3 Neeh tif hoouh,

Ye-hheev-huav ziuh hemv Yav-gookf gang bov,

"Meef hheem leengv lengv zuh zung meef gee,

leengv ningf gav lanf meef gee vooi,

hauf itf dingf hemv meef yoou ningf goonf."

4 Yav-gookf ziuh faif lengv hunf booiv yam La-zev hemv Lif-yav miaf da veen ningf geef tiangh tuangf neeh hhootf hee vooi.

5 Yav-gookf bov geef loh bov,

"Hauf huh baf moh doi hauf meenf zing gua na teenf maif vooi,

danf tih hauf bef lai gee Siangf-dif gi tif duf hemv hauf yoou ningf goonf.

6 Hauf di leeuf voongf mingh hooi baf moh huk gongv,

meef loh ya huh.

7 Baf moh tuat hauf,

gaih sinf gongv hauf gee teepf fooif vooi,

danf tih Siangf-dif meenf sev geef haih hauf.

8 Baf moh zeekf bov,

'Tuangf huav di dem dem neeh gee ziuh oouv sev meef huk sinf gongv',

tuangf gee lai leekf tuangf ziuh suanv buf lai huav di dem dem.

Geef zeekf bov,

'Tuangf huav di luif luif neeh gee ziuh oouv sev meef huk sinf gongv',

tuangf gee lai leekf tuangf ziuh suanv buf lai huav di luif luif.

9 Siangf-dif ziuh tih teenf heen oouv tuangf baf moh gee miaf sev hauf vooi.

10 "Yoou tuangf gee amv goonf neeh gui hee,

lai fooif hee hauf voonf huh amv maih gee hookf tuangf zung tih lai huav di dem dem huav di luif luif gee.

11 Siangf-dif gee sih zeh yam hauf bov,

'Yav-gookf haf!

' Hauf bov,

'Gai gee?'

12 Geef bov,

'Meef dekf,

amv maih gee hookf tuangf zung tih lai huav di dem dem di luif luif gee,

La-ban di leeuf doi meef,

hauf zung dekf huh vooi.

13 Hauf tih Bov-teef-lif gee Siangf-dif,

gua na meef yoou ninh oouv yuf miaf giuv hoouv mee,

eef hauf gua.

En teeif meef hheem lif hhooiv lengv neeh hhootf hee,

leengv gia hiang meef gee vooi.'"

14 La-zev hemv Lif-yav tanv Yav-gookf bov,

"Noov lai!

Fanh zingf gav teeh bee baf gee hauf loh ya meenf lai feenh vooi.

15 Geef meenf tih oouv hauf loh huk nguaih yinf vooi haf?

Geef meenf danv ing hauf loh vooi,

ya goonv ngoonf fiakf ing hauf loh neeh gee inf inv booiv vooi.

16 Siangf-dif lokf bef lai hauf loh neeh hhootf hee geep miaf gee itf siatf saiv sanh,

zung tih hauf loh hemv leekf hauf loh gee gee.

En teeif,

too lai Siangf-dif zuk meef gee,

meef nah guf booiv huk lo."

17 Yav-gookf ziuh uif miaf suv tipf goouh geef gee maif vooi,

yam leekf geef gee maih geef gee zung hheeih geen lookf hoov vooi.

18 Ya voouf nguf geef gee tuangf geef gee inf inv hemv dai geef suanv buf gee saiv sanh,

ziuh tih geef yoou Ba-danf-yaf-lanv zik gee nguf hemv tuangf,

leengv lengv Gia-noomv ningf bef lai geef Yih-sav neeh hhootf hee vooi.

19 Neeh tif hoouh La-ban booiv geuv vunf tuangf vooi,

La-zev ziuh lookf gungv bef lai geef gee booiv vooi.

20 Yav-gookf tuat La-ban,

meenf seengv La-ban,

ziuh lookf lookf deuf vooi.

21 Geef dai geef too lai gee itf siatf gan hhuangf deuf luat lengv neeh hhootf hee.

Geef gua hoof Iuf-fa-la-tiv neeh hiuf vooi,

booiv Gi-liatf san hhi neeh fiangf vooi.

22 Haih tamv veenf,

lengv hunf seengv La-ban bov Yav-gookf deuf vooi.

