Yav-gookf doongv lanf La-ban vooi
29
1 Yav-gookf gif zukf booiv,
booiv doongv lengv lengv hunf dung foong gee vooi.
2 Geef it ziu dekf huh da veen lai yangv mee,
noh,
lai tuangf tamv hoouf lap yoou ningf yangv;
eenv veeih lengv hunf gee zung voouf tuangf miaf goonv namh yangv neeh mee.
Lai dinf mee nyoof nyoo zaqf bak yangv mee loouh vooi.
3 Leeuf fooif lengv hunf tiangh tuangf gee duf foou tuangf gee miaf saif vooi,
nah hemv goonf yif dinf mee luat bak yangv,
biang tuangf gee goonv namh vooi,
nah sungf yif dinf mee leengv zaqf bak yangv mee loouh.
4 Yav-gookf tooi lengv hunf tiangh tuangf neeh gee bov,
"Engv tok haf,
meef loh tih lokf leeuf miaf gee?"
Geef loh tanv bov,
"Hauf loh lokf Hha-lanv miaf."
5 Yav-gookf tooi geef loh bov,
"Meef loh took leekf lanv Nav-hheef huf hee La-ban meenf?"
Geef loh bov,
"Took."
6 Yav-gookf yuh tooi bov,
"Geef maif maif nenh haf?"
Geef loh bov,
"Maif maif nenh.
Noh,
leemf leekf geef huf hee La-zev voouf tuangf miaf noh."
7 Yav-gookf bov,
"Da veenf enf hangf hangv yoou,
meenf doongv tif ganv voouf tuangf loouh lukf yoou,
meef loh biang tuangf gee goonv namh vooi,
ya voouf booiv tiangh fooif hemv meenf tih maif haf."
8 Geef loh bov,
"Meenf!
Hauf loh hheem foou tuangf gee suanv buf miaf saif vooi,
hemv goonf yif dinf mee luat bak yangv,
nah sev tuangf gee goonv namh."
9 Yav-gookf enf hemv geef loh gang go yoou,
La-zev duf ga voouf tuangf bef lai geef gee miaf vooi,
eenv veeih tuangf neeh gee tih geef tiangh gee.
10 Yav-gookf it dekf huh leemf leekf beq geef huf hee La-zev,
voouf tuangf beq geef gee miaf vooi,
ziuh geen booiv yif dinf bak yangv mee uif,
biang tuangf beq geef huf hee La-ban gee goonv namh.
11 Yav-gookf hoomv La-zev,
Yav-gookf meenf gim lai on ziuh ngai oo oo teenf heen vooi.
12 Geef seengv La-zev bov,
"Hauf tih gof meef huf hee,
ma hauf loh Lif-baiv-zia tih gov baf moh huf hee."
La-zev ziuh deuf leengv booiv seengv bef lai geef.
13 La-ban hingf huh leekf gov geef huf hee Yav-gookf miaf vooi,
ziuh gan hhuangf deuf uk booiv zip geef,
gut geef,
hoomv geef,
yin geef leengv lanf vooi.
Yav-gookf ziuh seengv teeh geef gee inf inv zee La-ban vooi.
14 La-ban bov Yav-gookf bov,
"Meef titf titf tih leekf gov hauf huf hee,
doouf loh zuif sinv nenh!"
Yav-gookf oouv maih voon huf
Yav-gookf ziuh hemv La-ban zih geuf hee vooi.
15 Lai veenf hee,
La-ban bov Yav-gookf bov,
"Tuif yianf meef tih leekf gov hauf huf hee,
ya meenf gaiv lai hooi hauf huk gongv leeif leeiv,
meef bov,
meef dif oouv gai gee huk sinf gongv?"
16 La-ban lai leemf leekf voon huf,
neef nyoo huf hee yam Lif-yav hee,
neef nook huf hee yam La-zev hee.
17 Dav Lif-yav deei hee hheekf see luang,
danf tih La-zev huf hooif luang,
na dav ya meenf huh giauh luang.
18 Yav-gookf ooi geen La-zev vooi,
ziuh bov,
"Meef zeekf hheeng oouv leemf leekf neef nook meef huf hee La-zev ha sev hauf,
hauf ziuh hooi meef huk gongv sit veeif."
