooi,

hhuih longf hhuf Yev-so bov,

"Meef zeekf hheeng,

meef itf dingf biang lai hauf maif ya bang vooi."

41 Yev-so dookf hungh geef,

ziuh nyof moof gamf geef,

bov,

"Hauf hheeng,

meef bang lo!"

42 Fingh ma fungv it ziu ziuh huat huf geef,

geef ziuh maif bang vooi.

43 Yev-so mengf meng yam lengv hunf neeh huf hee booiv vooi,

ya ngiamf ngiamf zuk geef,

44 bov,

"Meef hheem zeeq tooi,

senv vanh meenf ngah seengv teeh neeh hhinh hee zee vanh.

Danf tih meef hheem booiv ningf gif see vooi,

biang geef hooi meef dekf ziu,

meef duf ga maif bang vooi,

meef ya hheem ziuf Mov-si gui dingf gee oouv goouh hianf sev Siangf-dif,

biang hemv goonf huh meef duf ga maif bang vooi.^e"

45 Danf tih lengv hunf neeh huf hee giangf uk booiv,

ziuh doongv lengv suanf teeh neeh hhinh hee,

biang hemv goonf zung huh vooi.

Biang Yev-so meenf gung lai hhai loouh heeuv fooif hemv vooi,

geef ziuh luf yoou ningf heeuv gee da loouh,

danf tih lengv hunf gee ya hongf yiangh lokf leeuf lokf letf miaf div geef.