30
1 La-zev huh geef toof too meenf hooi lai Yav-gookf lai leekf,
ziuh timv seeu booi geef huf hee,
geef bov Yav-gookf bov,
"Meef sev leekf zee hauf,
zeekf meenf sev leekf zee hauf,
hauf ziuh booiv daiv."
2 Yav-gookf hheei hhif La-zev vooi,
bov,
"Tih Siangf-dif biang meef meenf lai lai leekf,
hauf dif ding lai Siangf-dif haf?"
3 La-zev bov,
"Meeih hiang hauf huf hee Bif-la yoou nooih,
meef booiv hemv geef lap lo,
biang geef hooi hauf lai leekf,
teenf heen,
hauf ziuh hhoo yi lokf geef lai leekf vooi."
4 La-zev ziuh oouv leekf nof geef huf hee Bif-la sev bef geef huf hee huk maih nook,
Yav-gookf ziuh hemv Bif-la lap vooi.
5 Bif-la ziuh guaf nungh,
hooi Yav-gookf lai leekf da hhiangf huf hee.
6 La-zev bov,
"Siangf-dif hooi hauf zuq loou vooi,
ya hingf hauf gee doouh goouf vooi,
sev leekf da hhiangh huf hee zee hauf."
La-zev ziuh hhooiv leekf neeh huf hee yam Danfa hee.
7 Meeih hiang La-zev huf hee Bif-la yuh guaf nungh,
hooi Yav-gookf lai haih ngeeih huf leekf da hhiangh.
8 La-zev bov,
"Hauf hemv booi hauf huf hee zengv,
hauf yingf vooi."
La-zev ziuh hhooiv leekf neeh huf hee yam Nav-fov-ta-lifb hee.
9 Lif-yav huh toof too hengf meenf lai leekf vooi,
ziuh oouv meeih hiang geef huf hee Si-faf sev Yav-gookf huk maih nook.
10 Meeih hiang Lif-yav huf hee Si-faf hooi Yav-gookf lai leekf da hhiangh huf hee.
11 Lif-yav bov,
"Hauf haih hengf veenh."
Geef ziuh hhooiv leekf neeh huf hee yam Zia-teevc hee.
12 Meeih hiang Lif-yav huf hee Si-faf yuh hooi Yav-gookf lai haih ngeeih huf leekf da hhiangh.
13 Lif-yav bov,
"Hauf zinv lai fok,
maih leekf gee zung bov hauf lai fok."
Geef ziuh hhooiv leekf neeh huf hee yam Yav-seefd hee.
14 Doongv buiv mekf gee tif hoouh,
Liuv-bianf booiv da veen div heekf feeng zeve ziqf hee vooi,
ziuh oouv leengv miaf sev maih lai geef huf hee Yif-yav.
La-zev huh vooi ziuh yam Lif-yav bov,
"Sev makf leekf da hhiangh meef gee ziqf sev hauf."
15 Lif-yav bov,
"Meef geep bef hauf huf hee booiv ya meenf geeu yoou haf?
Ya dif tiang geep makf leekf da hhiangh hauf gee hemv booiv haf?"
La-zev bov,
"Meef zeekf oouv makf leekf da hhiangh meef gee sev hauf,
goomh nooih geef ziuh hhoo yi hemv meef lap."
16 Veenf yoop vooi,
Yav-gookf lokf da veen leengv miaf,
Lif-yav ziuh uk miaf zip geef,
bov,
"Goomh nooih meef hheem hemv hauf lap,
eenv veeih hauf duf ga oouv makf leekf hauf gee zov meef longf vooi."
Neeh goomh hee Yav-gookf ziuh hemv Lif-yav lap vooi.
17 Lif-yav doouh goouf,
Siangf-dif hheeng vooi,
geef ziuh guaf nungh,
hooi Yav-gookf lai haih nga huf leekf da hhiangh.
18 Lif-yav bov,
"Siangf-dif oouv sinf gongv zee hauf vooi,
eenv veeih hauf oouv meeih hiang hauf huf hee sev bef hauf huf hee vooi."
Geef ziuh hhooiv leekf neeh huf hee yam Yih-sa-ziaf hee.
19 Lif-yav yuh guaf nungh,
hooi Yav-gookf lai haih sok huf leekf da hhiangh.
20 Lif-yav bov,
"Siangf-dif sev goouh dooif dooi sinf gee zee hauf vooi,
en teeif bef hauf huf hee itf dingf vook hhoonv hauf,
eenv veeih hauf hooi bef hauf huf hee lai leekf da hhiangh sok huf vooi."
Geef ziuh hhooiv leekf neeh huf hee yam Si-buf-lonvg hee.
21 Hoouh looif Lif-yav yuh lai leemf leekf huf hemv,
geef hhooiv leemf leekf huf hee yam Tiv-nav hee.
22 Siangf-dif gov La-zev,
hingf geef gee doouh goouf vooi,
biang geef hhoo yi lai leekf vooi.
23 La-zev ziuh guaf nungh,
lai leekf da hhiangh huf hee,
geef bov,
"Siangf-dif seef hauf gee ngaif nyo booiv vooi."
