Tingf namh
7
1 Ye-hheev-huav hemv Nov-yaf gang bov,
"Meef hemv meef suanf lanf hheem loouh foong zeeu vooi,
eenv veeih yoou neeh mee tooi ganv,
nah lai meef toof too yoou dau na hauf tih ngif yinv.
2 Too lai dungf veetf bang neeh gee,
meef hheem di zuangv dai sit huf hauh sit huf maih;
dungf veetf meenf bang neeh gee,
meef hheem di zuangv dai hauh huf hee maih huf hee;
3 nokf baiv fa gee meef ya hheem di zuangv dai sit huf hauh sit huf maih,
teenf heen,
goouh leeuf zuangv duf lai voonf luf yoou bak matf vooi.
4 Eenv veeih gua sit veenf hemv,
hauf dif dok funv yoou bak matf tee teepf veenf tee teepf goomh,
miaf miatf goouh hauf soouh lai yinf mingh neeh gee inf inv lokf bak matf booiv."
5 Too lai Ye-hheev-huav zuk gee,
Nov-yaf zung ziuf booiv huk vooi.
6 Tingf namh yoou bak matf gee tif hoouh,
Nov-yaf ngamf ngamf lokf bek tui.
7 Eenv veeih dif tingf namh,
Nov-yaf ziuh hemv leekf da hhiangh geef gee,
maih geef huf hee gangf tinf fuh geef gee zung loouh foong zeeu vooi met.
8 Dungf veetf bang neeh gee hemv meenf bang neeh gee,
gangf nokf gee hemv too lai goouh leeqf yoou dauf matf neeh gee,
9 hauh huf hee maih huf hee,
di deei deei booiv ningf Nov-yaf neeh hhootf hee,
loouh foong zeeu vooi,
zung tih zing Siangf-dif zuk Nov-yaf gee teenf heen.
10 Gua neeh sit veenf vooi,
ziuh tingf namh meenf huh giauh nyoo,
mutf matf gee inf inv vooi.
11 Nov-yaf lokf bek tui neeh veeif gee ngih ngitf teepf sit neeh veenf hee,
too lai namh maf dof dauf matf gee zung iakf inf inv vooi,
apf baiv fa gee ya hheeif inf inv vooi.
12 Diaqf funv tee teepf veenf tee teepf goomh yoou dauf matf meenf hengf ziuf ziu.
13 Ziuh tih neeh veenf hee,
Nov-yaf hemv leekf da hhiangh geef tamv huf—Sanv,
Hanv,
Yav-fov,
maih geef huf hee gangf tinf fuh geef tamv huf zung loouh foong zeeu vooi.
14 Geef loh suanf lanf hemv too lai gee dungf veetf,
goouh sangv gee di zuangv zuangv di leeif leeif,
goouh tiangh gee di zuangv zuangv di leeif leeif,
goouh leeqf dauf matf gee di zuangv zuangv di leeif leeif,
nokf gee,
ziuh tih too lai lai vunf lai bik gee,
di zuangv zuangv di leeif leeif,
15 too lai lai hheei lai yinf mingh gee goouh yoou zung di deei deei teenf heen miaf ningf Nov-yaf neeh hhootf hee,
loouh foong zeeu vooi.
16 Too lai dungf veetf loouh foong zeeu neeh gee,
zung lai hauh lai maih,
zing Siangf-dif zuk Nov-yaf gee teenf heen.
Nov-yaf loouh booiv hoouh looif,
Ye-hheev-huav ziuh hoop deenh foong zeeu mee loouh vooi.
17 Tingf namh yoou bak matf tee teepf veenf,
namh gee hangh geen hangh hangv,
foong zeeu hauv hee ziuh vauv lokf dauf matf uif vooi.
18 Namh gee meenf huh giauh nyoo hemv giauh nyoo,
geen meenf huh giauh hangv hemv giauh hangv,
mutf matf gee inf inv booiv vooi,
foong zeeu hauv hee yoou bak namh tuakf booiv tuakf leengv.
19 Namh gee yoou bak matf mef miaf mef nyoo,
tiah dauf matf hangf hangv neeh gee zung mutf inf inv booiv vooi.
20 Namh gee hangh geen hangh hangv,
daf hhaif hangv gua deng tiah gee sit gung sikf vooi.
21 Bak matf too lai lai yinf mingh gee dungf veetf,
meenf guan tih nokf gee,
goouh tiangh gee,
goouh sangv gee,
ha tih goouh leeqf yoou bak matf neeh gee,
gangf too lai gee lengv hunf zung daiv inv daiv bang vooi.
22 Bak matf too lai liangh hheei lai yinf mingh gee zung daiv inv vooi.
23 Ye-hheev-huav ziuh tih teenf heen miatf bak matf too lai gee dungf veetf booiv vooi,
lengv hunf gee,
goouh sangv gee,
goouh tiangh gee,
goouh leeqf leeqf neeh gee,
gangf nokf baiv fa gee zung miatf inv vooi.
Neeh itf siatf zung lokf bak matf miatf inf inv booiv vooi.
Nah teengh Nov-yaf gangf hemv geef yoou da foong zeeu gee lengv hunf hemv dungf veetf meenf daiv.
24 Tingf namh meenf huh giauh nyoo,
mutf bak matf it bek ngoh teepf veenf.