3 Haih ngeeih veenf zauf zau,

ziuh yam lengv hunf neeh gee voouf luh geef loh gee leengv booiv vooi.

4 Danf tih geef loh uk heeuv booiv meenf lai giauh looiv yoou,

Ye-seef ziuh yam guanh gia huf hee bov,

"Meef meng ziqf booiv zuiv lengv hunf neeh hoouf hee,

zuiv heekf vooi ziuh tooi geef loh bov,

'Hauf loh doi meef loh teenf maif,

meef loh veeih gai doi hauf loh ook teenf heen nif?

5 Neeh mee meenf tih zungv lanf zu hauf huf hee oouv miaf goonv yanh neeh mee haf?

Zungv neeh mee tih geef oouv miaf goonv yan hemv oouv miaf dekf doongv nooih dif fatf seeng gee teeh gee,

meef loh teenf huk titf titf tih meenf heekf!'"

6 Guanh gia huf hee zuiv heekf geef loh vooi,

ziuh ziuf Ye-seef gang gee bov geef loh.

7 Geef loh tanv bov,

"Nyoo haf!

Meef gang gai gee haf?

Leekf nof meef gee zuatf deeif meenf huk teeh neeh gee.

8 Noh,

hauf loh baiv fooif huh ngoonf fiakf yoou da hooih hauf loh neeh gee,

hauf loh duf dai lokf lengv Gia-noomv gee leengv miaf fooh meef,

hauf loh di leeuf dif lookf gimv ngoonf lanf lanf zu meef gee nif?

9 Nyoo haf!

Meef zeekf yoou da leekf nof meef gee giam zungv neeh mee lokf hooih naf nee mee uk miaf,

ziuh ga naf nee booiv,

hauf loh ya hooi zu hauf huf hee huk nof."

10 Guanh gia huf hee bov,

"Noov lai,

ziuf meef loh gang gee huk.

Giam zungv mee lokf hooih naf nee mee uk miaf,

naf nee ziuh hooi hauf huk nof,

hhiv ha gee lengv hunf ziuh meenf lai soih vooi."

11 Geef loh ziuh gan hhuangf geq hooih gee longf dauf matf vooi,

toof too hheeif hooih toof too gee vooi.

12 Guanh gia huf hee ziuh giam lokf nenf tui zuif nyoo neeh huf hee uif,

giam zi doongv zuif nook neeh huf hee,

daf dekf huh zungv mee yoou da hooih Bianf-yav-mianh mee.

13 Engv tok hoouf hee ziuh meenf huh giauh tiangv timv iakf hhoo yua toof too gee vooi,

sungf zav goouh toof too gee geen baiv luh,

fanv leengv da heeuv vooi.

14 Yiuh-daf hemv engv tok geef hoouf hee leengv doongv lanf Ye-seef,

neeh tif hoouh Ye-seef enf yoou lanf yoou,

geef loh ziuh hhuih longf hhupf yoou dauf matf bai geef.

15 Ye-seef bov geef loh bov,

"Meef loh huk teeh gai gee nooh?

Meef loh meenf huh zing hauf neeh zuangv lengv hunf itf dingf huh doongv nooih dif fatf seeng gee teeh haf?"

16 Yiuh-daf bov,

"Zu hauf loh haf!

Teeh gee duf ga teenf heen vooi,

hauf loh dif lai go gai gee hau gang yoou,

hauf loh dif bov lai hauf loh meenf lai soih haf?

Siangf-dif duf ga gung hhai soih leekf nof meef gee vooi.

En teeif,

hauf loh hemv neef giam zungv mee lokf da hooih geef uk miaf neeh huf hee zung tih leekf nof zu hauf gee vooi."

17 Danf tih Ye-seef bov,

"Meenf!

Hauf zuatf deeif meenf huk teeh neeh gee,

lokf da hooih naf nee mee giam zungv yan mee uk miaf,

naf nee ziuh luf longf hemv hauf huk nof.

Hhiv ha gee lengv hunf hhoo yi biang timv geen ningf bef lai meef loh neeh hhootf hee."

18 Yiuh-daf booiv ningf Ye-seef vooi,

bov,

"Zu hauf loh haf!

Hhuf meef sev leekf nof gang go gee,

meenf ngah hheei hhif leekf nof goof,

hauf dekf huh meef zing dekf huh Fav-lauh teenf heen.

