Yav-gookf hemv Yih-soouv am goonf
33
1 Yav-gookf doongf hau dekf huh Yih-soouv yin da hhiangh tee bek na gua miaf,
geef ziuh oouv leekf geef gee gauv sev Lif-yav,
La-zev hemv maih nook geef voon huf.
2 Geef yam meeih hiang voon huf hemv leekf geef loh gee booiv na,
Lif-yav hemv leekf geef hoouf hee booiv yoou dau looif,
La-zev hemv Ye-seef booiv yoou dauf dau looif.
3 Yav-gookf toof too booiv gua na geef loh,
geef linf linf hhuih hhupf yoou dauf matf sit fooif,
nah doongv ningf gof geef huf hee Yih-soouv.
4 Yih-soouv deuf miaf zip geef,
gut geef,
hhupf yoou gof lingh geef hoomv geef,
geef loh voon na zung ngai vooi.
5 Yih-soouv doongf hau dekf huh maih gee hemv leekf gee,
ziuh tooi bov,
"Lengv hunf hemv meef hongf goonf miaf neeh gee tih naf nee?"
Yav-gookf bov,
"Leekf neeh gee tih Siangf-dif dookf leekf nof sev zee leekf nof gee."
6 Meeih hiang voon huf hemv leekf geef loh gee ziuh geen miaf bai Yih-soouv.
7 Lif-yav hemv leekf geef gee ya miaf bai,
seeif looif Ye-seef hemv La-zev ya geen miaf bai.
8 Yih-soouv bov,
"Hauf yoou da sunv am heekf nguf tuangf neeh gee di hoouf hoouf,
tih gai gee if see nooh?"
Yav-gookf bov,
"Goouh neeh gee tih hauf hong sev zu hauf gee,
hhuf meef meenf ngah himf."
9 Yih-soouv bov,
"Yav-gookf haf!
Hauf gai gee duf lai,
goouh meef gee teengh zee meef."
10 Yav-gookf bov,
"Meenf,
meef zeekf vook hhoonv hauf,
ziuh hheem lokf da moof hauf suv lih veetf neeh gee longf.
Meef doi hauf teenf maif,
eenv veeih hauf dekf huh meef zing goh dekf huh na Siangf-dif mee teenf heen.
11 Meef hheem suv lih veetf neeh gee longf,
eenv veeih Siangf-dif sev fok zee hauf,
biang hauf gai gee duf lai."
Yav-gookf iangv booiv iangv leengv,
Yih-soouv nah oouv vooi.
12 Yih-soouv bov,
"Teenf heen doouf loh booiv lo!
Hauf hemv meef hongf goonf booiv."
13 Danf tih Yav-gookf bov Yih-soouv bov,
"Zu haf,
meef huh leekf hauf gee nook yoou,
leekf nguf leekf tuangf gee enf goonv noq yoou,
zeekf gan veenf hee hemv,
leekf nguf leekf tuangf gee ziuh suanv buf zung daiv vooi.
14 Zu haf,
meef sian booiv na,
hauf loh laif laih hemf moh booiv,
nguf gee tuangf gee hemv leekf nook gee booiv lai giauh meng,
hauf loh ziuh booiv giauh meng,
teenf teenf booiv doongv Si-eev ningf zu hauf neeh hhootf hee."
15 Yih-soouv bov,
"Teenf heen,
hauf teengh lengv hunf hemf moh hauf gee gi huf yoou ningf meef."
Yav-gookf bov,
"Veeih gai dif teenf heen nif?
Meef doi hauf duf ga geeu maif vooi."
16 Neeh veenf hee,
Yih-soouv ziuh leengv Si-eev vooi.
17 Danf tih Yav-gookf deuf booiv Su-gee vooi,
yoou ninh huk lanf zih,
ya huk lukf nguf lukf tuangf gee.
Guf seeh lengv neeh hhootf hee yam Su-geea hee.
18 Yav-gookf lokf Ba-danf-yaf-lanv leengv miaf,
fingf fingf anf anv doongv bak lengv Gia-noomv gee Sif-giamf heeuv vooi,
yoou na heeuv neeh mee dap ziangf feengv.
19 Lengv geef dap ziangf feengv neeh hhootf hee,
tih geef oouv ngoonf fiakf it bek mooqf hemv bef lai Sif-giamf huf hee vianv gee,
bef lai Sif-giamf huf hee tih leekf lanv Hha-mof huf hee.
20 Yav-gookf yoou ninh huk gif hanv mee,
hhooiv nooiv yam I-lif-i-lov-i-yih-seef-liatf hee.