19 La-ban bov,
"Ha geef sev meef hhiangf gua ha sev vanh,
meef ziuf hemv hauf zih yoou nooih lo!"
20 Yav-gookf veeih oouv La-zev,
ziuh hooi La-ban huk gongv sit veeif vooi.
Geef eenv veeih ooi La-zev,
ziuh dekf neeh sit veeif zing gi veenf teenf heen.
21 Sit veeif hoouh looif,
Yav-gookf hemv La-ban gang bov,
"Tif ganv doongv vooi,
oouv maih hauf huf hee sev hauf,
hauf hau hemv geef lap suanv."
22 La-ban ziuh huk yan goonv moov,
sing lengv hunf yoou ninh gee inf inv miaf goonv.
23 Doongv veenf yoop vooi,
La-ban daf hong leemf leekf geef huf hee Lif-yav miaf sev Yav-gookf,
Yav-gookf ziuh hemv geef lap vooi.
24 La-ban ya hong leekf nof geef huf hee Si-faf sev leemf leekf geef huf hee Lif-yav huk meeih hiang.
25 Veenf bangv vooi,
Yav-gookf nah huh tih Lif-yav,
geef ziuh bov La-ban bov,
"Meef veeih gai teenf doi hauf nooh?
Hauf hooi meef huk gongv meenf tih veeih oouv La-zev haf?
Meef veeih gai tuat hauf nif?"
26 La-ban bov,
"Ziuf hauf loh yoou nooih gee fung sukf,
leemf leekf neef nyoo huf hee meenf ha yoou,
meenf hau ha leemf leekf neef nook huf hee.
27 Meef sian hemv Lif-yav gua giatf hun neeh sit veenf env,
hauf loh nah oouv La-zev sev meef,
meef ya hheem veeih geef hooi hauf huk gongv sit veeif hemv."
28 Yav-gookf hheeng vooi.
Geef hemv Lif-yav gua sit veenf hoouh looif,
La-ban ziuh oouv leemf leekf geef huf hee La-zev sev Yav-gookf huk maih.
29 La-ban ya hong leekf nof geef huf hee Bif-la sev leemf leekf geef huf hee La-zev huk meeih hiang.
30 Yav-gookf ya hemv La-zev lap suanv vooi,
geef dookf La-zev gua dookf Lif-yav vooi;
Yav-gookf ya hooi La-ban huk gongv sit veeif hemv.
Maih Yav-gookf gee lai leekf
31 Ye-hheev-huav dekf huh Yav-gookf meenf dookf Lif-yav,
ziuh biang Lif-yav lai lai leekf,
danf tih biang La-zev meenf lai lai leekf.
32 Lif-yav ziuh guaf nungh lai leekf da hhiangh huf hee,
eenv veeih geef bov,
"Ye-hheev-huav dekf huh hauf gee nanf vif vooi,
en teeif bef hauf huf hee itf dingf dookf hauf."
Geef ziuh hhooiv leekf neeh huf hee yam Liuv-bianfa hee.
33 Lif-yav yuh guaf nungh lai leekf da hhiangh huf hemv,
geef bov,
"Ye-hheev-huav hingf huh bef hauf huf hee meenf dookf hauf,
guf seeh yuh sev leekf da hhiangh huf hemv zee hauf."
Geef ziuh hhooiv leekf neeh huf hee yam Si-mianfb hee.
34 Lif-yav yuh guaf nungh lai leekf da hhiangh huf hemv,
geef bov,
"Hauf hooi bef hauf huf hee lai leekf da hhiangh tamv huf vooi,
neeh ziu bef hauf huf hee itf dingf netf neh hauf vooi."
Geef ziuh hhooiv leekf neeh huf hee yam Lif-vuifc hee.
35 Lif-yav yuh guaf nungh lai leekf da hhiangh huf hemv,
geef bov,
"Neeh fooif hee hauf dif ngenv Ye-hheev-huav."
Geef ziuh hhooiv leekf neeh huf hee yam Yiuh-dafd hee.
Lokf ninh geef ziuh hengf meenf lai leekf vooi.