3 Ye-seef hemv engv tok hoouf hee gang bov,

"Hauf tih Ye-seef,

bef lai hauf huf hee yoou yoou meenf?"

Eng tok geef hoouf hee meenf tanv lai geef,

eenv veeih geef loh yoou dau na geef zung mangf ngeenf vooi.

4 Ye-seef yuh yam engv tok hoouf hee bov,

"Meef loh miaf loof loo geef."

Geef loh ziuh miaf loof loo ningf geef vooi.

Geef ziuh bov,

"Hauf tih Ye-seef,

ziuh tih tok meef loh ing booiv Ai-gipf neeh huf hee.

5 En teeif meef loh meenf ngah veeih teeh neeh hhinh hee ngaif tuh in sook vooi,

tih Siangf-dif sian faif hauf miaf nooih,

hau go mingh hemv goonf.

6 En teeif lengv neeh hhootf hee nah daiv yiak voon veeif,

enf lai nga veeif gai gee duf meenf sav lai,

meenf lai gai gee siu yoou.

7 Siangf-dif sian faif hauf miaf nooih,

tih veeih liauh go mingh meef loh hemv leekf lanv meef loh gee,

gangf go geengf liauh gee lengv hunf.

8 Ziuf teenf heen dekf,

tih Siangf-dif faif hauf miaf nooih,

meenf tih meef loh.

Geef biang hauf huk sam meeuv Fav-lauh huf hee,

hooi Fav-lauh guanh lih voongv gung,

ya biang hauf guanh lih suanf lengv Ai-gipf gee.

9 Meef loh hheem meng ziqf geen booiv doongv ningf bef lai hauf neeh hhootf hee,

seengv geef bov,

'Leekf meef huf hee Ye-seef teenf bov,

Siangf-dif duf ga biang hauf guanh lih suanf Ai-gipf vooi,

meef meng ziqf longf ningf hauf neeh hhootf hee,

meenf ngah ngoh tif ganv.

10 Meef hemv leekf da hhiangh meef gee leekf lanv meef gee,

hemv nguf meef gee tuangf meef gee gangf meef too lai gee itf siatf miaf,

zung hhoo yi zih yoou lengv Gee-san gee,

hemv hauf loof loo goonf,

11 hauf dif yoou ninh tiangh meef,

ha zinf meef hemv gav lanf meef gee lengv hunf gangf meef too lai gee itf siatf yiak daiv vooi,

eenv veeih enf lai nga veeif daiv yiak yoou.'"

12 Ye-seef yuh bov,

"En teeif,

meef loh hemv tok hauf huf hee Bianf-yav-mianh zung sinv dav dekf huh hauf sin zeef hemv meef loh gang go neeh gee vooi.

13 Meef loh hheem seengv baf hauh,

hauf yoou Ai-gipf huk hau hhinf mee meenf huh giauh nyoo,

ya hheem seengv meef loh dekf huh gee itf siatf zee geef,

meef loh hheem meng ziqf zip baf hauh miaf nooih miaf."

14 Ye-seef gang go neeh gee inv,

ziuh gut tok geef huf hee Bianf-yav-mianh loouh ngai oo oo teenf heen,

tok geef huf hee ya gut geef loouh ngai oo oo teenf heen.

15 Geef yuh it minh ngai,

it minh gut engv tok geef hoouf hee di na doongv di na,

hoomv geef loh.

Seeif looif engv tok geef hoouf hee ziuh hemv geef gang go.

16 Engv tok Ye-seef hoouf hee miaf Ai-gipf gee siau sikf suanf doongv voongv gung vooi,

Fav-lauh hemv hak geef hoouf hee duf hheekf see eengv.

17 Fav-lauh hemv Ye-seef gang bov,

"Meef yam engv tok meef hoouf hee bov,

'Meef loh hheem teenf huk,

deengf liangv sikf gee dikf dik geen baiv luh meef loh gee vooi,

hav leengv lengv Gia-noomv gee.

18 Zip bef lai meef loh hemv gav lanf gee lengv hunf inf inv miaf ningf hauf,

hauf dif sev lengv suanf Ai-gipf zuif maif neeh hhootf hee zee geef loh,

ya oouv goouh yoou nooih zuif maif gee zee geef loh goonv.

19 "Meef ya hheem seengv geef loh,

hav siav Ai-gipf gee leengv booiv,

hau zip maih geef loh gee leekf geef loh gee,

gangf bef lai meef hemv goonf ngov siav miaf.

20 Yam geef loh meenf ngah gov gav teeh fiangf ninh gee vooi,

eenv veeih goouh suanf lengv Ai-gipf zuif maif gee zung tih geef loh gee."

21 Leekf da hhiangh Yav-gookf hoouf hee ziuh teenf huk.

Ye-seef ziuh ziuf Fav-lauh gang gee,

oouv siav hemv goouh da sunv goonv gee sev geef loh.

22 Ya sev hho yua nauh di na deei zee gof geef hoouf hee,

danf tih sev hho yua nga deei hemv ngoonf fiakf tamv bek mooqf zee Bianf-yav-mianh.

23 Ye-seef ya hong hookf luh teepf huf hemv maih luh teepf huf zee bef lai geef.

Hookf luh gee iaq goouh Ai-gipf zuif maif gee,

maih luh gee iaq loopf mookf hemv bing gangf goouh hhiv ha gee sev bef lai geef yoou da sunv goonv.

24 Ye-seef ziuh hong looif engv tok geef hoouf hee,

zuk geef loh bov,

"Meef loh yoou da sunv meenf ngah zengv goonf."

25 Geef loh lif hhooiv Ai-gipf,

geen doongv lengv Gia-noomv ningf bef lai geef loh huf hee Yav-gookf neeh hhootf hee vooi.

26 Geef loh seengv bef lai bov,

"Ye-seef enf yoou yoou,

en teeif geef guanh lih suanf lengv Ai-gipf gee nenh."

Yav-gookf timv mee foonf vooi,

eenv veeih geef meenf zun geef loh.

27 Geef loh ziuh oouv Ye-seef hemv geef loh gang gee itf siatf gee go zung seengv zee geef vooi.

Geef ya dekf huh siav Ye-seef faif miaf zip geef neeh gee,

geef nah siang sinf vooi.

28 Yih-seef-liatf ziuh bov,

"Maif vooi!

Maif vooi!

Leekf da hhiangh hauf huf hee Ye-seef enf yoou yoou,

dim hauf meenf daiv yoou,

hauf dif booiv dekf leekf hauf huf hee ziu."