Yav-bov-la-hanf vianv makf feenf
23
1 Sa-la goonv doongv it bek ngih teepf sit tui,
ziuh gua tooi vooi.
2 Sa-la daiv yoou lengv Gia-noomv gee Gi-liatf-yav-ba,
ziuh tih Si-bov-lonv,
Sa-la daiv vooi,
Yav-bov-la-hanf dookf hungh Sa-la,
ziuh veeih geef ngai oo oo teenf heen.
3 Yav-bov-la-hanf lokf ningf tiv maih geef huf hee nyunv uif,
hemv lengv hunf Hheef gee gang bov,
4 "Hauf tih gakf gee gok gav gee lengv hunf,
tih lengv hunf nguaif dif gee,
hhuf meef loh ing lengv hhootf hee zee hauf,
hauf hau bok maih hauf huf hee."
5 Lengv hunf Hheef gee bov,
6 "Nyoo haf!
Meef yoou da hauf loh tih daf yinv veetf huf hee,
suf saih meef yoou lengv makf feenf hauf loh gee,
liakf zuif maif gee miaf bok maih meef huf hee.
Lengv hunf hauf loh gee naf nee duf hheeng oouv lengv sev meef bok maih meef huf hee."
7 Yav-bov-la-hanf ziuh uif miaf,
bai geef loh gamh siaf geef loh,
8 hemv geef loh gang bov,
"Meef loh zeekf hongf i hauf bok maih hauf huf hee,
biang geef meenf yoou dau na hauf,
ziuh hingf hauf gang,
hooi hauf booiv hhuf leekf da hhiangh Sov-siav huf hee Yih-fov-lonv,
9 yam geef ing soongh Maif-bih-la yoou baif baiv hau veen geef neeh mee zee hauf,
geef hhoo yi yoou dau na meef loh ziuf ga sinf zukf zuk ing sev hauf,
hau biang hauf yoou da meef loh lai lengv huk makf feenf."
10 Dang siv,
Yih-fov-lonv ngamf ngamf ngov yoou da lengv hunf Hheef gee.
Yih-fov-lonv ziuh yoou dau na lengv hunf Hheef gee tanv Yav-bov-la-hanf,
too lai yoou bak heeuv uk loouh gee lengv hunf Hheef zung hingf huh geef bov,
11 "Meenf!
Nyoo haf!
Hauf bov meef,
hauf doi na lengv hunf Hheef hauf loh gee,
oouv veen neeh hhootf hee gangf soongh neeh mee hong sev meef,
biang meef bok maih meef huf hee."
12 Yav-bov-la-hanf ziuh bai dang dif gee lengv hunf,
13 yoou dau na geef loh hemv Yih-fov-lonv gang bov,
"Hauf bov meef,
hauf dif oouv veen neeh hhootf hee gee ga sinf zee meef,
meef hheem suv longf,
hauf nah yoou ninh bok maih hauf huf hee."
14 Yih-fov-lonv tanv Yav-bov-la-hanf bov,
15 "Nyoo haf!
Hauf bov meef,
veen neeh hhootf hee nah dooi ngoonf fiakf tee bek mooqfa,
doi meef hemv hauf miaf gang meenf tuif gai gee,
oouv booiv bok maih meef huf hee lo."
16 Yav-bov-la-hanf hongf i Yih-fov-lonv gang gee ga sinf vooi,
ziuh ziuf geef yoou dau na lengv hunf Hheef gang gee oouv seeng dang siv huk tengv li yungh gee seeng ngoonf fiakf tee bek mooqf sev geef.
17 Teenf heen Yih-fov-lonv ziuh oouv veen Maif-bih-la yoou dau na Manf-lif neeh hhootf hee hemv soongh da veen neeh mee gangf dun yoou ningf neeh gee,
18 zung yoou dau na lengv hunf Hheef gee,
ziuh tih yoou dau na yoou bak deenh heeuv uk loouh gee lengv hunf Hheef,
zung guiv sev Yav-bov-la-hanf huk sanh ngiapf vooi.
19 Teeh neeh hhinh hee hoouh looif,
Yav-bov-la-hanf ziuh bok maih geef huf hee Sa-la yoou lengv Gia-noomv gee,
ziuh tih bok yoou da soongh veen Maif-bih-la neeh mee,
yoou dau na Manf-lif neeh hhootf hee.
Manf-lif ziuh tih Si-bov-lonv.
20 Teenf heen,
veen neeh hhootf hee hemv soongh da veen neeh mee,
ziuh lokf lengv hunf Hheef gee guiv sev Yav-bov-la-hanf huk makf feenf vooi.