23 La-ban ziuh yin gav lanf engv tok geef gee booiv hum Yav-gookf,

hum sit veenf vooi,

nah yoou Gi-liatf san hhi neeh hhootf hee huh looif geef loh.

24 Neeh goomh hee,

Siangf-dif geen voonf La-ban,

bov,

"Meef hheem zeeq tooi,

meenf ngah ui hiapf Yav-gookf."

25 La-ban hum di moh Yav-gookf vooi.

Neeh tif hoouh Yav-gookf yoou Gi-liatf san hhi dap ziangf feengv,

La-ban hemv gav lanf engv tok geef gee ya yoou ninh dap ziangf feengv.

26 La-ban bov Yav-gookf bov,

"Meef tuat hauf huk gai nooh?

Meef lookf lookf deuf booiv meenf seengv hauf,

ya yin leemf leekf hauf gee booiv vooi,

zing oouv mitf miaf geep booiv teenf heen.

27 Meef veeih gai lookf lookf deuf booiv meenf seengv hauf?

Meef zeekf seengv hauf,

hauf ziuh hau hau lakf lakf,

git longv git loof,

siang goov ngatf hinf hong meef leengv booiv.

28 Meef meenf sev hauf hoomv leekf lanv hauf gee hemv leemf leekf hauf gee,

hong looif geef loh,

meef teenf heen huk titf titf ngeenf inv vooi.

29 Beenh laiv hauf hhoo yi moot meef booiv,

danf tih goomh vaf meef bef lai gee Siangf-dif hemv hauf gang bov,

'Meef hheem zeeq tooi,

meenf zun ui hiapf Yav-gookf.'"

30 La-ban yuh gang bov,

"Gif yianv meef tiang gav lanf gee vooi,

itf dingf dif leengv booiv,

meef leengv ziuh leengv,

danf tih meef veeih gai lookf gungv hauf gee hemv booiv nif?"

31 Yav-gookf tanv La-ban bov,

"Eenv veeih hauf mangf meef dif lokf ningf hauf neeh hhootf hee geep leemf leekf meef gee leengv booiv,

hauf nah lookf lookf deuf gee.

32 Meef bov gungv meef gee vau vooi,

meef zeekf giam gungv meef gee lokf naf nee neeh hhootf hee uk miaf,

naf nee ziuh voom booiv.

En teeif dim sinf sik engv tok gee zung yoou nooih,

meef yoou hauf neeh hhootf hee zeekf nginh uk goouh gai gee tih meef gee,

meef ziuh oouv leengv booiv."

Yuanv miaf Yav-gookf meenf huh La-zev lookf gungv neeh gee.

33 La-ban sian loouh ziangf feengv Yav-gookf mee giam,

yuh loouh ziangf feengv Lif-yav mee vooi giam,

ya loouh ziangf feengv leekf nof voon huf vooi giam,

zung meenf giam lai heekf gai gee,

ziuh lokf ziangf feengv Lif-yav mee uk miaf,

loouh ziangf feengv La-zev mee vooi giam.

34 La-zev duf ga me gungv gee loouh hooih dauf anv lookf hoov gee vooi,

geef ya ngov geen baiv anv vooi.

La-ban giam ziangf feengv mee hoou vooi,

ya meenf giam lai heekf.

35 La-zev bov bef lai geef bov,

"Baf haf,

meef meenf ngah hheei hhif goof,

neeh gi veenf hauf lai goouh,

meenf foong bianf uif miaf."

La-ban leeuf ziqf duf giam hoou vooi,

zung meenf giam lai heekf gungv geef gee.

36 Yav-gookf ziuh hhif tuf tuf teenf heen an La-ban,

bov,

"Hauf huk gai gee famh loouh meef vooi,

lai gai gee soih,

meef daf teenf heen hum hauf zing hum sookf hee haf?

37 Meef giam hauf itf siatf gee goouh hoou vooi,

giam heekf goouh meef gee yoou meenf?

Oouv uk miaf faif yoou dau na sinf sik engv tok gee vooi,

biang geef loh hooi doouf loh duan li.

38 Hauf yoou lanf meef neeh ngih teepf veeif,

maih mianv yiangv meef gee hemv maih san yiangv meef gee zung meenf faih leekf yoou da boqf gua,

hauf ya meenf goonv hookf tuangf meef gee gua.

