Namh gee laif laih hakf
8
1 Siangf-dif gov Nov-yaf hemv gov too lai hemv Nov-yaf yoou da foong zeeu gee goouh sangv hemv goouh tiangh.
Geef ziuh yam van siau matf gee,
namh gee ziuh laif laih hakf vooi.
2 Namh maf dof dauf matf gee hoop loouh vooi,
meenf lai namh tung geen vooi;
apf baiv fa mee ya hoop loouh vooi,
meenf lai funv dok vooi.
3 Namh gee lokf bak matf laif laih hakf,
gua it bek ngoh teepf veenf vooi,
namh gee ziuh hakf dif inv vooi.
4 Sit ngitf teepf sit neeh veenf hee,
foong zeeu hauv hee on yoou baiv tiah bak lengv Yav-la-laf gee.
5 Namh gee hangh hakf hangh hakf,
zi doongv teepf ngitf;
doongv teepf ngitf soov it neeh veenf hee,
tiah gee zung doh deng uk miaf vooi.
6 Gua tee teepf veenf vooi,
Nov-yaf hheeif suangv foong zeeu geef huk huk neeh hauv hee vooi,
7 biang maih akf huf hee uk booiv.
Maih akf huf hee vinv booiv vinv leengv,
vinv zi doongv namh bak matf gee liang inv vooi.
8 Nov-yaf yuh biang goop huf hee uk booiv,
tiang dekf namh gee lokf bak matf hakf yoou meenf.
9 Danf tih matf gee leeuf ziqf duf tih namh,
goop huf hee meenf lai lengv hau zumh,
ziuh vinv leengv foong zeeu ningf Nov-yaf vooi,
Nov-yaf ziuh nyof moof zip geef loouh foong zeeu vooi.
10 Geef yuh foou gua sit veenf hemv,
yuh biang goop huf hee lokf foong zeeu uk booiv.
11 Doongv veenf yoop vooi,
goop huf hee ziuh nginv boof gamh lamv nauf dot gee voonh hee leengv miaf,
Nov-yaf ziuh huh namh bak matf gee hakf vooi.
12 Geef yuh foou gua sit veenf hemv,
yuh biang goop huf hee uk booiv,
neeh fooif hee,
goop huf hee vinv booiv meenf leengv vooi.
13 Doongv Nov-yaf lokf bek lengf it tui neeh veeif hee gee ziv ngitf soov it neeh veenf hee,
namh bak matf gee zung liang vooi.
Nov-yaf ziuh hheeif bak foong zeeu mee vooi dekf,
of,
matf gee ga liang vooi!
14 Doongv ngih ngitf ngih teepf sit neeh veenf hee,
matf gee zung liang inf inv vooi.
15 Siangf-dif hemv Nov-yaf gang bov,
16 "Meef lokf foong zeeu uk miaf lo,
meef yin maih meef huf hee hemv leekf da hhiangh meef gee gangf tinf fuh meef gee hongf goonf uk miaf.
17 Too lai hemv meef yoou ningf goonf lai yinf mingh gee dungf veetf:
Nokf gee,
dungf veetf gee hemv goouh too lai leeqf yoou dauf matf neeh gee,
meef hheem yin inf inv uk miaf,
biang geef loh yoou bak matf,
lai leekf liauf liauh siv dik bak matf vooi."
18 Nov-yaf ziuh hemv maih geef huf hee,
leekf da hhiangh geef gee gangf tinf fuh geef gee uk foong zeeu vooi.
19 Too lai gee goouh sangv hemv goouh tiangh,
nokf gee gangf goouh too lai leeqf yoou dauf matf neeh gee,
zung di zuangv zuangv di leeif leeif uk foong zeeu vooi.
Nov-yaf hianf goouh sev Ye-hheev-huav
20 Nov-yaf oouv dinf huk gif hanv mee sev Ye-hheev-huav,
ziuh oouv gookf zuangv goouh tiangh bang gee hemv gookf zuangv nokf bang gee,
biang geen baiv gif hanv vooi ngupf hianf sev Ye-hheev-huav.
21 Ye-hheev-huav hoomv heekf hheei gee hiangv vooi,
ziuh tiang bov,
"Tuif yianf lengv hunf lokf nook zung tih tiang goouh seeu gee,
danf tih hoouh looif hauf itf dingf meenf zing neeh fooif hee teenf heen,
eenv veeih lengv hunf fatf matf gee fooif hemv vooi,
hauf ya itf dingf meenf zing neeh fooif hee teenf heen,
miatf goouh yoou gee inf inv booiv vooi.
22 Matf gee enf yoou yoou,
ziuh dif lai sav lai suv,
lai nit lai lun,
lai fa nit fa lun,
lai veenf bangv veenf yoop,
yungh yuanh gif zukf longf booiv."