2 Yav-gookf gav lanf gee teeh gif yoou dauf ninh:

Ye-seef teepf sit tui gee tif hoouh,

siangf siangf di moh gof geef hoouf hee booiv tiangh tuangf.

Gof geef hoouf hee huk teeh seeu,

geef zung seengv bef lai geef vooi.

Gof geef neeh hoouf hee tih maih nook bef lai geef voon huf Bif-la hemv Si-faf lai gee.

3 Yih-seef-liatf zuif dookf Ye-seef,

dookf geef gua hhiv ha gee leekf da hhiangh vooi,

eenv veeih geef lauf lauh nah lai Ye-seef;

geef huk foouf hiuf hee luangf luangf sev Ye-seef dingv.

4 Gof Ye-seef gee huh bef lai geef loh dookf Ye-seef gua dookf geef loh vooi,

ziuh zookf Ye-seef,

gang go sak tek geef.

5 Lai fooif hee Ye-seef lap suanv voonf,

geef ziuh seengv geef voonf gee zee gof geef hoouf hee,

geef loh ziuh geengf zookf geef vooi.

6 Ye-seef seengv geef loh bov,

"Hauf seengv hauf voonf gee zee meef loh,

meef loh zuf if hingf ho,

7 hauf voonf huh doouf loh yoou da veen gatf mekf,

hauf gatf neeh zopf hee it ziu nyunv doongf doongf uif,

meef loh gatf neeh gee zung vif hauf gatf neeh zopf loouh vooi,

bai hauf neeh zopf hee."

8 Gof geef hoouf hee bov geef bov,

"Sangf tih meef titf titf dif huk voongf hauf loh haf?

Titf titf dif guanh hauf loh haf?"

Geef loh eenv veeih Ye-seef voonf gee hemv geef gang gee go,

ziuh geengf zookf geef.

9 Seeif looif geef yuh voonf fooif hemv,

geef ya seengv geef voonf gee zee gof geef hoouf hee bov,

"Meef loh huh meenf?

Hauf ya voonf fooif hemv,

hauf voonf huh da veenf,

maih saiv,

hemv teepf it mooqf leekf saiv zung bai hauf."

10 Ye-seef ya seengv geef voonf gee zee bef lai geef hemv gof geef hoouf hee,

bef lai geef ziuh an geef bov,

"Meef voonf gee tih gai gee nooh?

Titf titf hauf hemv maih lai meef huf hee gangf engv tok meef gee zung dif hhuih longf hhupf yoou dauf matf bai meef haf?"

11 Gof geef hoouf hee zung timv seeu geef,

danf tih bef lai geef oov teeh neeh hhinh hee loouh da timv vooi.

12 Lai fooif hee,

gof Ye-seef hoouf hee booiv Sif-giamf tiangh tuangf bef lai geef loh gee vooi.

13 Yih-seef-liatf ziuh yam Ye-seef bov,

"Gof meef hoouf hee yoou Sif-giamf tiangh tuangf nenh,

meef booiv ninh dekf geef loh ziu."

Ye-seef bov,

"Heh,

hauf en teeif booiv."

14 Bef lai geef bov,

"Meef booiv dekf gof meef gee hemv tuangf gee tih meenf tih maif maif,

leengv miaf seengv hauf."

Bef lai hong geef uk booiv,

geef ziuh lokf song tiah Si-bov-lonv booiv Sif-giamf vooi.

15 Ye-seef doongv da loouh Sif-giamf gee ziuh sook sunv vooi,

lai lengv hunf huf hee dekf huh vooi ziuh tooi geef bov,

"Meef div gai gee?"

16 Geef tanv bov,

"Hauf div gof hauf gee,

meef huh geef loh yoou leeuf tiangh tuangf meenf?"

17 Lengv hunf neeh huf hee bov,

"Geef loh meenf yoou nooih vooi,

hauf hingf geef loh bov dif booiv To-tan."

Ye-seef ziuh booiv zuiv gof geef hoouf hee,

yoou To-tan div heekf geef loh vooi.

18 Gof geef hoouf hee looif looiv dekf huh geef,

dim geef meenf doongv ningf yoou,

gof geef hoouf hee duf ga hamf liangf dif ga geef vooi.

19 Geef loh hemv goonf bov,

"Noh,

voonf voonf neeh huf hee miaf vooi noh!

20 Miaf!

Doouf loh hemv goonf ga geef booiv,

fengf geef longf dauf soongh liang lakf lakf nyoof nyoo neeh mee vooi,

ziuh seengv bee baf bov goouh goonv geef booiv vooi.