39 Tuangf bif goouh sangv gapf daiv neeh gee,

hauf meenf oouv leengv miaf sev meef dekf,

hauf toof too fuif leengv meef vooi.

Meenf guan veenf bangv ha tih veenf yoop bif vanh lookf booiv gee,

meef zung yam hauf fuif.

40 Veenf bangv lit ziak hauf,

da goomh lang gapf hauf,

meenf lai goomh suanv gua timv.

41 Hauf yoou lanf meef neeh ngih teepf veeif,

veeih leemf leekf meef voon huf hooi meef huk gongv teepf ti veeif,

veeih tuangf meef gee hooi meef huk gongv sok veeif.

Meef ya gaih sinf gongv hauf gee teepf fooif vooi.

42 Zeekf meenf tih baf hauh Yih-sav gingf vuif gee Siangf-dif,

ziuh tih Yav-bov-la-hanf gee Siangf-dif hemv hauf yoou ningf goonf,

veenf nooih meef nge biang hauf moof leeif leeiv leengv booiv vooi.

Danf tih Siangf-dif dekf huh hauf huk hho nanf vif hemv tuh meef nanf vif,

goomh vaf ziuh an meef."

43 La-ban tanv Yav-gookf bov,

"Leemf leekf neeh voon huf tih leemf leekf hauf gee,

leekf lanv neeh gee tih leekf lanv hauf gee,

tuangf neeh gee ya tih tuangf hauf gee,

meef too lai gee itf siatf zung tih hauf gee.

Geef loh dif booiv hauf meenf luf lai geef loh on,

hauf dif huk lai gai yoou?

44 Teenf heen,

en teeif doouf loh voon na hheem hemv goonf lipf ye,

oouv goouh miaf huk zingf gif."

45 Yav-gookf ziuh doongf dinf mee uif huk hoouv.

46 Geef yuh yam engv tok gee bov,

"Meef loh hepf dinf gee tingf zopf vooi."

Geef loh ziuh oouv dinf gee miaf hepf tingf zopf hee vooi,

hemv goonf ziuh yoou ningf dinf neeh zopf hee goonv faih.

47 La-ban hhooiv dinf neeh zopf hee yam I-zia-eev-sa-hha-tuf-ta hee,

danf tih Yav-gookf hhooiv dinf neeh zopf hee yam Zia-leeif-teev^a hee.

48 La-ban bov,

"Dinf neeh zopf hee ziuh tih veenf nooih doouf loh hemv goonf eef goonf gee zingf gif."

Guf seeh lengv neeh hhootf hee yam Zia-leeif-teev hee,

49 lengv neeh hhootf hee ya yam Miv-si-ba^b hee,

eenv veeih La-ban bov,

"Doouf loh feenv goonf hoouh looif,

hi voongf Ye-hheev-huav dekf doouf loh tih meenf tih teenf huk.

50 Meef zeekf doi leemf leekf hauf gee meenf maif,

ya sungf oouv maih gakf gee hemv,

tuif yianf meenf lai lengv hunf huh,

danf tih meef hheem oov,

lai Siangf-dif yoou da doouf loh huk zingf yinv."

51 La-ban yuh bov Yav-gookf bov,

"Meef dekf dinf yoou da doouf loh neeh zopf hee hemv hoouv dinf neeh mee.

52 Dinf neeh zopf hee huk zingf gif,

hoouv dinf neeh mee ya huk zingf gif.

Hauf itf dingf meenf gua dinf neeh zopf hee booiv haih meef,

meef ya meenf zun gua dinf neeh zopf hee hemv hoouv dinf neeh mee miaf haih hauf.

53 Hi voongf Yav-bov-la-hanf gee Siangf-dif hemv gungv Nav-hheef huf hee,

ziuh tih bef lai geef loh gee Siangf-dif,

hooi doouf loh duan li."

Yav-gookf ziuh nyi bef lai geef huf hee Yih-sav gingf vuif gee Siangf-dif fat tooih.

54 Geef ya yoou baiv tiah hianf goouh sev Siangf-dif,

sing sinf sik engv tok gee goonv fiah.

Geef loh goonv fiah vooi,

ziuh yoou ninh gua goomh.

55 Haih ngeeih veenf zauf zau La-ban uif miaf,

hoomv leekf lanv geef gee hemv leemf leekf geef gee,

zukf fukf geef loh hoouh looif,

ziuh leengv lanf vooi.