19 Zu hauf loh haf!

Gua na meef tooi leekf nof gee bov,

'Meef loh enf lai bef lai hemv hhiv ha gee engv tok yoou meenf?'

20 Hauf loh tanv zu hauf bov,

'Hauf loh enf lai bef lai yoou,

geef duf ga lauf lauh vooi,

ya lai leekf tok huf hee,

bef lai lauf lauh nah lai geef.

Gof geef huf hee daiv vooi,

maih lai geef lai gee nah teengh geef toof too vooi,

guf seeh bef lai meenf huh giauh dookf geef.'

21 "Zu hauf loh haf!

Meef yam leekf nof gee bov,

'Yin leekf tok huf hee longf ningf hauf miaf,

biang hauf sinv dav dekf ziu.'

22 Hauf loh bov zu hauf bov,

'Leekf neeh huf hee meenf lif lai hhooiv bef lai geef,

zeekf lif hhooiv vooi bef lai geef ziuh dif daiv.'

23 Danf tih meef bov leekf nof gee bov,

'Meef loh zeekf meenf yin tok meef loh huf hee miaf ningf hauf,

meef loh ziuh meenf ngah tiang huh hauf fooif hemv.'

24 Hauf loh geen doongv ningf leekf nof meef huf hee,

bef lai hauf loh neeh hhootf hee,

ziuh seengv go zu hauf loh gee zee geef.

25 "Seeif looif,

bef lai hauf loh yam hauf loh bov,

'Sungf booiv vianv liangv sikf ziqf hemv leengv.'

26 Hauf loh ziuh bov,

'Hauf loh meenf longf lai booiv.

Zeekf leekf tok zuif nook hauf loh neeh huf hee hemv hauf loh hongf goonf booiv,

hauf loh ziuh longf booiv;

eenv veeih leekf tok zuif nook hauf loh neeh huf hee meenf hemv hauf loh hongf goonf booiv,

hauf loh ziuh meenf huh lai heekf lengv hunf neeh huf hee.'

27 "Leekf nof meef huf hee bef lai hauf loh huf hee bov hauf loh bov,

'Meef loh huh maih hauf huf hee La-zev,

nah hooi hauf lai leekf da hhiangh voon huf toof too.

28 Huf hee duf ga lif hhooiv hauf booiv vooi,

lokf geef booiv hoouh looif,

hauf meenf huh dav geef fooif hemv vooi,

itf dingf tih goouh iakf geef deeif vooi.

29 En teeif meef loh ya dif lokf dau na hauf yin neeh huf hee booiv,

zeekf geef yoou da sunv am heekf gai teeh,

ziuh tih meef loh biang hauf fuiv fiakf fiakf teenf heen nanf vif zi doongv longf soongh vooi.'"

30 Yiuh-daf gif zukf gang bov,

"Zu hauf loh haf!

En teeif hauf leengv ningf leekf nof meef huf hee bef lai hauf loh neeh hhootf hee,

zeekf hauf loh meenf yin leekf neeh huf hee hemv hauf loh hongf goonf leengv booiv,

mingh bef lai hauf loh hiuf hee hemv leekf neeh huf hee loouh goonf,

31 geef zeekf dekf meenf huh leekf neeh huf hee,

ziuh meenf yoou lai vooi.

Teenf heen,

ziuh tih hauf loh biang leekf nof meef huf hee bef lai hauf loh huf hee fuiv fiakf nanf vif longf soongh vooi.

32 Guf seeh leekf nof hemv bef lai hauf huf hee hooi leekf neeh huf hee dam boouh gua,

bov,

'Hauf zeekf meenf dai geef leengv miaf gauv sev bef lai,

hauf neeh tooi hee ziuh yoou dau na bef lai yungh yuanh hap soih neeh mee.'

33 "Zu hauf loh haf!

En teeif hhuf meef luf leekf nof longf miaf,

ding leekf neeh huf hee hemv meef huk nof,

biang geef hemv gof geef hoouf hee hongf goonf geen booiv.

34 Zeekf leekf neeh huf hee meenf hemv hauf hongf goonf leengv booiv,

hauf di leeuf leengv booiv huh bef lai hauf huf hee nif?

Hauf meenf tia lai dekf huh bef lai hauf huf hee teenf heen nanf vif."