Yav-bov-lanv leengv Gia-noomv
13
1 Yav-bov-lanv yin maih geef huf hee hemv geef too lai gee itf siatf gangf Lov-teev,
lokf Ai-gipf geen Gia-noomv gee noomv buf vooi.
2 Neeh tif hoouh Yav-bov-lanv meenf huh giauh vatf lai vooi,
lai nguf,
tuangf,
lookf hoov neeh gee di hoouf hoouf teenf heen,
gimv ngoonf ya lai dunf hee.
3 Geef lokf noomf fiangf hee laif laih yif di hhootf doongv di hhootf zi doongv Bov-teef-lif,
doongv zing da Bov-teef-lif hemv Aif gee neeh hhootf vooi,
ziuh tih lengv gua na geef dap ziangf feengv neeh hhootf hee,
4 ya tih lengv gua na geef huk gif hanv neeh hhootf hee,
geef yuh yoou ninh hhuf nooiv Ye-hheev-huav mee.
Yav-bov-lanv hemv Lov-teev feenv goonf vooi
5 Hemf moh Yav-bov-lanv booiv gee Lov-teev,
toof too ya lai nguf,
tuangf neeh gee di hoouf hoouf hemv ziangf feengv.
6 Lengv neeh hhootf hee meenf geeu geef loh hemv goonf zih;
eenv veeih gav teeh geef loh gee haif liauh vooi,
biang geef loh meenf zih lai yoou ningf goonf.
7 Hooi Yav-bov-lanv tiangh tuangf gee lengv hunf hemv hooi Lov-teev tiangh tuangf gee lengv hunf ziuh zengv goonf vooi.
Dang siv lengv hunf Gia-noomv gee hemv lengv hunf Bih-lif-sih gee zih yoou ninh.
8 Yav-bov-lanv ziuh hemv Lov-teev gang bov,
"Doouf loh tih gav lanf engv tok,
meenf ngah zengv goonf,
hooi meef tiangh tuangf gee lengv hunf hemv hooi hauf tiangh tuangf gee lengv hunf ya meenf ngah zengv goonf.
9 Lengv neeh gee inf inv meenf tih zung yoou dau na meef haf?
Doouf feenv goonf lo!
Meef zeekf booiv moof vingv,
hauf ziuh booiv moof maif,
meef zeekf booiv moof maif,
hauf ziuh booiv moof vingv."
10 Lov-teev looif looiv dekf lengv neeh fef hee hoouf hoou,
huh Ye-danf-hoov suanf fingv yuanv zi doongv Sov-eev,
zung tih lai namh zukf zuk.
Ye-hheev-huav meenf miatf heeuv Soh-to-mah hemv heeuv Eev-mov-la zee sianv,
lengv neeh hhootf hee zing Veen Ye-hheev-huav mee,
ya zing lengv Ai-gipf gee teenf heen.
11 Lov-teev ziuh liakf Ye-danf-hoov suanf fingv yuanv vooi,
laif laih yif booiv dongv neeh fiangf vooi,
geef loh ziuh hemv goonf feenv goonf vooi.
12 Yav-bov-lanv zih yoou Gia-noomv.
Lov-teev zih yoou heeuv fingv yuanv gee,
geef ziamf ziamf yif zi doongv ningf heeuv Soh-to-mah.
13 Ye-hheev-huav dekf lengv hunf Soh-to-mah gee seeu inv seeu bang vooi.
Yav-bov-lanv yif booiv Si-bov-lonv
14 Lov-teev lif hhooiv Yav-bov-lanv hoouh looif,
Ye-hheev-huav hemv Yav-bov-lanv gang bov,
"Lokf lengv meef nyunv neeh hhootf hee,
looif looiv dekf dongv noomf tooiv beek.
15 Too lai lengv meef vook lai huh neeh gee,
hauf duf dif sev zee meef hemv heeuf daif meef gee,
zi doongv yungh yuanh.
16 Hauf ya dif biang heeuf daif meef gee liauh zing tangv bak matf gee teenf heen,
lengv hunf gee zeekf tuan lai tangv bak matf gee inv,
nah tuan lai heeuf daif meef gee inv.
17 Meef uif miaf,
booiv lengv neeh hhootf hee fanf huangv fanf daqf hoouf hoou geef,
eenv veeih hauf dif sev lengv neeh hhootf hee zee meef."
18 Yav-bov-lanv ziuh yif ziangf feengv gee miaf doongv Si-bov-lonv,
zih yoou Manf-lif gee ningf siangf suf neeh hhootf hee,
geef yuh yoou ninh huk gif hanv mee sev Ye-hheev-huav.