Yav-gookf zukf fukf leekf da hhiangh geef gee
49
1 Yav-gookf yuh yam leekf da hhiangh geef hoouf hee inf inv miaf,
bov,
"Meef loh vif loof loo ningf hauf vooi,
hauf dif seengv doongv nooih meef loh dif am heekf gee teeh zee meef loh.
2 Leekf da hhiangh Yav-gookf gee haf!
Meef loh hheem hemv goonf miaf hingf;
hingf go bef lai meef loh Yih-seef-liatf gee loouh.
3 Liuv-bianf haf!
Meef tih leekf da hhiangh neef nyoo hauf huf hee,
tih hauf zuif un zuif hhianh gee tif hoouh lai gee,
tih leekf soof hoong hauf huf hee;
yoou da engv tok meef hoouf hee,
mingf feenh meef mee zuif nyoo,
hhinf meef mee ya zuif nyoo,
4 danf tih meef zing namh gee lianv taq taq teenf heen,
ooi di leeuf ziuh di leeuf,
mingf feenh leekf neef nyoo neeh mee meef ziuh meenf lai feenh vooi;
eenv veeih meef geen tangf bef lai meef ziangv hee vooi,
geen tangf hauf ziangv hee vooi,
huk gooh ziangv hee zeq vooi.
5 Si-mianf hemv Lif-vuif tih engv tok,
mitf giamf geef loh gee tih ook seeu gee vuh hhif.
6 Lingv hauf mee haf,
meenf ngah hemv geef loh hongf dangh;
timv hauf mee haf,
meenf ngah hemv geef loh hongf faif.
eenv veeih geef loh hhif vooi ziuh ga lengv hunf,
damh nyaf nguf gok nguf gee miaf nyamv hau lakf.
7 Hheei geef loh gee geen,
gaiv lai zeeuf,
eenv veeih geef loh seeu;
ting hheei geef loh gee meng,
gaiv lai zeeuf,
eenv veeih geef loh ook.
Hauf dif biang geef loh tan tav zih yoou da lanf Yav-gookf mee,
biang geef loh tan tav yoou da lengv Yih-seef-liatf gee.
8 Yiuh-daf haf,
engv tok meef gee itf dingf ngenv meef,
meef dif deh gof dikf yinv meef gee,
leekf da hhiangh bef lai meef gee zung dif bai meef.
9 Yiuh-daf tih leekf teeiv zee huf hee;
leekf hauf huf hee haf,
meef hoof heekf goouh vooi ziuh zau geen booiv.
Geef omf loou longf,
lap zing hookf teeiv zee huf hee teenf heen,
zumh zing maih teeiv zee huf hee teenf heen,
naf nee goom doou geef?
10 Hhinf voongf dooi mee dif yungh yuanh yoou da moof Yiuh-daf,
inf voongf mee dif yungh yuanh meenf luat moof leekf lanv geef gee,
zi doongv ziangh hhinf gee neeh huf hee miaf,
too lai gee minv zukf zung dif hingf go geef.
11 Yiuh-daf dif heeif luh toof too huf hee loouh hau dun fuh hoouv vooi,
geef heeif leekf luh toof too huf hee loouh hau dun fuh hoouv maif maif neeh dun gee tif hoouh;
geef dif yoou da yan fuh hoouv dakf yua toof too gee,
yoou da zip fuh hoouv hongf hongf gee dakf foouf geef hiuf hee.
12 Dav geef deei hee bih yan hongf,
tinv geef bak hee bih noq fiakf.
13 Si-buf-lonv itf dingf zih yoou lengv ningf hai gee,
geef itf dingf tingf bak ngav hengf luaf mee,
lengv geef gee itf dingf teeqf doongf doongv heeuv Si-dunf.
14 Yih-sa-zia tih yuh zoong yuh hhianh gee luh huf hee,
lap yoou zing da anv voon mooqf.
15 Geef dekf zih yoou lengv neeh hhootf hee on on maif,
geef ooi lengv luangf luangf neeh hhootf hee.
geef ziuh doom hau doom via longf,
bin tingf nof huk hho gee vooi.
