Yav-gookf tuat Yih-sav
27
1 Yih-sav lauh vooi,
dav geef deei hee ya laf meenf dekf lai huh vooi.
Lai veenf hee,
geef yam leekf da hhiangh neef nyoo geef huf hee Yih-soouv miaf,
bov,
"Leekf haf!"
Yih-soouv bov,
"Gai gee?"
2 Yih-sav bov,
"Hauf bov meef,
hauf lauh vooi,
meenf goonv lai giauh foong vooi.
3 En teeif meef oouv nyoof oouv loomh meef gee booiv da sangv vooi hooi hauf git goouh ziqf leengv miaf,
4 ziuf vih hauf ooi goonv neeh mee huk enf en vooi,
oouv miaf sev hauf goonv,
dim hauf meenf daiv yoou,
hauf hau zukf fukf meef."
5 Yih-sav hemv leekf da hhiangh geef huf hee Yih-soouv gang go gee tif hoouh,
Lif-baiv-zia ya hingf huh vooi.
Yih-soouv booiv da sangv vooi git sangv,
dif oouv goouh sangv leengv miaf.
6 Lif-baiv-zia ziuh seengv leekf da hhiangh geef huf hee Yav-gookf bov,
"Hauf bov meef,
hauf hingf huh baf moh hemv gof moh Yih-soouv gang bov,
7 'Meef booiv git goouh sangv gee leengv miaf,
huk enf en sev hauf goonv,
dim hauf meenf daiv yoou,
hau yoou dau na Ye-hheev-huav zukf fukf meef.'"
8 Lif-baiv-zia yuh bov,
"Hauf bov meef,
leekf haf,
en teeif meef hheem hingf go hauf gee,
ziuf hauf maiv meef gee booiv huk.
9 Meef booiv ningf tuangf gee vooi liakf leekf tuangf fuif fuif voon huf miaf,
hauf ziuf vih bef lai meef ooi goonv neeh mee,
huk enf en hiangf hiangv vooi.
10 Meef ziuh oouv booiv ningf bef lai meef vooi sev geef goonv,
dim geef yoou gee tif hoouh zukf fukf meef."
11 Danf tih Yav-gookf bov maih lai geef huf hee Lif-baiv-zia bov,
"Noh,
gof hauh Yih-soouv suanf huf zung tih vunf,
huf hauf mee lemf lem meenf lai vunf.
12 Bee baf zeekf gamf hauf,
ziuh huh hauf tuat geef,
meenf danv hauf deekf meenf doongv zukf fukf,
ya dif toof too div zeeuf."
13 Maih lai geef bov geef bov,
"Leekf haf!
Geef zeekf dif zeeuf,
ziuh zeeuf hauf,
meef nah guf hingf go hauf gee,
booiv hoof tuangf miaf sev hauf ziuh maif vooi."
14 Geef ziuh booiv hoof tuangf miaf sev ma geef;
ma geef ziuh ziuf vih bef lai geef ooi goonv neeh mee huk maif vooi.
15 Lif-baiv-zia yuh oouv hho yua leekf da hhiangh neef nyoo geef huf hee Yih-soouv biang yoou lanf zuif maif neeh gee miaf,
sev leekf da hhiangh neef nook geef huf hee Yav-gookf dingv,
16 ya oouv nangv leekf tuangf gee miaf,
menf moof menf gof lingh Yav-gookf nangv lemf lem neeh gee loouh vooi,
17 ziuh oouv nanh leekf tuangf huk enf en hiangf hiangv neeh gee hemv bing gauv sev leekf da hhiangh geef huf hee Yav-gookf.
18 Yav-gookf booiv ningf bef lai geef vooi,
bov,
"Baf haf!"
Bef lai geef bov,
"Oif!
Leekf haf!
Meef tih naf nee?"
19 Yav-gookf bov bef lai geef bov,
"Hauf tih leekf da hhiangh neef nyoo meef huf hee Yih-soouv,
hauf duf ga ziuf meef gang gee booiv huk maif vooi.