Doouf loh dekf geef voonf gee doongv nooih dif di leeuf bin tingf titf."

21 Danf tih Liuv-bianf hingf huh vooi,

geef dif tiang go Ye-seef luat moof geef loh,

ziuh bov,

"Doouf loh meenf ngah sin zeef ga geef."

22 Liuv-bianf yuh bov geef loh bov,

"Meenf ngah leeiv baq geef gee,

fengf geef longf dauf soongh liang da loouh neeh mee vooi,

meenf ngah longf moof haih geef."

Liuv-bianf teenf gang tih tiang go Ye-seef luat moof geef loh,

hau yin Ye-seef leengv booiv gauv sev bee baf geef.

23 Ye-seef giangf doongv ningf gof geef hoouf hee,

geef loh ziuh sik foouf luangf luang geef dingv dingv neeh hiuf hee vooi,

24 fengf geef longf dauf soongh vooi,

soongh neeh mee liangf liang meenf lai namh.

25 Geef loh ngov longf goonv fiah gee tif hoouh,

doongf hau it ziu dekf huh lengv hunf Yih-siv-mah-lif hoouf hee,

lokf lengv Gi-liatf gee miaf,

geef loh oouv lookf hoov hav hiang liauf,

yuv hiang,

mookf yookf^a neeh gee longf Ai-gipf.

26 Yiuh-daf bov engv tok geef hoouf hee bov,

"Doouf loh ga tok doouf loh huf hee daiv vooi,

zooh tiv bov goouh goonv geef booiv vooi,

doi doouf loh lai gai maif lengv nif?

27 Ziuf hauf dekf,

ing geef sev lengv hunf Yih-siv-mah-lif gee enf maif,

doouf loh meenf ngah longf moof haih geef,

eenv veeih geef tih tok doouf loh huf hee,

tih engv tok hongf hungh doouf loh huf hee."

Engv tok hoouf hee zung hongf i vooi.

28 Lengv hunf Miv-dianf^b huk tengv li neeh hoouf hee lokf neeh hhootf hee gua gee tif hoouh,

gof geef hoouf hee ziuh leeh Ye-seef lokf dauf soongh geen miaf,

ngoonf fiakf ngih teepf mooqf^c ziuh ing geef sev lengv hunf Yih-siv-mah-lif gee vooi.

Geef loh ziuh yin geef booiv Ai-gipf vooi.

29 Seeif looif Liuv-bianf leengv doongv ningf soongh neeh mee,

meenf huh Ye-seef yoou da ninh,

ziuh tiangv timv iakf hho yua toof too gee vooi,

30 geef leengv ningf engv tok hoouf hee vooi,

bov,

"Meenf huh bee nungh vooi,

hauf di leeuf huk?"

31 Geef loh ziuh ga hookf tuangf huf hee vooi,

oouv foouf luangf luang Ye-seef neeh hiuf hee miaf zomf loouh baq tuangf gee vooi.

32 Ziuh faif lengv hunf oouv foouf neeh hiuf hee leengv ningf bef lai geef loh vooi,

bov,

"Hauf loh humv heekf foouf neeh hiuf hee,

meef nginh dekf tih meenf tih foouf leekf da hhiangh meef hiuf hee?"

33 Yav-gookf took nginh foouf neeh hiuf hee,

ziuh bov,

"Tih foouf leekf da hhiangh hauf hiuf hee,

itf dingf tih goouh goonv geef booiv vooi,

iakf leekf hauf huf hee Ye-seef deeif vooi!

Iakf deeif vooi!"

34 Yav-gookf meenf huh giauh dookf hungh,

geef ziuh iakf hho yua toof too gee vooi,

gatf hoopf ganv hhootf hee loouh loou vooi,

dookf hungh leekf huf hee ngai veenf ngai goomh ngai haih foong.

35 Leekf geef hoouf hee zung miaf an uif geef,

geef zung meenf hheeng hingf,

geef bov,

"Hauf dif ngai leekf hauf huf hee zi doongv longf soongh hemv geef am goonf."

Yav-gookf ziuh veeih leekf huf hee ngai di veenf veenf teenf heen.

36 Neeh tif hoouh,

lengv hunf Miv-dianf gee duf ga yin Ye-seef doongv Ai-gipf,

ing sev Bo-tiv-fav vooi.

Bo-tiv-fav tih Fav-lauh huf vuif deeif gee deeif ziangv hhiv zung gee huf hee.