3 Danf tih neeh goomh hee,

Siangf-dif geen voonf Yaf-bih-miv-leeqf hemv geef gang bov,

"Meef div daiv haf!

Eenv veeih maih meef zip miaf neeh huf hee tih maih vanh huf hee nenh."

4 Neeh tif hoouh,

Yaf-bih-miv-leeqf enf meenf gangf Sa-la gua yoou,

geef ziuh bov,

"Zu haf,

linf meenf huk sook gee lengv hunf meef ya dif ga booiv haf?

5 Lengv hunf neeh huf hee meenf tih toof too seengv hauf bov,

'Geef tih gov hauf huf hee' haf?

Linf maih leekf neeh huf hee ya toof too bov,

'Geef tih gof hauf huf hee'.

Hauf huk teeh neeh gee gua lai liangf timv."

6 Siangf-dif geen voonf geef hemv geef gang bov,

"Hauf ya huh meef huk teeh neeh gee gua lai liangf timv,

guf seeh hauf nah lanf meef meenf sev meef gangf geef,

ha zinf meef deekf zuif hauf.

7 En teeif meef hheem oouv maih geef huf hee fooh leengv geef,

eenv veeih geef tih sian zi,

geef dif hooi meef doouh goouf,

hau go mingh meef.

Meef zeekf meenf oouv leengv geef,

meef hheem huh,

meef hemv meef too lai gee lengv hunf zung itf dingf dif daiv."

8 Yaf-bih-miv-leeqf zauf zau uif miaf,

ziuh yam daf sinv geef gee inf inv miaf vooi,

seengv neeh itf siatf gee teeh zee geef loh,

geef loh ziuh mangf nyan vooi.

9 Yaf-bih-miv-leeqf yam Yav-bov-la-hanf miaf,

tooi geef bov,

"Meef veeih gai teenf huk doi hauf loh nif?

Hauf huk gai gee teeh deekf zuif meef vooi?

Meef daf biang hauf hemv bek ting hauf gee dok loouh soih mee teenf nyoo.

Meef huk meenf gaiv lai huk gee teeh loouh hauf vooi."

10 Yaf-bih-miv-leeqf yuh bov Yav-bov-la-hanf bov,

"Meef dekf huh gai gee vooi nah huk teeh neeh hhinh hee nif?"

11 Yav-bov-la-hanf bov,

"Hauf hhif bov lengv hunf yoou nooih gee meenf gingf vuif Siangf-dif,

dif veeih geep maih hauf huf hee ga hauf booiv.

12 Geef titf titf ya tih gov hauf huf hee,

geef hemv hauf tih hongf bef gakf maih,

hoouh looif geef huk maih hauf huf hee vooi.

13 Siangf-dif yam hauf lif hhooiv gia hiang uk miaf liuv langf gee tif hoouh,

hauf zuk geef bov,

'Meenf guan doouf loh booiv doongv leeuf,

meef duf hheem bov hauf tih gof meef huf hee,

meef teenf huk ziuh tih zuif dookf hauf vooi.'"

14 Yaf-bih-miv-leeqf ziuh oouv nguf,

oouv tuangf hemv leekf nof neeh gee sev Yav-bov-la-hanf,

ya oouv maih geef huf hee Sa-la fooh leengv geef vooi.

15 Yaf-bih-miv-leeqf yuh bov,

"Meef dekf,

lengv hauf gee zung yoou dau na meef,

leeuf hhootf hoopf i meef,

meef ziuh zih yoou leeuf hhootf."

16 Yuh bov Sa-la bov,

"Noh,

hauf oouv ngoonf fiakf it senv mooqf^a zee gof moh,

yoou dau na gav lanf meef gee lengv hunf tukf nooiv meef mee vooi,

teenf heen yoou dau na hemv goonf ziuh zingf mingv meef meenf huk teeh neeh gee gua."

17-18 Eenv veeih maih Yav-bov-la-hanf huf hee Sa-la neeh hhinh teeh,

Ye-hheev-huav duf ga biang maih leekf yoou lanf Yaf-bih-miv-leeqf neeh gee suanv buf zung meenf lai lai leekf vooi.

Yav-bov-la-hanf doouh goouf Siangf-dif,

Siangf-dif ziuh yiav Yaf-bih-miv-leeqf hemv maih geef huf hee,

gangf maih nof geef gee maif vooi,

geef loh ziuh lai lai leekf vooi.