Hauf tooh meef ngov uif,
goonv goouh sangv hauf git neeh gee,
goonv vooi hau zukf fukf hauf."
20 Yih-sav tooi leekf da hhiangh geef huf hee bov,
"Leekf haf!
Meef di leeuf git heekf meng teenf heen?"
Yav-gookf bov,
"Eenv veeih Ye-hheev-huav meef gee Siangf-dif biang hauf am heekf maif gi huif git heekf gee."
21 Yih-sav yam Yav-gookf bov,
"Leekf haf,
miaf nooih miaf,
hauf gamf meef ziu,
dekf meef titf titf tih meenf tih leekf da hhiangh hauf huf hee Yih-soouv?"
22 Yav-gookf ziuh loo ningf bef lai geef huf hee Yih-sav.
Yih-sav ziuh gamf geef,
bov,
"Sauv tih sauv Yav-gookf mee,
di leeuf moof tih moof Yih-soouv gee nif?"
23 Moof geef deei hee lai vunf,
zing moof gof geef Yih-soouv deei hee teenf heen,
Yih-sav meenf nginh lai uk geef,
ziuh dif zukf fukf geef.
24 Yih-sav ya tooi fooif hemv bov,
"Meef titf titf tih leekf da hhiangh hauf huf hee Yih-soouv haf?"
Geef bov,
"Heqh."
25 Yih-sav ziuh bov,
"Beu sev hauf,
biang hauf goonv nanh leekf da hhiangh hauf huf hee git neeh gee vooi,
hauf hau hooi meef zukf fukf."
Yav-gookf ziuh beu nanh sev geef,
geef ziuh goonv vooi,
ya beu yan sev geef,
geef ya goonv vooi.
26 Bef lai geef Yih-sav yam geef bov,
"Leekf haf,
gua miaf hoomv hauf ziu."
27 Yav-gookf ziuh gua booiv hoomv bef lai geef.
Bef lai geef it hoomv heekf hheei hho yua geef gee hiangv,
ziuh zukf fukf Yav-gookf,
bov,
"Hheei leekf da hhiangh hauf huf hee hiangv
zing Ye-hheev-huav sev fokf
gee veen niaf teenf heen.
28 Doongv nooih Siangf-dif dif sev namh funv lokf baiv fa longf miaf zee meef,
dif sev veen niaf hhianf hhianh gee zee meef,
dif sev liangv sikf dif sev yan liauf liauh zee meef.
29 Doongv nooih too lai gee minv zukf dif fokf teeh meef,
too lai gee gok gav zung dif bai meef;
doongv nooih meef dif huk hau engv tok meef gee,
meef maih lai gee leekf da hhiangh zung dif doomh hau bai meef.
Neef zeeuf meef gee,
hi voongf geef tuh zeeuf;
neef zukf fukf meef gee,
hi voongf geef deekf doongv zukf fukf."
Yih-soouv iangv bef lai geef Yih-sav zukf fukf geef
30 Yih-sav zukf fukf Yav-gookf hoouh looif,
Yav-gookf giangf lokf ningf bef lai geef neeh hhootf hee uk miaf,
gof geef Yih-soouv ziuh git sangv leengv miaf vooi.
31 Yih-soouv ya huk goouh gee enf en hiangf hiangv vooi,
oouv miaf sev bef lai geef,
bov,
"Baf haf,
uif miaf,
goonv goouh sangv leekf da hhiangh meef huf hee git leengv neeh gee,
goonv vooi hau hooi hauf zukf fukf."
32 Bef lai geef Yih-sav tooi geef bov,
"Meef tih naf nee?"
Yih-soouv tanv bov,
"Hauf tih leekf da hhiangh neef nyoo meef huf hee Yih-soouv."
