Siangf-dif hemv Nov-yaf lipf ye
9
1 Siangf-dif sev fok zee Nov-yaf hemv leekf da hhiangh geef gee,
hemv geef loh gang bov,
"Meef loh hheem lai leekf liauf liauh,
tan dik bak matf vooi.
2 Too lai deuf yoou dauf matf gee dungf veetf,
too lai nokf vinv yoou baiv fa neeh gee,
linf too lai goouh leeqf yoou dauf matf neeh gee hemv too lai bav yuf yoou da hai neeh gee zung dif mangf meef loh,
zung guiv meef loh guanh.
3 Too lai yoouf yoou gee dungf veetf meef loh zung hhoo yi huk goouh goonv.
Neeh itf siatf hauf zung sev zee meef loh,
zing gua na hauf sev sak zee meef loh goonv teenf heen.
4 "Danf tih meef loh meenf zun goonv nanh lai baq gee,
eenv veeih baq ziuh tih yinf mingh.
5 Leeiv baq meef loh gee,
huk meef loh daiv gee,
hauf itf dingf oouv mingh geef hiuf hee miaf fooh;
meenf guan tih dungf veetf ha tih lengv hunf,
hauf ya itf dingf oouv mingh geef hiuf hee miaf fooh.
Teenf heen doi toof too gee engv tok gee,
ya itf dingf yam geef teenf fooh.
6 Too lai leeiv baq lengv hunf gee,
lengv hunf ya itf dingf biang geef leeiv baq.
Eenv veeih Siangf-dif soouh lengv hunf,
tih ziuf yiangh geef mee miaf soouh gee.
7 Meef loh hheem lai leekf liauf liauh geef,
siv dik bak matf vooi."
8 Siangf-dif hemv Nov-yaf gangf hemv geef yoou ningf goonf gee leekf da hhiangh gang bov,
9 "Noh,
en teeif hauf dif hemv meef loh gangf heeuf daif meef loh gee lipf ye,
10 gangf hemv too lai hemv meef loh yoou ningf goonf lai yinf mingh gee dungf veetf,
ziuh tih nokf di moh meef loh lokf foong zeeu uk miaf neeh gee hemv too lai goouh sangv gangf goouh tiangh neeh gee lipf ye.
11 Hauf hemv meef loh lipf ye,
meenf tingf namh mutf too lai gee goouh yoou fooif hemv vooi,
ya meenf tingf namh mutf matf gee fooif hemv vooi."
12 Siangf-dif bov,
"Neeh ziuh tih hauf hemv meef loh gangf too lai hemv meef loh yoou ningf goonf lai yinf mingh gee dungf veetf lipf ye gee hoouh mee,
zi doongv yungh yuanh.
13 Hauf biang daif hauf hiuf hee yoou da bah,
huk hauf hemv matf lipf ye gee hoouh mee.
14 Leeuf fooif hauf biang bah gee zaqf matf,
daif hiuf hee yoou da bah gee tif hoouh,
15 hauf ziuh gif niamf hauf hemv meef loh gangf too lai lai yinf mingh gee dungf veetf tooh lipf gee ye,
ziuh meenf tingf namh nyoo miaf mutf too lai gee goouh yoou fooif hemv vooi.
16 Daif hiuf hee yoou da bah gee tif hoouh,
hauf dekf huh vooi,
ziuh gif niamf hauf hemv bak matf too lai lai yinf mingh gee goouh yoou lipf ye yungh yuanh neeh mee."
17 Siangf-dif hemv Nov-yaf gang bov,
"Neeh ziuh tih hauf hemv bak matf too lai gee goouh yoou lipf ye gee hoouh mee."
Leekf da hhiangh Nov-yaf gee
18 Leekf da hhiangh Nov-yaf lokf da foong zeeu uk miaf neeh gee tih Sanv,
Hanv hemv Yav-fov.
Hanv tih bef lai Gia-noomv huf hee.
19 Neeh tamv huf tih leekf da hhiangh Nov-yaf gee,
lengv hunf bak matf gee zung tih lokf geef loh siv uk miaf gee.
20 Nov-yaf tih huk bek ting gee,
tih haih it huf sav veen fuh hoouv gee.
21 Lai veenf hee,
Nov-yaf goonv yan meeif vooi,
geq nangv lingf lingv lap yoou da ziangf feengv.
22 Gia-noomv gee bef lai Hanv,
dekf huh bef lai geef geq nangv lingf lingv,
ziuh booiv seengv engv tok geef uk ninh neeh voon huf.
23 Sanv hemv Yav-fov ziuh oouv yua bak hiuf hee hauv geen baiv via geef loh gee vooi,
geef loh hoi moh loouh booiv,
ziav geen baiv huf bef lai vooi;
geef loh zin na booiv gak fiangf vooi,
ziuh dekf meenf huh bef lai geq nangv.
24 Nov-yaf meeif yan gua huangf vooi,
huh leekf da hhiangh neef nook geef huf hee doi geef huk gee teeh vooi,
25 ziuh bov,
"Gia-noomv gaiv lai tuh zeeuf,
geef itf dingf huk engv tok geef gee
zuif doom moof gee leekf nof."
26 Nov-yaf yuh bov,
"Ye-hheev-huav Sanv gee Siangf-dif tih gaiv lai ngenv gee!
Gia-noomv dif hemv Sanv huk nof.
27 Siangf-dif dif biang Yav-fov mef miaf mef voongh,
biang geef zih yoou da ziangf feengv Sanv gee,
Gia-noomv dif hemv geef huk nof."