16 Danf tih Yih-seef-liatf gee zi faif mee,
geef dif simh fuanf bek ting geef toof too gee.
17 Doongv nooih geef tih ngiaf ningf sunv huf hee,
geef tih ngiaf lamv ningf leekf sunv huf hee.
geef dif gapf gok maqf gee,
biang lengv hunf hheeih maqf gee ling leengv looif vooi.
18 Ye-hheev-huav haf,
hauf lokf hau zung foou meef gee giuf een!
19 Zia-teev itf dingf bif sookf sangv hum,
danf tih geef dif zuiv moh zengv geef loh gee.
20 Goouh goonv Yav-seef gee itf dingf yuh liauh yuh maif,
geef dif hong goouh en goouh maif gee sev voongf dooi.
21 Nav-fov-ta-lif tih bif tek uk miaf gee maih zokf huf hee,
geef lai leekf zokf gee luangf luang.
22 Ye-seef tih giat makf liauh gee gamh dun ngev hee,
tih ningf namh maf dof giat makf liauh gee gamh dun ngev hee,
gamh geef gee teeqf uk siangf vooi.
23 Bef nyoof loomh gee gukf lingf haih geef,
bik geef,
gapf bak gapf loongv loouh nyoof geef.
24 Danf tih loomh Ye-seef gee enf ngef nge yoou,
moof geef deei hee enf mengf mengf yoou.
Eenv veeih Yav-gookf gingf baif zuif heen gee Neeh-huf-hee,
Bef-tiangh-tuangf Yih-seef-liatf huf hee,
Dinf-danv Yih-seef-liatf mee boongv tooh geef.
25 Meef bef lai gee Siangf-dif itf dingf boongv tooh meef,
suanv neengv gee Siangf-dif itf dingf sev fok zee meef;
baiv fa dauf matf too lai gee fok feenh,
geef zung sev zee meef,
biang meef leekf liauh lanv liauh,
nguf tuangf tingf hoouf.
26 Bef lai meef zukf fukf meef gee
hangv gua deng tiah gi tif duf meenf bin neeh gee,
liauh zing tiah gee di fef fef teenf heen vook meenf huh tuq.
Hi voongf neeh itf siatf gee zukf fukf zung diaqf geen baiv hau Ye-seef,
diaqf geen baiv hau tuif yoou da engv tok gee huk voongv zeeh gee neeh huf hee.
27 Bianf-yav-mianh tih langv ook huf hee,
zauf zau leeq goouh geef hoof gee,
veenf yoop feenv goouh geef geep miaf gee."
28 Baiv ninh neeh gee tih Yih-seef-liatf gee teepf ngeeih mooqf zi faif.
Go baiv ninh neeh gee tih bef lai geef loh hemv geef loh gang gee,
tih ziuf geef loh mui na gee fok feenh miaf zukf fukf geef loh gee.
Yav-gookf gua tooi vooi
29 Yav-gookf yuh zuk geef loh bov,
"Hauf dif hhooiv leengv ningf gungv befa hauf gee vooi.
Meef loh hheem bok hauf hemv gungv bef hauf gee yoou ningf goonf,
ziuh tih yoou soongh da veen lengv hunf Hheef Yih-fov-lonv neeh mee.
30 Soongh neeh mee yoou lengv Gia-noomv gee,
yoou ningf Manf-lif,
yoou da veen Maif-bih-la neeh hhootf hee.
Soongh neeh mee hemv veen neeh hhootf hee tih Yav-bov-la-hanf hemv lengv hunf Hheef Yih-fov-lonv vianv miaf huk makf feenf gee.
31 Yav-bov-la-hanf hemv maih geef huf hee Sa-la bok yoou ninh;
Yih-sav hemv maih geef huf hee Lif-baiv-zia ya bok yoou ninh;
hauf ya bok Lif-yav yoou ninh.
32 Veen neeh hhootf hee hemv soongh da veen neeh mee,
tih hemv lengv hunf Hheef vianv gee."
33 Yav-gookf zuk leekf da hhiangh geef gee inv,
ziuh hunh hheei daiv vooi,
guiv leengv ningf gungv bef geef neeh hhootf hee vooi.