2 Ye-hheev-huav sev Yih-sav dekf huh geef,

bov,

"Meef meenf ngah longf Ai-gipf,

hheem ziuf zih yoou lengv hauf nyi meef neeh hhootf hee.

3 Meef ziamf siv zih yoou nooih,

hauf itf dingf hemv meef yoou ningf goonf,

sev fok zee meef,

eenv veeih hauf dif sev lengv neeh hhootf hee inf inv zee meef hemv heeuf daif meef gee.

Hauf hemv bef lai meef huf hee Yav-bov-la-hanf fat tooi gee hauf itf dingf gang doongv huk doongv.

4 Hauf itf dingf biang heeuf daif meef gee liauh zing leekf saiv baiv fa gee,

hauf ya itf dingf sev lengv neeh hhootf hee inf inv zee geef loh,

bak matf too lai gee gok gav zung itf dingf eenv veeih heeuf daif meef gee deekf doongv fok feenh.

5 Eenv veeih Yav-bov-la-hanf hingf go hauf gee,

zun siuh hauf gee mingf lingf,

gui dingf hemv lutf fapf,

hauf zuk gee geef zung booiv huk."

6 Yih-sav ziuh zih yoou Gi-la-eev.

7 Lengv hunf yoou ninh gee tooi heekf maih geef huf hee,

geef meenf goom bov Lif-baiv-zia tih maih geef huf hee,

ziuh bov,

"Geef tih gov hauf huf hee."

Eenv veeih Lif-baiv-zia luang zing feetf teenf heen,

geef mangf lengv hunf yoou ninh gee dif veeih Lif-baiv-zia ga geef.

8 Yih-sav zih yoou ninh haih foong.

Lai veenf hee,

voongf Feei-lif-sif huf hee Yaf-bih-miv-leeqf lokf bak suangv vook longf booiv,

huh Yih-sav lupf maih geef huf hee Lif-baiv-zia.

9 Yaf-bih-miv-leeqf ziuh yam Yih-sav miaf,

bov,

"Noh,

geef titf titf tih maih meef huf hee,

meef di leeuf bov geef tih gov meef huf hee nif?"

Yih-sav tanv bov,

"Hauf mangf hauf bov geef tih maih hauf huf hee,

vanh dif ga hauf."

10 Yaf-bih-miv-leeqf bov,

"Meef veeih gai teenf doi hauf loh nooh?

Bek ting hauf gee sav ziqf hemv ziuh hemv maih meef huf hee lap suanv vooi,

teenf heen meef ziuh biang hauf loh famh soih vooi."

11 Yaf-bih-miv-leeqf ziuh hiaf lingf bek ting gee bov,

"Naf nee zeekf hhiv manf lengv hunf neeh huf hee ha tih doou maih geef huf hee,

ziuh itf dingf ga geef booiv."

12 Yih-sav yoou ninh huk veen niaf,

Ye-hheev-huav sev fok zee geef,

neeh veeif hee geef suv liangv sikf gav it bek fuih.

13 Gav teeh geef gee ziuh mef miaf mef liauh vooi,

geef ziuh bin tingf daf fuf ung vooi.

14 Geef lai nguf lai tuangf gee di hoouf hoouf,

ya lai leekf nof dunf hee,

lengv hunf Feei-lif-sif gee ziuh timv seeu geef.

15 Bef lai geef huf hee Yav-bov-la-hanf yoou gee tif hoouh,

yangv leekf nof bef lai geef huf hee guqf neeh gee,

lengv hunf Feei-lif-sif gee zung oot loouh vooi,

humf bongf dikf dik loouh vooi.

16 Yaf-bih-miv-leeqf yam Yih-sav bov,

"Meef yif booiv lo!

Eenv veeih meef voongh gua hauf loh vooi!"

17 Yih-sav ziuh lokf ninh yif booiv Gi-la-eev guh vooi,

dap ziangf feengv zih yoou ninh.

18 Yangv bef lai geef huf hee Yav-bov-la-hanf yoou gee tif hoouh guqf neeh gee,

Yav-bov-la-hanf daiv hoouh looif,

lengv hunf Feei-lif-sif gee zung humf loouh vooi.

Yih-sav ziuh sungf sungf guqf uk miaf,

ya ziuf ziuf nooiv gua na bef lai geef yam neeh gee miaf yam yangv neeh gee.