33 Yih-sav hingf heekf go neeh gee ziuh mangf nyan vooi,
bov,
"Meef meenf miaf yoou,
naf nee neeh huf hee duf ga oouv goouh sangv miaf sev hauf goonv vooi nif?
Hauf duf ga goonv vooi,
ya hooi geef zukf fukf vooi,
doongv nooih geef itf dingf lai fok."
34 Yih-soouv hingf heekf go bef lai geef gee,
ziuh ngai oo oo teenf heen,
bov bef lai geef bov,
"Baf haf,
meef ya hheem zukf fukf hauf!"
35 Yih-sav bov,
"Tok meef huf hee duf ga tiang gooi miaf geep fok feenh meef mee booiv vooi."
36 Yih-soouv bov,
"Tee veeih nooiv geef mee yam Yav-gookf hee,
geef duf ga tuat hauf voon fooif vooi,
gua na geef geep mingf feenh neef nyoo hauf mee booiv vooi.
Meef dekf,
en teeif geef ya geep fok feenh hauf mee booiv vooi."
Yih-soouv yuh bov,
"Meef meenf teengh ziqf ziqf zukf fukf hauf haf?"
37 Yih-sav tanv Yih-soouv bov,
"Noh,
hauf duf ga lipf geef huk hau meef vooi,
biang engv tok geef gee suanv buf huk nof geef,
ya sev liangv sikf hemv yan neeh gee zee geef vooi.
Leekf haf,
en teeif hauf ya dif hooi lai meef huk gai gee yoou?"
38 Yih-soouv tooi bef lai geef huf hee bov,
"Baf haf,
meef nah lai zukf fukf mooqf hee toof too haf?
Baf haf,
meef ya zukf fukf hauf teef!"
Gang inv Yih-soouv ziuh ngai oo oo teenf heen.
39 Bef lai geef Yih-sav tanv bov,
"Leekf ha,
hauf bov meef,
lengv meef zih neeh gee,
fa meenf sev namh funv zee meef,
veen niaf gee ya meenf hhianh.
40 Meef itf dingf hhoouf mitf hhoouf giamf gua seeng huatf,
meef ya itf dingf huk nof tok meef huf hee;
danf tih doongv meef voong heen gee tif hoouh,
meef itf dingf gukf lingf fanh hangf geef,
deuf luat moof geef."
Yih-soouv zookf Yav-gookf
41-42 Yih-soouv eenv veeih bef lai geef zukf fukf Yav-gookf vooi,
ziuh zookf Yav-gookf,
timv tiang bov,
"Bee baf meenf goonv lai giauh foong vooi,
foou geef daiv vooi hong zang hoouh looif,
hauf ziuh ga tok hauf huf hee Yav-gookf booiv."
Lai lengv hunf seengv gif huaf leekf da hhiangh neef nyoo Lif-baiv-zia huf hee Yih-soouv mee zee Lif-baiv-zia vooi,
geef ziuh faif lengv hunf booiv yam leekf da hhiangh neef nook geef huf hee Yav-gookf miaf,
bov geef bov,
"Hauf bov meef,
gof meef Yih-soouv dif tiang ga meef boou suf nenh.
43 Leekf haf,
en teeif meef hheem hingf go hauf gee,
mah siangf deuf booiv heeuv Hha-lanv ningf gof hauf La-ban neeh hhootf vooi,
44 yoou ninh hemv geef zih duanf hee tif ganv,
zih zi doongv gof moh huaf hheei.
45 Foou gof moh huaf hheei,
meenf gif giauf teeh meef huk neeh hhinh vooi,
hauf nah faif lengv hunf booiv ninh vooi zip meef leengv.
Veeih gai hauf dif veenf hee vau meef loh voon huf booiv nif?"
46 Lif-baiv-zia bov Yih-sav bov,
"Hauf aif leemf leekf Hheef neeh voon huf inv vooi.
Zeekf Yav-gookf ya oouv leemf leekf Hheef neeh gee,
hauf yoou hangh lai gai gee if see yoou?"