5 Yav-gookf hingf huh Sif-giamf zeei leemf leekf geef huf hee Tiv-nav vooi.

Neeh tif hoouh leekf da hhiangh geef gee enf yoou da hhunf tiangh nguf tiangh tuangf yoou,

geef ziuh meenf meen meenf gang go,

foou leekf da hhiangh geef gee leengv.

6 Bef lai Sif-giamf huf hee Hha-mof miaf div Yav-gookf,

dif hemv geef hamf liangf teeh neeh hhinh hee.

7 Leekf da hhiangh Yav-gookf gee hingf huh teeh neeh hhinh hee,

ziuh lokf da veen leengv miaf,

leeuf na duf gikf hheei,

hhif lukf vooi,

eenv veeih Sif-giamf yoou gia zukf Yih-seef-liatf mee huk teeh hau zookf gee vooi,

ziuh tih zeei leemf leekf Yav-gookf huf hee vooi,

neeh gee beenh laiv tih meenf gaiv lai huk gee.

8 Hha-mof hemv geef loh hamf liangf bov,

"Leekf da hhiangh hauf huf hee Sif-giamf meenf huh giauh ooi leemf leekf meef loh huf hee,

hhuf meef loh ha geef sev leekf da hhiangh hauf huf hee.

9 Doouf loh hemv goonf huk sinf gav;

meef loh hhoo yi ha leemf leekf gee sev lengv hunf hauf loh gee,

ya hhoo yi oouv leemf leekf hauf loh gee.

10 Meef loh hemv hauf loh zih yoou nooih lo!

Lengv neeh gee zung yoou dau na meef loh,

suf saih meef loh yoou nooih zih,

yoou nooih huk tengv li,

vianv lengv gee huk saiv sanh."

11 Sif-giamf toof too ya hemv bef lai Tiv-nav gangf gof Tiv-nav gee gang bov,

"Meef loh zeekf vook hhoonv hauf,

meenf guan meef loh dif oouv gai gee hauf duf oouv meef loh.

12 Zih iauf meef loh hheeng ha leemf leekf neeh huf hee sev hauf,

meenf guan meef loh yam hauf hong giau sinf hemv giau liauh lih veetf,

hauf itf dingf ziuf meef loh gang gee oouv zee meef loh."

13 Leekf da hhiangh Yav-gookf hoouf hee eenv veeih Sif-giamf zeei gov geef loh huf hee Tiv-nav vooi,

ziuh gang go gev tuat Sif-giamf hemv bef lai geef huf hee Hha-mof,

14 bov geef loh bov,

"Hauf loh meenf ha lai gov huf hee sev lengv hunf meenf ngootf leei neeh gee,

teenf huk doi hauf loh miaf gang tih zuif hau zookf gee.

15 Suv feei meef loh hheeng hiauv gianf hauf loh neeh mee,

hauf loh nah dapf ingf meef loh,

ziuh tih meef loh too lai gee da hhiangh duf hheem ngootf leei,

zing hauf loh teenf heen.

16 Teenf heen,

hauf loh nah ha leemf leekf gee sev meef loh,

ya oouv leemf leekf meef loh gee,

hauf loh ziuh hemv meef loh zih yoou ningf goonf,

doouf loh hemv goonf ziuh bin tingf minv zukf mooqf hee.

17 Zeekf meef loh meenf hingf sav hauf loh meenf ngootf leei,

hauf loh ziuh yin gov huf hee luat lengv neeh hhootf hee."

18 Hha-mof hemv leekf da hhiangh geef huf hee Sif-giamf nginf vuiv geef loh gang gee maif.

19 Sif-giamf ziuh mah siangf ziuf geef loh gang gee booiv huk,

eenv veeih geef ooi leemf leekf Yav-gookf huf hee loouh timv vooi.

Sif-giamf yoou gav lanf bef lai geef mee tih vanh zuif zun zungf gee lengv hunf.

20 Hha-mof hemv leekf da hhiangh geef huf hee Sif-giamf ziuh booiv bak deenh heeuv geef loh mee vooi,

hemv heeuv neeh mee gee lengv hunf gang bov,

21 "Lengv hunf neeh gee doi doouf loh maif mai nenh,

biang geef loh zih yoou nooih zaix,

geef loh ya hhoo yi yoou nooih huk tengv li.

Moh dekf!

Lengv doouf loh neeh hhootf hee hhuatf hhuat ya geeu geef loh hemv zih.

Doouf loh hhoo yi oouv leemf leekf geef loh gee,

ya hhoo yi ha leemf leekf doouf loh gee sev geef loh.

22 Danf tih geef loh lai hiauv gianf mee,

ziuh tih da hhiangh doouf loh gee suanv buf hheem ngootf leei,

zing geef loh teenf heen,

geef loh nah hheeng hemv doouf loh zih yoou ningf goonf,

bin tingf minv zukf mooqf hee.

23 Doouf loh hongf i hiauv gianf geef loh mee lo,

biang geef loh hemv doouf loh zih yoou ningf goonf,

teenf heen nguf hemv tuangf geef loh gee,

saiv sanh geef loh gee,

meenf tih zung bin tingf doouf loh gee vooi haf?"

24 Too lai lokf bak deenh heeuv neeh mee uk loouh gee lengv hunf zung hingf go Hha-mof hemv leekf da hhiangh geef huf hee Sif-giamf gee vooi.

Teenf heen too lai lokf bak heeuv neeh mee uk loouh gee da hhiangh zung ngootf leei vooi.

25 Doongv haih tamv veenf,

heeuv neeh mee gee da hhiangh ngootf leei enf dookf yoou,

leekf da hhiangh Yav-gookf voon huf,

ziuh tih gof Tiv-nav hongf hungh voon huf Si-mianf hemv Lif-vuif,

dai mitf lookf lookf loouh heeuv vooi,

fokf geef loh meenf zuf if,

ziuh ga da hhiangh gee daiv inf inv vooi,

26 ya oouv mitf ga Hha-mof hemv leekf da hhiangh geef huf hee Sif-giamf daiv vooi,

yin Tiv-nav lokf lanf Sif-giamf uk miaf booiv vooi.

27 Yav-gookf hhiv ha gee leekf da hhiangh ziuh miaf geep heeuv neeh mee inf inv booiv vooi,

hooi gov geef loh huf hee boou suf,

eenv veeih gov geef loh huf hee yoou heeuv neeh mee bif vanh zeei vooi.

28 Geef loh geep tuangf,

geep nguf,

geep luh,

gangf geep goouh too lai yoou da heeuv da veen neeh gee inf inv booiv vooi,

29 ya geep geef loh itf siatf gee sinf hemv goouh,

geep leekf,

geep maih,

gangf geep goouh too lai yoou da lanf neeh gee inf inv booiv vooi.

30 Yav-gookf bov Si-mianf hemv Lif-vuif bov,

"Meef loh luih hauf nanf vif vooi,

biang hauf yoou da lengv hunf Gia-noomv gee hemv lengv hunf Bih-lif-sih gee faih nooiv inv vooi.

Lengv hunf hauf gee tiu,

zeekf geef loh hemv goonf miaf git hauf,

hauf hemv hauf suanf lanf ziuh daiv hutf voonf vooi."

31 Danf tih geef loh bov,

"Teenf heen,

suf saih geef loh doi gov hauf loh huf hee zing maih huav teenf haf?"