Siangf-dif hheekf see tiangv timv
6
1 Lengv hunf gee yoou bak matf hhai sih siv mef miaf mef liauh vooi,
ya lai leemf leekf gee tif hoouh,
2 Siangf-dif gee Leekf-da-hhiangh dekf huh lengv hunf gee leemf leekf luang,
ziuh suf saih liakf miaf huk maih.
3 Ye-hheev-huav ziuh bov,
"Gif yianv lengv hunf gee bun tinv tih dif daiv gee,
Lingv hauf mee ziuh meenf yungh yuanh zih yoou da geef vooi,
danf tih geef enf hhoo yi goonv doongv it bek ngih teepf tui."
4 Yoou neeh duanf tif ganv hemv hoouh looif gee tif ganv,
yoou bak matf lai lengv hunf yuh nyoo yuh hangv,
yuh lai neengv likf gee.
Geef loh tih Siangf-dif gee Leekf-da-hhiangh hemv lengv hunf gee leemf leekf lai gee,
geef loh ya tih guh daif yuh heen yuh lai nooiv gee lengv hunf.
5 Ye-hheev-huav dekf huh lengv hunf gee yoou bak matf seeu inv seeu bang vooi,
veenf veenf goomh goomh zung tih tiang teeh seeu gee.
6 Geef ziuh eenv veeih geef soouh lengv hunf yoou bak matf tiangv timv,
timv mee ngaif tuh.
7 Ye-hheev-huav ziuh bov,
"Hauf dif miatf hauf soouh gee lengv hunf hemv dungf veetf gangf mingf gangf nokf vinv yoou baiv fa neeh gee inf inv lokf bak matf booiv,
eenv veeih hauf soouh geef loh vooi,
timv mee hheekf see ngaif tuh."
8 Danf tih Ye-hheev-huav vook hhoonv Nov-yaf.
Siangf-dif mingf lingf Nov-yaf huk foong zeeu
9 Nov-yaf gee teeh gif yoou dauf ninh:
Nov-yaf tih ngif yinv huf hee,
yoou geef neeh mooqf tooi ganv,
nah lai geef toof too tih lengv hunf maif,
geef hemv Siangf-dif meenf huh giauh maif goonf.
10 Nov-yaf lai leekf da hhiangh tamv huf,
ziuh tih Sanv,
Hanv hemv Yav-fov.
11 Dang siv Siangf-dif dekf tooi ganv neeh mee faih inv vooi,
bak matf leeuf ziqf duf git goonf ga goonf.
12 Geef vook sif gaif mee,
huh bak matf too lai gee lengv hunf zung seeu inv seeu bang vooi,
tooi ganv neeh mee too lai lai yinf mingh gee zung seeu inv seeu bang vooi.
13 Siangf-dif ziuh hemv Nov-yaf gang bov,
"Hauf dif miatf goouh lai yinf mingh gee inf inv booiv,
eenv veeih geef loh bak matf nah git goonf ga goonf neeh gee dik vooi.
Meef dekf,
hauf dif miatf geef loh hemv tooi ganv neeh mee inf inv booiv.
14 Meef hheem oouv mokf gee feei gee miaf huk foong zeeu hauv hee,
da ninh hheem gek di ganv ganv vooi,
hheem oouv yuf dikf singf gee miaf metf da metf ningf hoouf hoou loouh.
15 Meef hheem teenf huk foong zeeu hauv hee:
Gooh hauv hee hheem looiv it bek tamv teepf tamv gung sikf,
hhuat ngih teepf ngeeih gung sikf,
hangv teepf tamv gung sikf.
16 Yoou baiv foong zeeu hheem huk hian suang,
hangv ngoh teepf gung feen.
Gooh hauv hee ya hheem huk deenh mee yoou ningf.
Gooh hauv hee hheem huk sangf zung hiaf tamv soongf.
17 Meef dekf,
hauf dif tingf namh nyoof nyoo miaf mutf matf gee inf inv booiv,
miatf suanv sif gaif too lai lai hheei lai yinf mingh gee goouh yoou daiv inf inv booiv,
fa matf too lai gee goouh yoou leeuf zuangv duf hheem daiv bang.
18 Danf tih hauf dif hemv meef lipf ye.
Meef hhoo yi loouh foong zeeu,
meef hheem yin leekf da hhiangh meef gee hemv maih meef huf hee,
gangf tinf fuh meef gee hemv meef hongf goonf loouh foong zeeu.
19 Too lai gee goouh yoou,
leeuf zuangv meef duf hheem dai deei hee,
ziuh tih hauh huf hee maih huf hee,
loouh foong zeeu,
hau hemv meef hongf goonf lai mingh yoou.
20 Nokf gookf zuangv vinv neeh gee,
hemv dungf veetf gee,
gangf goouh leeqf dauf matf neeh gee,
hheem ziuf di zuangv zuangv di leeif leeif,
leeuf zuangv duf dai deei hee doongv ningf meef neeh hhootf hee,
hau go lai mingh geef loh.
21 Goouh goonv gee leeuf zuangv meef duf hheem sunf uif miaf,
hau biang meef hemv geef loh lai goouh goonv."
22 Nov-yaf ziuh teenf huk vooi,
too lai Siangf-dif zuk geef gee,
geef zung ziuf booiv huk vooi.