19 Lai veenf hee,

leekf nof Yih-sav gee yoou song tiah hhuatf hhuat neeh hhootf hee guqf yangv,

guqf heekf namh maf dof mee vooi.

20 Lengv hunf yoou Gi-la-eev tiangh tuangf neeh gee hemv lengv hunf hooi Yih-sav tiangh tuangf gee zengv goonf,

bov,

"Namh neeh gee tih hauf loh gee."

Yih-sav ziuh hhooiv yangv neeh mee yam Ai-seef^a hee,

eenv veeih geef loh hemv geef zengv goonf.

21 Leekf nof Yih-sav gee yuh guqf yangv mooqf hemv,

Gi-la-eev tiangh tuangf gee lengv hunf yuh veeih yangv neeh mee hemv geef loh zengv goonf,

Yih-sav ziuh hhooiv yangv neeh mee yam Si-tiv-nav^b hee.

22 Yih-sav ziuh yif booiv gakf hhootf vooi,

yuh guqf yangv mooqf hemv,

neeh fooif geef loh meenf veeih yangv neeh mee zengv goonf vooi,

geef ziuh hhooiv yangv neeh mee yam Lif-hheev-bov^c hee.

Geef bov,

"Ye-hheev-huav en teeif sev lengv hhuatf hhuat gee zee doouf loh vooi,

doouf loh itf dingf yoou nooih fat voongh uif."

23 Yih-sav yuh lokf ninh yif geen Bev-sif-ba vooi.

24 Neeh goomh hee,

Ye-hheev-huav sev Yih-sav dekf huh geef,

bov,

"Hauf tih bef lai meef huf hee Yav-bov-la-hanf gingf baif gee Siangf-dif,

meef meenf ngah mangf!

Eenv veeih hauf hemv meef yoou ningf goonf,

dif sev fok zee meef,

ya dif eenv veeih leekf nof hauf huf hee Yav-bov-la-hanf,

biang meef leekf liauh lanv liauh."

25 Yih-sav ziuh yoou ninh huk gif hanv mee,

hhuf nooiv Ye-hheev-huav mee,

ya dap ziangf feengv zih yoou ninh.

Leekf nof Yih-sav gee ya yoou ninh guqf yangv mee.

26 Lai veenf hee,

Yaf-bih-miv-leeqf hemv sam meeuv ziangh geef huf hee Yaf-huf-sav gangf yuanv suaif geef huf hee Feei-geef,

lokf Gi-la-eev miaf div Yih-sav.

27 Yih-sav bov geef loh bov,

"Gif yianv meef loh zookf hauf,

voouf hauf booiv vooi,

en teeif miaf nooih div hauf huk gai?"

28 Geef loh tanv bov,

"En teeif hauf loh titf titf dekf huh Ye-hheev-huav hemv meef yoou ningf goonf,

hauf loh nginf vuiv,

doouf loh ing gai hemv goonf fat tooih lipf ye.

29 Meef meenf ngah haih hauf loh,

zing hauf loh teenf heen lokf hau meenf haih meef gua,

zung doi meef maif maif,

ya biang meef fingf anv booiv vooi.

En teeif hauf loh huh Ye-hheev-huav sev fok zee meef vooi."

30 Yih-sav ziuh huk yan goonv moov ziau daif geef loh,

geef loh ziuh hemv goonf goonv vooi.

31 Haih ngeeih veenf zauf zau,

geef loh uif miaf hemv goonf fat tooih hoouh looif,

Yih-sav ziuh hong geef loh uk booiv,

geef loh ziuh fingf anv leengv booiv vooi.

32 Ziuh tih yoou neeh veenf hee,

leekf nof Yih-sav gee miaf seengv guqf yangv gee teeh zee geef bov,

"Hauf loh guqf heekf namh vooi."

33 Geef ziuh hhooiv yangv neeh mee yam Sif-ba^d hee,

guf seeh heeuv neeh mee yam Bev-sif-ba^e hee,

zi doongv en teeif.

34 Yih-soouv tee teepf tui gee tif hoouh,

oouv maih voon huf zung tih lengv hunf Hheef gee,

huf hee yam Yiuh-ti hee,

tih leemf leekf Bih-lif huf hee,

huf hee yam Ba-siv-mof hee,

tih leemf leekf Yih-lonv huf hee.

35 Maih neeh voon huf siangf siangf tee timv Yih-sav hemv Lif-baiv-zia gee nyung nyang.