Yav-gookf booiv hoouf La-ba
28
1 Yih-sav yam Yav-gookf miaf zukf fukf geef hoouh looif,
ziuh zuk geef bov,
"Meef meenf ngah oouv leemf leekf Gia-noomv gee huk maih.
2 Meef hheem booiv Ba-danf-yaf-lanv vooi,
doongv lanf bee dah moh Bih-tuh-lif vooi,
liakf leemf leekf beq moh La-ban gee huf hee miaf huk maih.
3 Hhuf suanv neengv gee Siangf-dif sev fok zee meef,
biang meef leekf liauh lanv liauh,
tingf haih liauh mooqf minv zukf.
4 Oouv geef eef sev Yav-bov-la-hanf gee fok feenh sev zee meef hemv heeuf daif meef gee,
biang meef teengf tuh lengv meef ziamf siv zih neeh hhootf hee miaf huk goonv,
ziuh tih lengv Siangf-dif sev zee Yav-bov-la-hanf neeh hhootf hee."
5 Yih-sav ziuh yam Yav-gookf booiv Ba-danf-yaf-lanv vooi div La-ban.
La-ban tih lengv hunf Yav-lanv gee,
tih leekf da hhiangh Bih-tuh-lif huf hee,
tih gof Lif-baiv-zia huf hee,
Lif-baiv-zia tih maih lai Yav-gookf hemv Yih-soouv huf hee.
Yih-soouv oouv maih huf hemv
6 Yih-soouv dekf huh Yih-sav zukf fukf Yav-gookf,
ya yam geef booiv Ba-danf-yaf-lanv vooi oouv maih,
ya dekf huh zukf fukf Yav-gookf gee tif hoouh,
zuk geef bov,
"Meef meenf ngah oouv leemf leekf Gia-noomv gee huk maih."
7 Yuh dekf huh Yav-gookf hingf go bef maih gee booiv Ba-danf-yaf-lanv vooi,
8 Yih-soouv nah huh bef lai geef huf hee Yih-sav meenf ooi leemf leekf Gia-noomv gee.
9 Geef ziuh booiv ningf leekf da hhiangh Yav-bov-la-hanf huf hee Yih-siv-mah-lif neeh hhootf hee vooi,
oouv leemf leekf Yih-siv-mah-lif huf hee Mah-hha-la huk maih,
Mah-hha-la tih gov Niv-baif-ye huf hee.
Yih-soouv meenf oouv Mah-hha-la yoou,
duf ga lai maih vooi.
Yav-gookf yoou Bov-teef-lif lap suanv voonf
10 Yav-gookf uk Bev-sif-ba booiv Hha-lanv vooi.
11 Geef doongv lengv hhootf hee,
da veenf duf ga dok vooi,
ziuh yoou ninh gua goomh.
Geef humv dinf yoou ninh gee mooqf hee miaf hemh hau,
ziuh lap yoou ninh.
12 Geef voonf,
it ziu huh loiv mee doongf yoou dauf matf,
deng loiv mee hongv doongv baiv fa;
noh,
Siangf-dif gee sih zeh yoou baiv loiv mee,
geen geen longf longf.
13 Ye-hheev-huav nyunv yoou baiv deng loiv hemv geef gang bov,
"Hauf tih Ye-hheev-huav gungf moh Yav-bov-la-hanf gee Siangf-dif,
ya tih Yih-sav gee Siangf-dif,
hauf dif sev lengv en teeif meef lap lap neeh hhootf hee zee meef hemv heeuf daif meef gee.
14 Heeuf daif meef gee itf dingf liauh zing tangv bak matf gee teenf heen,
geef loh dif tan dongv noomf tooiv beek hoouf hoou,
bak matf too lai gee minv zukf itf dingf eenv veeih meef hemv heeuf daif meef gee deekf doongv fok feenh.
15 Noh,
hauf ya hemv meef yoou ningf goonf,
meenf guan meef booiv doongv leeuf,
hauf itf dingf boouh huf meef,
yin meef leengv lengv neeh hhootf hee,
hauf yungh yuanh duf meenf fengf meef,
zi doongv hauf biang hauf eef sev meef gee bin tingf titf."
16 Yav-gookf angv vooi,
toof too bov,
"Ye-hheev-huav titf titf yoou nooih,
hauf ya meenf huh."
17 Geef ziuh meenf huh giauh mangf,
bov,
"Lengv neeh hhootf hee haih tee mangf lef,
meenf tih lengv itf buan gee,
tih Siangf-dif gee Seengf-dianf,
tih deenh baiv fa mee."
18 Yav-gookf zauf zau uif miaf,
ziuh doongf dinf geef hemh hau neeh mee uif miaf huk hoouv,
ya giuv yuf geen baiv vooi.
19 Geef ziuh hhooiv lengv neeh hhootf hee yam Bov-teef-lifa hee,
lengv neeh hhootf hee gua na yam Luf-si hee.
20 Yav-gookf eef Siangf-dif bov,
"Meef zeekf hemv hauf yoou ningf goonf,
yoou da sunv boouh yeeuf hauf,
sev goouh hauf goonv sev yua hauf dingv,
21 biang hauf fingf anv leengv doongv lanf bef lai hauf,
hauf ziuh itf dingf oouv Yev-hheev-huav huk hauf gee Siangf-dif.
22 Dinf hauf doongf huk hoouv neeh mee,
ya itf dingf huk Siangf-dif gee Seengf-dianf;
too lai goouh meef sev zee hauf gee,
hauf itf dingf hianf teepf feenv zee it zee meef."