3 Yav-bov-lanv ziuh hhuih longf hhupf yoou dauf matf vooi,

Siangf-dif yuh bov geef bov,

4 "Noh,

hauf hemv meef lipf gee ye tih teenf heen:

Meef dif huk haih liauh gok gav gee bef lai.

5 Lokf nooih hoouh looif,

meef meenf ngah yam Yav-bov-lanv vooi,

hheem gaih nooiv yam Yav-bov-la-hanf hee,

eenv veeih hauf duf ga lipf meef huk haih liauh gok gav gee bef lai vooi.

6 Hauf itf dingf biang leekf lanv meef gee fat meenf huh giauh liauh,

gok gav dif lokf meef lipf,

voongf dooi dif sut lokf meef uk.

7 Hauf dif hemv meef gangf heeuf daif meef gee tooi tooi siuf siuf gian siuh ye hauf mee,

huk yungh yuanh gee ye,

hauf dif huk meef hemv heeuf daif meef gee gee Siangf-dif.

8 Hauf dif oouv lengv en teeif meef ziamf siv zih neeh hhootf hee,

ziuh tih suanf Gia-noomv sev zee meef hemv heeuf daif meef gee yungh yuanh yoou ninh huk goonv,

hauf ya dif huk geef loh gee Siangf-dif."

9 Siangf-dif yuh hemv Yav-bov-la-hanf gang bov,

"Meef hemv heeuf daif meef gee tooi tooi siuf siuf duf hheem zun siuh ye hauf mee.

10 Hauf hemv meef gangf heeuf daif meef gee lipf gee ye,

meef loh itf dingf hheem zun siuh,

ziuh tih meef loh too lai gee da hhiangh hheem ngootf leei^a.

11 Meef loh naf nee duf hheem ngootf leei,

neeh tih hauf hemv meef loh lipf ye gee hoouh mee.

12 Meef loh tooi tooi siuf siuf gee da hhiangh,

meenf guan tih lai yoou lanf meef gee,

ha tih oouv ngoonf fiakf hemv hhiv ha minv zukf gee lengv hunf vianv gee,

lai longf haih bet veenf ziuh hheem ngootf leei.

13 Lai yoou lanf meef gee hemv meef oouv ngoonf fiakf booiv vianv gee,

duf hheem ngootf leei.

Teenf heen,

ye hauf mee ziuh yoou baiv huf meef loh huk yungh yuanh gee ye vooi.

14 Danf tih da hhiangh meenf ngootf leei neeh gee,

itf dingf lokf da bek ting hauf gee voouf uk booiv,

eenv veeih geef meenf zun siuh ye hauf mee."

15 Siangf-dif yuh hemv Yav-bov-la-hanf gang bov,

"Maih meef huf hee Sa-laiv meenf ngah yam Sa-laiv vooi,

nooiv geef mee hheem yam Sa-la hee.

16 Hauf itf dingf sev fok zee geef,

ya dif biang geef lai leekf da hhiangh huf hee zee meef.

Hauf itf dingf sev fok zee geef,

biang geef huk haih liauh minv zukf gee maih lai;

itf dingf lai bek ting gee voongf dooi sut lokf geef uk."

17 Yav-bov-la-hanf ziuh hhupf yoou dauf matf lookf lookf liauv,

timv tiang bov,

"It bek tui gee lengv hunf ya dif lai lai leekf yoou haf?

Sa-la duf ga gu teepf tui vooi,

ya dif lai leekf lai yoou haf?"

18 Yav-bov-la-hanf hemv Siangf-dif gang bov,

"Hi voongf meef ya sev fok zee Yih-siv-mah-lif."

19 Danf tih Siangf-dif bov,

"Meenf!

Maih meef huf hee Sa-la dif hooi meef lai leekf da hhiangh huf hee,

meef hheem hooi geef hhooiv nooiv yam Yih-sav hee.

Hauf dif gian siuh hauf hemv geef lipf gee ye,

huk geef heeuf daif yungh yuanh gee ye.

20 Hauf ya dapf ingf meef,

itf dingf sev fok zee Yih-siv-mah-lif,

biang geef fat voongh meenf huh giauh liauh.

Geef dif lai teepf ngeeih huf zukf ziangh,

hauf dif biang geef bin tingf gok gav nyoo mee.

21 Doongv veeif na neeh mee tif hoouh,

Sa-la dif hooi meef lai Yih-sav,

hauf dif gian siuh hauf hemv Yih-sav lipf gee ye."

22 Siangf-dif hemv Yav-bov-la-hanf gang go inv vooi,

ziuh lif hhooiv geef geen booiv vooi.

23 Ziuh tih yoou neeh veenf hee,

Yav-bov-la-hanf hingf Go Siangf-dif gee,

hooi leekf da hhiangh geef huf hee Yih-siv-mah-lif hemv yoou lanf geef too lai gee da hhiangh,

meenf guan tih lai yoou lanf geef gee,

ha tih oouv ngoonf fiakf booiv vianv gee,

suanv buf zung ngootf leei vooi.

24 Yav-bov-la-hanf ngootf leei gee tif hoouh gu teepf gu tui.

25 Leekf da hhiangh geef huf hee Yih-siv-mah-lif ngootf leei gee tif hoouh teepf tamv tui.

26 Ziuh tih yoou neeh veenf hee,

Yav-bov-la-hanf hemv leekf da hhiangh geef huf hee Yih-siv-mah-lif hongf goonf ngootf leei vooi.

27 Yoou lanf Yav-bov-la-hanf too lai gee da hhiangh,

meenf guan tih lai yoou lanf geef gee,

ha tih oouv ngoonf fiakf booiv hemv hhiv ha minv zukf gee lengv hunf vianv gee,

zung hemv geef hongf goonf ngootf leei vooi.