Ye-seef geq voonf voon mooqf
40
1 Teeh neeh gee hoouh looif,
Ai-gipf voongf dooi gee yan zungh guanh hemv fiah zungh guanh deekf zuif lanf zu geef loh huf hee Ai-gipf voongf dooi vooi.
2 Fav-lauh ziuh hheei hhif zungh guanh neeh voon huf,
3 hoop geef loh loouh gamv yoou da lanf huf vuif deeif gee deeif ziangv Bo-tiv-fav neeh mee vooi,
ziuh tih lengv hoop Ye-seef neeh hhootf hee.
4 Bo-tiv-fav ziuh yam Ye-seef heng hoouh geef loh,
Ye-seef ziuh heng hoouh geef loh.
Geef loh zih yoou da gamv lai duanf hee tif ganv vooi.
5 Lai goomh hee,
lengv hunf hoop yoou da gamv neeh voon huf,
ziuh tih Ai-gipf voongf dooi gee yan zungh guanh hemv fiah zungh guanh,
yoou neeh goomh hee leeuf na duf voonf,
danf tih geef loh voonf gee if see meenf hongf goonf.
6 Haih ngeeih veenf zauf zau Ye-seef miaf dekf geef loh,
huh geef loh nguif tuif,
7 ziuh tooi hak Fav-lauh hemv geef hongf goonf hoop yoou da gamv lanf zu geef neeh voon huf bov,
"Veenf nooih meef loh lai gai teeh nyung nyang teenf heen?"
8 Geef loh tanv geef bov,
"Goomh vaf hauf loh voon na leeuf na duf voonf,
danf tih meenf lai naf nee took geq voonf hauf loh gee uk."
Ye-seef bov,
"Nah lai Siangf-dif took geq voonf,
seengv hauf meef loh voonf gai gee vooi."
9 Yan zungh guanh huf hee ziuh seengv geef voonf gee zee Ye-seef,
bov,
"Hauf voonf huh lai fuh hoouv dun hee yoou dau na hauf,
10 gooh dun hee lai ngev tamv hiuf,
ngev gee giangf ngukf ngoouh ziuh hhooiv huav,
makf fuh hoouv baiv ninh gee zung ngau vooi.
11 Hauf nganv zungv yan Fav-lauh mee yoou da moof,
hauf ziuh oouv fuh hoouv gee miaf deh namh gee loouh da zungv Fav-lauh mee vooi,
ziuh beu zungv yan mee sev Fav-lauh."
12 Ye-seef bov geef bov,
"Voonf neeh mee if see tih teenf heen:
Ngev tamv hiuf ziuh tih tamv veenf;
13 tamv veenf zee neeif,
Fav-lauh dif biang meef geen miaf,
biang meef ziuf huk hak meef mee,
ziuf beu zungv yan mee zee Fav-lauh zing gua na meef huk yan zungh guanh teenf heen.
14 Danf tih meef uk booiv ziuf huk hak hoouh looif,
hhuf meef gif niamf hauf,
vook hhoonv hauf,
yoou dau na Fav-lauh hheem hooi hauf gang go maif gee,
go hauf uk gamv.
15 Hauf titf titf tih lokf lengv lengv hunf Si-bov-laiv gee bif vanh bangh giaf miaf gee.
Ziuh tih yoou Ai-gipf hauf ya meenf lai huk gai gee seeu teeh gaiv lai ngov gamv."
16 Fiah zungh guanh huf hee huh Ye-seef geq voonf neeh mee teenf maif,
ziuh hemv Ye-seef gang bov,
"Hauf ya voonf mooqf hee,
hauf voonf huh hauf zunv bing fiakf tamv hhiangv yoou baiv hau,
17 yoou baif baiv neeh hhiangv hee,
deengf bing gookf zuangv gookf yiangh hhangf sev Fav-lauh goonv gee yoou ninh,
nokf gee vinv miaf goonv bing da hhiangv baiv hau hauf neeh gee."
18 Ye-seef bov,
"Voonf neeh mee if see tih teenf heen:
Tamv hhiangv if see ziuh tih tamv veenf,
19 tamv veenf zee neeif,
Fav-lauh itf dingf zam hau meef mee longf,
ling meef geen baiv mokf vooi,
itf dingf lai nokf vinv miaf goonv nanh baiv huf meef gee."
20 Doongv haih tamv veenf,
Fav-lauh tengv ngitf,
geef huk yan goonv moov sing hak geef hoouf hee hoouf hoou.
Geef yoou dau na hak geef hoouf hee,
biang yan zungh guanh hemv fiah zungh guanh geen miaf,
21 biang yan zungh guanh huf hee ziuf huk yan zungh guanh,
ziuf beu zungv yan sev Fav-lauh.
22 Danf tih ling fiah zungh guanh huf hee uif,
zing goh Ye-seef hooi geef loh geq voonf gee tif hoouh gang gee teenf heen.
23 Danf tih yan zungh guanh huf hee meenf gif niamf Ye-seef,
daf buh bangh geef vooi.