24 Geef yuh bov,
"Hhuf Ye-hheev-huav sev leekf da hhiangh huf hemv gav hauf."
Geef ziuh hhooiv leekf neeh huf yam Ye-seefh hee.
Yav-gookf hemv La-ban gang sinf gongv
25 La-zev lai Ye-seef hoouh looif,
Yav-gookf ziuh hemv La-ban gang bov,
"Biang hauf leengv booiv,
hauf dif leengv lengv hauf gee,
lauh gia hauf gee.
26 Meef sev hauf yin maih yin leekf hauf gee leengv booiv,
geef loh tih hauf hemv meef huk gongv toonv gee,
hauf di leeuf hooi meef huk gongv,
meef toof too ya huh."
27 La-ban bov geef bov,
"Meef zeekf vook hhoonv hauf,
ziuh ziuf hemv hauf zih,
hauf tooi gungv huh Ye-hheev-huav dif sev fok zee hauf tih lokf meef."
28 La-ban yuh bov,
"Meef dif oouv sinf gongv giau liauh,
hauf itf dingf oouv meef."
29 Yav-gookf bov,
"Meef huh hauf tih di leeuf hooi meef huk gongv gee,
biang nguf meef gee,
tuangf meef gee fat liauh uif miaf.
30 Hauf meenf miaf zee sianv,
gav teeh meef gee ziqf hee tiuf tiu,
en teeif dif gav teenf liauh,
tih lokf hauf miaf lanf meef,
Ye-hheev-huav nah sev fok zee meef gee.
En teeif,
hauf dif doongv gi tif nah huk gav hauf mee uif nif?"
31 La-ban bov,
"Hauf hheem oouv gai gee sev meef?"
Yav-gookf bov,
"Gai gee meef duf meenf ngah sev hauf,
meef zeekf hheeng teeh hhinh hee,
hauf ziuh ziuf hooi meef tiangh tuangf.
32 Veenf nooih hauf dif loouh da tuangf meef gee vooi,
liakf mianv yiangv lamv gee hemv san yiangv fiakf gee gangf tuangf huav gee uk miaf,
tuangf neeh gee ziuh tuif sinf gongv hauf gee.
33 Teenf heen,
meef ziuh huh hauf daqf vooi,
hoouh looif meef miaf saf tuangf hauf gee,
zeekf huh mianv yiangv gee meenf lamv san yiangv gee meenf fiakf,
tuangf gee meenf huav,
ziuh tih hauf lookf meef gee."
34 La-ban bov,
"Noov lai,
ziuf meef gang gee huk lo!"
35 Danf tih neeh veenf hee,
La-ban duf ga liakf hookf san yiangv lai huav di luif luif,
huav di dem dem neeh gee,
hemv maih san yiangv lai huav di dem dem,
huav fiakf di luif luif neeh gee,
gangf too lai mianv yiangv lamv gee inf inv uk miaf vooi,
gauv sev leekf da hhiangh geef geei.
36 Biang toof too hemv Yav-gookf feenv goonf vooi,
lokf geef hhootf hee booiv ningf Yav-gookf neeh hhootf hee,
hheem booiv sunv tamv veenf nah doongv.
Yav-gookf ziuh ziuf tiangh tuangf La-ban liakf teengh longf neeh gee.
37 Yav-gookf ziuh damh ngev dun yiangv suf,
singf suf,
feeng suf neeh gee miaf,
iakf nangv feenh hee booiv vooi,
biang ngev dun gee doh di luif luif fiakf fiakf uk miaf,
38 geef ziuh tip ngev iakf nangv neeh gee loouh da mangv namh hemv soouf namh tuangf goonv neeh gee vooi,
doi na tuangf gee.
Tuangf gee miaf goonv namh gee tif loouh ziuh yoou ninh amv goonf.
39 Teenf heen tuangf gee doi na ngev neeh gee amv goonf,
ziuh lai leekf tuangf lai huav di luif luif lai huav di dem dem gee uk miaf.
40 Yav-gookf ziuh feenv leekf tuangf nauf lai neeh gee uk miaf,
biang yoou gakf hhootf vooi.
Geef biang tuangf geef gee yoou gakf hhootf,
meenf hemv tuangf La-ban gee loouh goonf.
Yuh biang tuangf La-ban gee hemv tuangf lai huav di luif luif gee hemv tuangf lamv gee doi na goonf.
41 Tuangf fuif gee amv goonf gee tif hoouh,
Yav-gookf ziuh tip ngev dun iakf nangv neeh gee loouh da mangv namh vooi,
biang tuangf gee doi na ngev dun gee amv goonf.
42 Danf tih tuangf sumv gee amv goonf gee tif hoouh,
Yav-gookf ziuh meenf tip ngev dun.
Teenf heen tuangf sumv gee ziuh guiv La-ban,
tuangf fuif gee ziuh guiv Yav-gookf.
43 Teenf heen gav teeh Yav-gookf gee ziuh mef miaf mef liauh vooi,
geef lai tuangf,
lai bef nof maih nof,
lai lookf hoov,
lai luh neeh gee di hoouf hoouf teenf heen.